పొమ్మనలేక పొగ పెడుతున్నారు.. నందమూరి మోక్షజ్ఞ ఎంట్రీ వెనుక ఏం జరుగుతోంది?

నందమూరి మోక్షజ్ఞ టాలీవుడ్ ఎంట్రీ ఫ్యాన్స్ ని అందని ద్రాక్షలాగా ఊరిస్తూనే ఉంది. ఆ మధ్యన ప్రశాంత్ వర్మతో మోక్షజ్ఞ ఎంట్రీ చిత్రాన్ని ప్రకటించారు. ఆ చిత్ర ప్రీ ప్రొడక్షన్ ఎంత వరకు వచ్చిందో తెలియదు. ప్రశాంత్ వర్మ, మోక్షజ్ఞ చిత్రం ఆగిపోయింది అని కూడా వార్తలు వచ్చాయి. కొంతమంది చెబుతున్న దాని ప్రకారం.. మోక్షజ్ఞ, ప్రశాంత్ వర్మ చిత్రం ఆగిపోలేదని.. తాత్కాలికంగా బ్రేక్ పడింది అని అంటున్నారు. 

కొత్త సంవత్సరంలో మోక్షజ్ఞ డెబ్యూ చిత్రం గురించి వస్తున్న వార్తలు ఏమాత్రం ఆశాజనకంగా లేవు. ప్రకటనకే పరిమితమైన ఈ చిత్రం ఈ ఏడాది అయినా ప్రారంభం అవుతుందా లేదా అనేది బిగ్ క్వశ్చన్. కొన్ని షాకింగ్ రూమర్స్ ప్రకారం మోక్షజ్ఞ డెబ్యూ చిత్రం నుంచి దర్శకుడిగా ప్రశాంత్ వర్మని పూర్తిగా తప్పించాలనే ప్రయత్నాలు జరుగుతున్నాయట. 

Mokshagna Nandamuri

నందమూరి కాంపౌండ్ నుంచే ఈ ప్రయత్నాలు మొదలైనట్లు తెలుస్తోంది. నందమూరి మోక్షజ్ఞ మంచి మాస్ చిత్రంతో లాంచ్ కావాలి అనేది ఫ్యాన్స్ కోరిక. కానీ ప్రశాంత్ వర్మ కాన్సెప్ట్ బేస్డ్ చిత్రాలు చేస్తుంటారు. హీరో ఎలివేషన్స్ కి కాన్సెప్ట్ బేస్డ్ చిత్రాల్లో అంతగా ప్రాధాన్యత ఉండదు. అభిమానుల కోరికకి భిన్నంగా వెళ్ళకూడదు అనేది బాలయ్య ఆలోచన అని కూడా ప్రచారం జరుగుతోంది. 

దీనితో ప్రశాంత్ వర్మని పక్కన పెట్టి స్టార్ డైరెక్టర్ తో మోక్షజ్ఞ డెబ్యూ చిత్రం సెట్ చేయాలి అని సోషల్ మీడియా వేదికగా నందమూరి ఫ్యాన్స్ ట్రెండింగ్ మొదలు పెట్టారు. చూస్తుంటే ప్రశాంత్ వర్మని పొమ్మనలేక పొగపెడుతున్నట్లు అనిపిస్తోంది. మోక్షజ్ఞ ఎంట్రీ చిత్రం వెనుక పెద్ద తతంగమే సాగుతోంది.