శ్రీకృష్ణ పాత్రధారి అంటూ నరేష్ ని టార్గెట్ చేసిన నాగబాబు.. పవన్ విషయంలో తొలిసారి విష్ణుకి కౌంటర్

'మా' అసోసియేషన్ ఎన్నికకు ఇక కేవలం నాలుగు రోజుల సమయం మాత్రమే ఉంది. దీనితో ప్రకాష్ రాజ్ ప్యానల్, విష్ణు ప్యానల్ ప్రచార జోరు పెంచాయి. ఇరు వర్గాల మధ్య మాటల యుద్ధం తారా స్థాయికి చేరింది. ప్రకాష్ రాజ్, విష్ణు ఒకరిపై ఒకరు విమర్శలు చేసుకుంటున్నారు. గత రెండు రోజులుగా వీరిద్దరి మధ్య విమర్శల తీవ్రత పెరిగింది. విష్ణు ప్యానల్ సభ్యులు ప్రకాష్ రాజ్ స్థానికతని ప్రశ్నిస్తున్నారు. ఇక ప్రకాష్ రాజ్.. మా సభ్యులని విష్ణు డబ్బుతో ప్రలోభ పెట్టాలని ప్రయత్నిస్తున్నట్లు సంచలన ఆరోపణలు చేశారు. 

ఇదిలా ఉండగా Prakash Raj కు మెగా బ్రదర్ నాగబాబు మొదటి నుంచి మద్దతు తెలుపుతున్న సంగతి తెలిసిందే. తాజాగా ప్రకాష్ రాజ్ ప్యానల్ నిర్వహించిన సమావేశంలో నాగబాబు మాట్లాడుతూ ఆసక్తికర వ్యాఖ్యలు చేశారు. నరేష్, విష్ణుపై నాగబాబు విమర్శలు చేశారు. 'మా' బాగా పాపులర్.. కానీ చాలా చిన్న అసోసియేషన్. మనం ప్రతి సారి ఇలా మీడియా ముందుకు రావలసిన అవసరం లేదు. కానీ ఒకే ఒక్క వ్యక్తి బ్యాడ్ హ్యాబిట్ వాళ్ళ ఈ దుస్థితి పట్టింది. ఆ వ్యక్తి ఎవరో కాదు ప్రముఖ శ్రీకృష్ణ పాత్ర ధారి అంటూ నాగబాబు నరేష్ పై పరోక్షంగా విమర్శలు చేశారు. 

అతడు తుమ్మినా ప్రెస్ మీట్.. దగ్గినా ప్రెస్ మీట్.. అసలు మీడియా ముందుకు వెళ్లాల్సిన అవసరం ఏముంది అని నాగబాబు ప్రశ్నించారు. ఇక ప్రకాష్ రాజ్ నా కంటే మా అన్నయ్యకు బాగా క్లోజ్. ప్రకాష్ రాజ్ కి , నాకు చాలా విషయాల్లో అభిప్రాయ బేధాలు వచ్చాయి. కానీ అది వేరు. మా ఎన్నికల విషయంలో ప్రకాష్ రాజ్ పర్ఫెక్ట్ ఛాయిస్. చాలా తెలివైన వాడు. ప్రకాష్ రాజ్.. బిజెపి సీనియర్ సుబ్రమణ్యస్వామితో కూడా డిబేట్ లో పాల్గొన్నారు. అంత అనుభవం లీడర్ తోనే ప్రకాష్ రాజ్ డిబేట్ లో పాల్గొన్నారు. 

కానీ ఇప్పుడు వీరంతా ప్రకాష్ రాజ్ నాన్ లోకల్ అంటూ మాట్లాడుతున్నారు. అరె బాబు ప్రకాష్ రాజ్ ఇండియన్ నటుడు రా.. అన్ని భాషల్లో నటించాడు అని నాగబాబు వ్యాఖ్యానించారు. ప్రకాష్ రాజ్ ఇండస్ట్రీ వైపు ఉన్నాడా.. పవన్ కళ్యాణ్ వైపు ఉన్నాడా అంటూ విష్ణు ప్రశ్నించడం చూశా. ఆ ప్రశ్న ఏంటి.. కళ్యాణ్ బాబు తెలుగు నటుడు కాదా.. ఎలాంటి ప్రశ్నలు అడుగుతున్నారో అర్థం కావడం లేదు అని నాగబాబు అన్నారు. 

ప్రకాష్ రాజ్ లాంటి తెలివైన వ్యక్తి ఒక టర్మ్ మాత్రమే కాదు మూడు టర్మ్స్ మా అధ్యక్షుడిగా ఉండాలి. అప్పుడే మా ఒక దారికి వస్తుంది అని నాగబాబు అన్నారు. ఓటర్లని డబ్బు ప్రలోభాలకు గురిచేస్తున్నట్లు విన్నాను. అదే కనుక నిజమైతే నిజంగానే 'మా' మసకబారినట్లే అని నాగబాబు అన్నారు. 

నరేష్ మంచు విష్ణు ప్యానల్ కు మద్దతు ఇస్తున్నారు. బాబు మోహన్, కరాటే కళ్యాణి, రఘుబాబు, శివబాలాజీ , కమెడియన్ పృథ్వి లాంటి ప్రముఖులు విష్ణు ప్యానల్ లో ఉన్నారు. శ్రీకాంత్, జీవిత, హేమ, బెనర్జీ, అనసూయ , ఉత్తేజ్ లాంటి ప్రముఖ నటులు ప్రకాష్ రాజ్ ప్యానల్ నుంచి బరిలోకి దిగుతున్నారు.