MSMPReview:మిస్ శెట్టి మిస్టర్ పోలిశెట్టి ప్రీమియర్ టాక్..నవీన్ స్టాండప్ కామెడీ కేక, అనుష్కని డామినేట్ చేస్తూ

నవీన్ పోలిశెట్టి, స్టార్ హీరోయిన్ అనుష్క శెట్టి కాంబినేష‌న్‌లో రూపొందిన రొమాంటిక్ ఫ్యామిలీ ఎంట‌ర్‌టైన‌ర్ ‘మిస్ శెట్టి మిస్టర్ పోలిశెట్టి’. ఈ చిత్రం సెప్టెంబర్ 7న నేడు  గ్రాండ్ రిలీజ్ కి సిద్ధం అవుతోంది. యువ దర్శకుడు మహేష్ బాబు ఈ చిత్రాన్ని రూపొందించాడు. టీజర్స్, ట్రైలర్స్ లో నవీన్ పోలిశెట్టి తన సహజసిద్ధమైన కామెడీ టైమింగ్ తో మెప్పించడంతో సినిమాపై అంచనాలు పెరిగాయి. 

ఇక అనుష్క కొంత గ్యాప్ తర్వాత నటించిన చిత్రం కావడంతో ఈ మూవీ కోసం స్వీటీ ఫ్యాన్స్ కూడా ఆసక్తిగా ఎదురుచూస్తున్నారు. కాగా యుఎస్ లో ఆల్రెడీ ప్రీమియర్ షోలు మొదలయ్యాయి. దీనితో ప్రేక్షకుల నుంచి ఈ చిత్రానికి రెస్పాన్స్ మొదలైంది. అనుష్క లండన్ లో చెఫ్ గా పనిచేసే మహిళ. ఆమె సన్నివేశాలతో చిత్రం ప్రారంభం అవుతుంది. అనుష్క ఇండియాకి తిరిగి వచ్చాక.. స్టాండప్ కామెడీ సీన్స్ తో నవీన్ పోలిశెట్టి పాత్ర పరిచయం అవుతుంది. 

ప్రారంభంలో దర్శకుడు కథని కాస్త స్లోగా ప్రారంభించాడు. నెమ్మదిగా ఈ చిత్రంలో ఫన్ ఎలిమెంట్స్ పెరుగుతూ ఉంటాయి. ఒక్కసారిగా కాకుండా సీన్ బై సీన్ దర్శకుడు కామెడీ పెంచుతూ వెళ్లారు. ఆడియన్స్ నవీన్ పోలిశెట్టి పాత్రకి బాగా కనెక్ట్ అవుతారు, ముఖ్యంగా షార్ప్ టైమింగ్ తో అతడు చేసే స్టాండప్ కామెడీ పైగా మెప్పిస్తుంది. ఫస్ట్ హాఫ్ లో ఎంగేజ్ చేసే సన్నివేశాలు చాలానే ఉన్నాయి. 

ఫస్ట్ హాఫ్ లో వచ్చే సాంగ్స్ కూడా ఆకట్టుకునే విధంగా మలిచాడు దర్శకుడు. పాటలని చిత్రీకరించిన విధానం సూపర్బ్ గా ఉంది. ఇక కామెడీ మాత్రమే కాదు సెకండ్ హాఫ్ లో వచ్చే ఎమోషనల్ సన్నివేశాలు కూడా చాలా అర్థవంతంగా కథానుగుణంగా ఉంటాయి. అక్కడక్కడా కొన్ని సాగదీసిన సన్నివేశాలు మాత్రమే ఈ చిత్రంలో మైనస్ అని చెప్పాలి. బిజీయం కూడా బావుంది. 

చాలా సన్నివేశాల్లో నవీన్ పోలిశెట్టి అనుష్కని డామినేట్ చేశాడు అనే చెప్పాలి. కానీ అనుష్క కూడా ఎక్కడా తగ్గలేదు. తన అనుభవంతో ఎమోషనల్ గా కట్టి పడేసింది. దర్శకుడు మహేష్ బాబుపై ప్రంసంసలు కురుస్తున్నాయి. స్క్రీన్ ప్లే, కథ , చాలా క్లీన్ గా ఉండే కామెడీ.. మెస్మరైజ్ చేసే డైలాగులు ఇలా ప్రతి అంశంలో మహేష్ బాబు సక్సెస్ అయ్యారు అని అంటున్నారు. 

ఇటీవల వచ్చిన బెస్ట్ రోమ్ కామ్స్ చిత్రంలో మిస్ శెట్టి మిస్టర్ పోలిశెట్టి చిత్రం ఒకటి అని అంటున్నారు. తొలి కాంబినేషన్ అయినప్పటికీ నవీన్, అనుష్క మధ్య కెమిస్ట్రీ కూడా భలే వర్కౌట్ అయింది. ఓవరాల్ గా చూసుకుంటే కథ చాలా చిన్న పాయింట్ అనిపిస్తుంది. కానీ దర్శకుడు స్క్రీన్ ప్లేతో మ్యాజిక్ చేశారు. 

అనుష్క, నవీన్ తమ నటనతో నెక్స్ట్ లెవల్ కి తీసుకువెళ్లారు. టాక్ పరంగా ఈ చిత్రానికి తిరుగుండదు అని అంటున్నారు. కానీ బాక్సాఫీస్ వద్ద కూడా అలాంటి మ్యాజిక్ చేయగలుగుతుందా అనేది చూడాలి. ఓవరాల్ గా మిస్ శెట్టి మిస్టర్ పోలిశెట్టి క్లీన్ రొమాంటిక్ కామెడీ డ్రామా చిత్రంగా నిలవనుంది. నవీన్ పోలిశెట్టి ఇమేజ్ ని ఇంకాస్త పెంచే చిత్రమే ఇది.