అమీర్ ఖాన్ చేతుల మీదుగా చిరంజీవికి గిన్నిస్ వరల్డ్ రికార్డ్ ప్రదానం..తెలుగు జాతి గర్వించే ఘనత అంటూ ప్రశంసలు

బాలీవుడ్ స్టార్ హీరో మిస్టర్ పర్ఫెక్ట్ అమీర్ ఖాన్ చేతుల మీదుగా చిరంజీవి గిన్నిస్ వరల్డ్ రికార్డ్ అందుకున్నారు. చిరంజీవి 156 చిత్రాల్లో నటించారు. వందలాది పాటలకు అద్భుతమైన డ్యాన్స్ చేశారు. చిరంజీవి లాగా ఈ స్థాయిలో పాటలకు డ్యాన్స్ చేసిన నటుడు ఇంకొకరు లేరు.

మెగాస్టార్ చిరంజీవి టాలీవుడ్ లో అందుకొని ఘనతలు, రికార్డులు లేవు. గత 46 ఏళ్లుగా చిరంజీవి టాలీవుడ్ లో  తిరుగులేని ఆధిపత్యం ప్రదర్శిస్తున్నారు. ముఖ్యంగా చిరంజీవి తన చిత్రాలతో డ్యాన్సుల విషయంలో కొత్త ట్రెండ్ తీసుకువచ్చారు. టాలీవుడ్ లో డాన్సులు చిరంజీవి రాక ముందు ఒకలా ఉండేవి.. దానిని పూర్తిగా మార్చేస్తూ డ్యాన్స్ అంటే ఇది అని ట్రెండ్ సెట్ చేశారు. 

తాజాగా మెగాస్టార్ కీర్తి కిరీటంలో మరో కలికితురాయి చేరింది. మెగాస్టార్ డ్యాన్స్ కి ఏకంగా గిన్నిస్ వరల్డ్ రికార్డ్ దక్కింది. సినిమాల్లో అత్యధిక పాటలకు డ్యాన్స్ చేసిన నటుడిగా చిరంజీవి చరిత్ర సృష్టించారు. దీనితో గిన్నిస్ వరల్డ్ రికార్డ్ తో చిరంజీవిని గౌరవించారు. దీని కోసం హైదరాబాద్ లో ప్రత్యేకంగా ఈవెంట్ నిర్వహించి చిరంజీవికి గిన్నిస్ వరల్డ్ రికార్డ్ అవార్డు అందించారు. 

బాలీవుడ్ స్టార్ హీరో మిస్టర్ పర్ఫెక్ట్ అమీర్ ఖాన్ చేతుల మీదుగా చిరంజీవి గిన్నిస్ వరల్డ్ రికార్డ్ అందుకున్నారు. చిరంజీవి 156 చిత్రాల్లో నటించారు. వందలాది పాటలకు అద్భుతమైన డ్యాన్స్ చేశారు. చిరంజీవి లాగా ఈ స్థాయిలో పాటలకు డ్యాన్స్ చేసిన నటుడు ఇంకొకరు లేరు. ఈ ఈవెంట్ కి సినీ ప్రముఖులు, చిరంజీవితో పనిచేసిన దర్శక నిర్మాతలు హాజరయ్యారు. గిన్నిస్ బుక్ ప్రతినిధులు, అమీర్ ఖాన్ కలసి కలసి చిరంజీవికి అవార్డు అందించారు. 

గతంలో టాలీవుడ్ నుంచి గిన్నిస్ రికార్డు అందుకున్న వారిలో నిర్మాత రామానాయుడు, బ్రహ్మానందం ఉన్నారు. చిరంజీవి ఏడు పదుల వయసు సమీపిస్తున్నా కూడా యువతతో పోటీ పడి డ్యాన్స్ చేస్తున్న సంగతి తెలిసిందే. మొత్తంగా చిరంజీవి నాట్యానికి గిన్నిస్ రికార్డే దిగి వచ్చింది అని చెప్పొచ్చు. 

చిరంజీవి తన 45 ఏళ్ళ కెరీర్ లో 537 పాటలకు డ్యాన్స్ చేశారు. ఇందులో 24 వేలకి పైగా డ్యాన్స్ మూమెంట్స్ ఉన్నాయి. మొత్తం చిరంజీవి 156 చిత్రాల్లో నటించారు. డ్యాన్స్ తో కోట్లాది మంది అభిమానులని మైమరపింపజేసిన మెగాస్టార్ కి గిన్నిస్ బుక్ రికార్డ్ దక్కడంతో ఫ్యాన్స్ సోషల్ మీడియాలో హోరెత్తించేలా పోస్ట్ లు పెడుతున్నారు. గిన్నిస్ రికార్డ్ ప్రదానం ఈవెంట్ లో చిరంజీవి, అమీర్ ఖాన్ ప్రసంగించారు. 

గిన్నిస్ రికార్డ్ ని తాను ఊహించలేదని చిరంజీవి అన్నారు. దీనికి కారణం తన దర్శక నిర్మాతలు, అభిమానులు అని చిరంజీవి తెలిపారు. డ్యాన్స్ పై తనకి ఉన్న ఆసక్తే గిన్నిస్ రికార్డ్ వచ్చేలా చేసింది అని చిరంజీవి తెలిపారు.ఈ ఈవెంట్ ఇంత గ్లామ‌ర్‌గా, మెమ‌ర‌బుల్‌గా ఉండ‌టానికి కార‌ణం నా మిత్రుడు ఆమీర్‌ఖాన్‌. ఒక చిన్న మెసేజ్‌, ఫోన్ కాల్‌తో ఆయ‌న ఇక్క‌డ‌కు వ‌చ్చినందుకు ధ‌న్య‌వాదాలు. నా చిన్న‌ప్పుడు మా చుట్టుప‌క్క‌ల ఉన్న‌వారిని ఎంట‌ర్‌టైన్ చేయ‌డానికి నేను డ్యాన్సులు చేసేవాడిని. అప్ప‌ట్లో సాయంత్రం అయ్యే స‌రికి వివిధ‌భార‌తిగానీ, రేడియో సిలోన్‌లోగానీ ర‌క‌ర‌కాల తెలుగు పాట‌ల‌కి నేను డ్యాన్సులు చేసేవాడిని. అప్ప‌ట్లో గ్రామ్‌ఫోన్‌లు, టేప్‌రికార్డులు లేవు. అందుకే ఈ రేడియోల్లో పాట‌లు రాగానే, `శంక‌ర్‌బాబుని పిల‌వండి.. డ్యాన్సులు వేస్తాడు అల‌రిస్తాడు.. అని అంద‌రూ అనేవారు. వారి ఉత్సాహం చూసి నేను మ‌రింత ప్రోత్స‌హం పొంది డ్యాన్సులు వేసేవాడిని.

ఆమీర్‌ఖాన్ మాట్లాడుతూ `ఇవాళ ఇక్క‌డ ఉండ‌టం ఆనందంగా, గౌర‌వంగా ఉంది. చిరంజీవి అభిమానుల‌ను క‌ల‌వ‌డం ఆనందంగా ఉంది. చిరంజీవిని అన్న‌య్య‌గా భావిస్తాను. ఆయ‌న‌కు నేను కూడా పెద్ద అభిమానిని. చిరంజీవిగారు నాకు ఫోన్ చేసి ఇక్క‌డికి పిల‌వాల‌నుకుంటున్న‌ట్టు చెప్పారు. ఆయ‌న నాతో అలా ఎందుకు  చెబుతున్నారో నాకు అర్థం కాలేదు. నేను ఇంత‌కు ముందు కూడా చాలా సార్లు ఆయ‌న‌కు ఒక‌టే చెప్పాను.. `సార్ మీకు నాకు ఆర్డ‌ర్ వేయండి. వ‌చ్చేస్తాను. మీరు న‌న్ను అడ‌గ‌కండి అని. చిరుగారు గిన్నిస్ విష‌యం  నాతో చెప్పిన‌ప్పుడు చాలా ఆనందంగా అనిపించింది. ఆయన చేసిన ప్ర‌తి పాట‌లోనూ ఆయ‌న మ‌న‌సు క‌నిపిస్తుంది. 

అదే విధంగా సినీ రాజకీయ ప్రముఖులు చిరంజీవి గిన్నిస్ రికార్డ్ అందుకోవడం పై సోషల్ మీడియాలో శుభాకాంక్షలు చెబుతున్నారు. ఏపీ ముఖ్యమంత్రి చంద్రబాబు, ఉప ముఖ్యమంత్రి పవన్ కళ్యాణ్, తెలంగాణ సీఎం రేవంత్ రెడ్డి, దర్శక ధీరుడు రాజమౌళి చిరంజీవిని ప్రశంసిస్తూ శుభాకాంక్షలు తెలిపారు. ఏపీ సీఎం చంద్రబాబు అయితే చిరంజీవి గిన్నిస్ రికార్డ్ సాధించడం తెలుగు జాతికి గర్వకారణం అని అభివర్ణించారు.