ఒక్కటి కాబోతున్న మెగా ఫ్యామిలీ హీరో, యాంకర్‌ మేఘన.. ఎంగేజ్‌మెంట్‌ ఫోటో వైరల్‌

మెగా ఫ్యామిలీ హీరో పవన్‌ తేజ్‌, యాంకర్‌, నటి మేఘన గత కొంత కాలంగా ప్రేమించుకుంటున్నారు. త్వరలో వీరిద్దరు ఒక్కటి కాబోతున్నారు. తాజాగా ఎంగేజ్‌మెంట్‌ జరిగింది.   

`ఈ కథలో పాత్రలన్నీ కల్పితమే` చిత్రంతో గుర్తింపు తెచ్చుకున్నారు మెగా హీరో పవన్‌ తేజ్‌ కొణిదెల(Pavan Tej Konidela). మెగా ఫ్యామిలీకి చెందిన పవన్‌ తేజ్‌ గత కొంత కాలంగా యాంకర్‌ మేఘన(Anchor Meghana)తో ప్రేమలో మునిగి తేలుతున్నారు. ఈ ఇద్దరు పెళ్లి బంధంలోకి అడుగుపెట్టాలని నిర్ణయించుకున్నారు. తాజాగా ఎంగేజ్‌మెంట్‌ చేసుకున్నారు. 

పవన్‌ తేజ్‌ కొణిదెల, మేఘన ఎంగేజ్‌మెంట్‌ (PavanTej Meghana Engagement) జరిగింది. బుధవారం వీరిద్దరి నిశ్చితార్థం జరిగినట్టు వెల్లడించారు. ఇన్‌స్టాగ్రామ్‌ ద్వారా ఈ ఇద్దరు ఈ విషయాన్ని వెల్లడించారు. ఈ సందర్భంగా ఎంగేజ్‌మెంట్‌ రింగ్‌ తొడుగుతున్న ఫోటోని పంచుకున్నారు. తమ ఆనందాన్ని షేర్ చేసుకున్నారు. 

ఎంగేజ్‌మెంట్ ఫోటోని పంచుకుంటూ `నేను ఆమెని ప్రేమిస్తున్నాను. ఇది అన్నింటికి ఆరంభం. ప్రేమంటే ఏంటో నాకు తెలిసిందంటే అది నీవల్లనే` అని పేర్కొన్నారు పవన్‌ తేజ కొణిదెల. ఈ సందర్బంగా లవ్‌ ఎమోజీలను పంచుకున్నారు. 

మరోవైపు మేఘన కూడా తన ప్రేమని వ్యక్తం చేసింది. `మీట్‌ మై ఫరెవర్‌. నేను నా ప్రేమని కనుగొన్నాను. ఎంగేజ్‌మెంట్ చేసుకున్నాను. ఇప్పుడు నా హృదయం తేలికైనది. నా చేయి బరువైనది. నా మొత్తం హృదయం, నా మొత్తం జీవితం నీకే` అంటూ పేర్కొంది మేఘన. ప్రస్తుతం వీరి ఎంగేజ్‌మెంట్‌ ఫోటో సామాజిక మాధ్యమాల్లో వైరల్‌ అవుతుంది.

కొణిదెల ఫ్యామిలీకి చెందిన పవన్ తేజకి చిరంజీవి బాబాయ్‌ వరుస అవుతారు. ఆయన `ఈ కథలో పాత్రలు కల్పితం` చిత్రంతో తెలుగులో హీరోగా ఆకట్టుకున్నారు. ఇందులో హీరోయిన్‌గా మేఘన నటించడం విశేషం. మరోవైపు ఈటీవీలో ప్రసారమయ్యే `రెచ్చిపోదాం బ్రదర్` కామెడీ షోకి యాంకర్‌గానూ పనిచేస్తుంది. 

మెగా ఫ్యామిలీ సపోర్ట్ తో ఇండస్ట్రీలోకి అడుగుపెట్టిన పవన్ తేజ నటుడిగా రాణించేందుకు ప్రయత్నిస్తున్నారు. ఆయన హీరోగా ఇప్పటికే లాంచ్‌ కాగా, హీరోగా నిలబడేందుకు గట్టి ప్రయత్నాలు చేస్తున్నారు. ప్రస్తుతం గీతా ఆర్ట్స్ లో ఓ సినిమా చేస్తున్నారు. ఇటీవలే అది ప్రారంభమైంది. ఇందులో శివానీ రాజశేఖర్‌ కథానాయికగా నటిస్తుంది. 

ఇదిలా ఉంటే పవన్‌ తేజ, మేఘన `ఈ కథలో పాత్ర కల్పితం` చిత్రంలో కలిసి నటించిన నేపథ్యంలో ఈ చిత్రం నుంచే వీరి మధ్య ప్రేమ చిగురించిందని తెలుస్తుంది. ఆ ప్రేమ బలపడి ఇప్పుడు పెళ్లి వరకు వెళ్లబోతుంది. ఇక ఈ సినిమా గతేడాది మార్చిలో విడుదలై మిశ్రమ స్పందన తెచ్చుకుంది.