శక్తి, షాడో అంటూ భోళా శంకర్ డైరెక్టర్ పై ట్రోలింగ్.. సెంచరీలు కొట్టే కోహ్లీ కూడా, హైపర్ ఆది కామెంట్స్ వైరల్

బుల్లితెరపై ప్రాసలు పంచ్ లతో నవ్వులు పూయించే హైపర్ ఆది సిల్వర్ స్క్రీన్ పై కూడా నెమ్మదిగా తన సత్తా చాటుతున్నాడు. ధమాకా చిత్రంలో హైపర్ ఆది కామెడీ టైమింగ్ కి మంచి స్పందన వచ్చింది. ప్రస్తుతం హైపర్ ఆది మెగాస్టార్ చిరంజీవి భోళా శంకర్ చిత్రంలో నటిస్తున్నాడు. 

రీసెంట్ గా ఈ చిత్రం నుంచి జామ్ జామ్ జామ్ జజ్జినక అనే సంగీత్ సాంగ్ విడుదలై యూట్యూబ్ లో వైరల్ గా మారింది. చిరంజీవి, తమన్నా, కీర్తి సురేష్ స్టెప్పులతో అదరగొడుతున్నారు. ఈ సాంగ్ తరహాలోనే థియేటర్స్ లో కూడా సెలెబ్రేషన్స్ ఖాయం అని ఫ్యాన్స్ అంటున్నారు. ఈ సాంగ్ లాంచ్ సందర్భంగా నిర్వహించిన ఈవెంట్ లో హైపర్ ఆది చేసిన కామెంట్స్ వైరల్ అవుతున్నాయి. 

జామ్ జామ్ జామ్ జజ్జనక అనే సాంగ్ తనకు ఎంతో ప్రత్యేకం అని హైపర్ ఆది తెలిపారు. ఈ సాంగ్ షూటింగ్ సమయంలోనే నా బర్త్ డే జరిగింది. మెగాస్టార్ చిరంజీవి గారి సమక్షంలో బర్త్ డే జరుపుకునే అవకాశం వచ్చింది. గ్యాంగ్ లీడర్ చిత్రంలోని చిరంజీవి యాటిట్యూడ్, ఇంద్ర లోని డ్యాన్సులు, శంకర్ దాదాలోని కామెడీ టైమింగ్, హిట్లర్ లోని సెంటిమెంట్ ఇలా అన్ని కలగలిపిన చిత్రంలాగా భోళా శంకర్ ఉండబోతోంది అని హైపర్ ఆది అన్నారు. 

ఈ చిత్ర దర్శకుడు మెహర్ రమేష్ గురించి మాట్లాడుతూ.. మెహర్ రమేష్ పేరు చెప్పగానే చాలా మంది శక్తి, షాడో అంటూ సోషల్ మీడియాలో ట్రోల్ చేస్తుంటారు. ఇండియన్ సినిమాకి పేరు తీసుకువచ్చిన బాహుబలి ప్రభాస్ కెరీర్ లో మోస్ట్ స్టైలిష్ మూవీ అంటే ముందుగా బిల్లా అని చెబుతారు. ఆ చిత్రాన్ని తెరకెక్కించింది ఈయనే. 

పునీత్ రాజ్ కుమార్ గారు మన మధ్యన లేరు. ఆయన చిత్రాల్లో బెస్ట్ మూవీస్ లో ఒకటైన వీరకన్నడిగ చిత్రాన్ని తెరకెక్కించింది కూడా మెహర్ రమేష్ గారే. ఫైల్యూర్ వల్లే ట్రోల్ చేయాల్సి వస్తే ఈ ప్రపంచంలో ప్రతి ఒక్కరిని ట్రోల్ చేయాలి. ఫెయిల్యూర్ లేని మనిషి అంటూ లేరు. దేనికైనా టైం రావాలి. మనం భోజనం చేసే సమయంలో ఢీ, వెంకీ, దుబాయ్ శీను, బాద్షా లాంటి చిత్రాల కామెడీ పెట్టుకుని ఎంజాయ్ చేస్తుంటాం. 

ఆ చిత్రాలని తెరకెక్కించిన శ్రీను వైట్ల గారి నుంచి సినిమా వచ్చి చాలా రోజులు అవుతోంది. అంత మాత్రాన శ్రీను వైట్ల గారి స్థాయిని తగ్గించలేం. దేనికైనా సమయం అంటూ రావాలి. సెంచరీలు మీద సెంచరీలు కొట్టే కోహ్లీ ఈ మధ్యన ఒక్క సెంచరీ కొట్టడానికి చాలా సమయం ఎదురుచూశాడు. మెహర్ రమేష్ గారి మీద వచ్చిన ట్రోల్స్ అన్నీ భోళా శంకర్ చిత్రానికి ఆశీర్వాదాలుగా మారుతాయి అని హైపర్ ఆది అన్నారు.