Disha Patani: ముంబై ఫ్లాట్‌ను అద్దెకిచ్చిన దిశా.. నెల రెంట్ తెలిస్తే దిమ్మ తిరుగుద్ది

బాలీవుడ్ నటి దిశా పటానీ ముంబైలోని తన లగ్జరీ అపార్ట్‌మెంట్‌ను అద్దెకు ఇచ్చారు. రెండేళ్ల అగ్రిమెంట్‌తో దాదాపు రూ. 71 లక్షల ఆదాయం పొందనున్నారు. పూర్తి వివరాలు ఇక్కడ ఉన్నాయి.

దిశా పటానీ

దిశా పటానీ ముంబైలోని ఖార్ వెస్ట్ ప్రాంతంలో ఉన్న తన ప్రీమియం అపార్ట్‌మెంట్‌ను అద్దెకు ఇచ్చారు. రుస్తోమ్‌జీ పారామౌంట్‌లోని ఈ ఫ్లాట్‌కు సంబంధించిన లీవ్-అండ్-లైసెన్స్ అగ్రిమెంట్‌ జూన్ 1, 2026న అధికారికంగా రిజిస్టర్ అయింది. ఈ ఒప్పందం రెండేళ్లపాటు చెల్లుబాటులో ఉంటుంది.

ఈ లగ్జరీ టవర్‌లోని పై అంతస్తులో ఉన్న విశాలమైన అపార్ట్‌మెంట్‌ను కమలాబెన్ మంగళ్‌భాయ్ గుజ్జర్ అనే వ్యక్తి లీజుకు తీసుకున్నారు. ఒప్పందం ప్రకారం, నెలవారీ అద్దె రూ. 2.85 లక్షలతో ప్రారంభమవుతుంది.

దాదాపు రూ. 71 లక్షల ఆదాయం

ఒప్పందం ప్రకారం, అద్దెకు ఉంటున్న వారు మూడు నెలల అద్దెకు సమానమైన రూ. 8.55 లక్షలను సెక్యూరిటీ డిపాజిట్‌గా చెల్లించారు. మొదటి ఏడాది పూర్తయిన తర్వాత అద్దెపై 5% పెరుగుదల కూడా ఒప్పందంలో ఉంది.

రెండో ఏడాదిలో నెలవారీ అద్దె సుమారు రూ. 2.99 లక్షలకు పెరుగుతుంది. దీంతో 24 నెలల కాలంలో ఈ లీజు ద్వారా దిశాకు దాదాపు రూ. 71 లక్షల ఆదాయం వస్తుంది. ఈ లావాదేవీపై నటి గానీ, అద్దెదారు గానీ బహిరంగంగా స్పందించలేదు.

సెలబ్రిటీల జాబితాలో దిశా కూడా..

ముంబైలోని లాభదాయకమైన అద్దె మార్కెట్ ద్వారా ఆదాయం పొందుతున్న బాలీవుడ్ సెలబ్రిటీల జాబితాలో దిశా కూడా చేరారు. అమితాబ్ బచ్చన్, కార్తీక్ ఆర్యన్, షాహిద్ కపూర్, సల్మాన్ ఖాన్ వంటి స్టార్లు కూడా తమ నివాస, వాణిజ్య ఆస్తులను అద్దెకు ఇచ్చి వార్తల్లో నిలిచారు.

ఈ అపార్ట్‌మెంట్ రుస్తోమ్‌జీ గ్రూప్ నిర్మించిన లగ్జరీ ప్రాజెక్ట్ 'రుస్తోమ్‌జీ పారామౌంట్‌'లో ఉంది. ఈ ప్రాజెక్ట్‌లో ప్రీమియం 3BHK, 4BHK నివాసాలతో పాటు మినీ థియేటర్, స్పా, సెలూన్, బాంక్వెట్ హాల్, బిజినెస్ సెంటర్, స్కై లాంజ్ వంటి సౌకర్యాలు ఉన్నాయి.

ఈ ప్రాపర్టీ చాలా ఏళ్లుగా పలువురు సెలబ్రిటీలను ఆకర్షిస్తోంది. 2021లో నటి రాణి ముఖర్జీ కూడా ఇదే కాంప్లెక్స్‌లో ఒక అపార్ట్‌మెంట్ కొనుగోలు చేశారు. దీంతో ఈ ప్రాజెక్ట్‌కు బాలీవుడ్ ప్రముఖుల అడ్రస్‌గా మరింత పేరు వచ్చింది.