సైఫ్ పై భారీ కుట్ర ? దాడి చేసింది నిజంగా దొంగా లేక ఇంట్లో మనిషా.. ఆటోలో ఎందుకు తీసుకెళ్లారు

బాలీవుడ్ నటుడు సైఫ్ అలీ ఖాన్ దాడి సంఘటనలో సంచలన విషయాలు వెలుగులోకి వస్తున్నాయి. సైఫ్ దాడి వెనుక కుట్ర దాగి ఉందా లేక దొంగతనం చేసేందుకు వచ్చిన దుండగుడు తప్పించుకునేందుకు దాడి చేశాడా అనే కోణంలో పోలీసులు దర్యాప్తు ప్రారంభించారు. సైఫ్ అలీ ఖాన్ శరీరంలో 6 చోట్ల కత్తి పోట్లు పడ్డాయి. 

saif ali khan

ప్రస్తుతం సైఫ్ అలీ ఖాన్ ముంబైలోని లీలావతి ఆసుపత్రిలో చికిత్స పొందుతున్నారు. సైఫ్ కి వైద్యులు శస్త్ర చికిత్స నిర్వహించారు. ఆపరేషన్ విజయవంతం అయినట్లు తెలుస్తోంది. సైఫ్ అలీ ఖాన్ హెల్త్ బులిటెన్ విడుదల చేస్తూ ఆయన ప్రాణాలకు ఎలాంటి ప్రమాదం లేదని అవుట్ ఆఫ్ డేంజర్ అని వైద్యులు ప్రకటించారు. అయితే కొన్ని రోజులు ఐసియులో అబ్జర్వేషన్ లో ఉంచాలని వైద్యులు తెలిపారు. 

ఇక సైఫ్ అలీ ఖాన్ దాడికి గురైన సంఘటన పరిశీలిస్తే అనేక అనుమానాలు తలెత్తుతున్నాయి. దాడి జరిగింది గురువారం తెల్లవారు జామున 2.30 గంటలకు. రాత్రి 12.30 గంటల తర్వాత ఇంట్లోకి ఎవరూ ప్రవేశించలేదని సీసీ టివి పరిశీలించిన పోలీసులు తేల్చారు. అంటే ప్లాన్ ప్రకారమే దుండగుడు అంతకంటే ముందుగానే సైఫ్ ఇంట్లోకి ప్రవేశించి దాక్కున్నాడు. నిజంగా దొంగతనం చేయడానికి వెళ్లినవాడు అంత టైం ఇంట్లో ఏం చేస్తాడు అనే అనుమానాలు తలెత్తుతున్నాయి. 

సైఫ్ అలీ ఖాన్ కత్తిపోట్లతో అరుస్తున్నప్పటికీ కుటుంబ సభ్యులు ఎవరూ రాలేదట. అదే విధంగా సెక్యూరిటీ గార్డులు ఏమయ్యారో కూడా అర్థం కాని పరిస్థితి నెలకొంది. దీనితో తెలిసిన వాళ్లే సైఫ్ పై దాడికి కుట్ర చేశారా అనే అనుమానాలు వినిపిస్తున్నాయి. సైఫ్ శత్రువులు ఇంట్లో వాళ్ళతో చేతులు కలిపి ఈ కుట్రకి ప్లాన్ చేసినట్లు కూడా ప్రచారం జరుగుతోంది. మరి కొన్ని వార్తల ప్రకారం ఆ సమయంలో కరీనా కపూర్ పార్టీలో ఉన్నారట. 

సైఫ్ అలీ ఖాన్ ఉండేది హై సెక్యూరిటీ కలిగిన ఏరియా, పైగా 10వ ఫ్లోర్ లో ఉంటున్నారు. దొంగ తనం చేసేందుకు వెళ్లిన వ్యక్తి అంత దూరం సెక్యూరిటీని తప్పించుకుని వెళ్లడం సాధ్యం అవుతుందా అనే ప్రశ్నలు కూడా తలెత్తుతున్నాయి.  ఇదిలా ఉండగా కత్తిపోట్లతో రక్తమోడుతున్న తండ్రిని సైఫ్ పెద్ద కొడుకు ( మొదటి భార్య అమృత సింగ్ సంతానం) ఇబ్రహీం అలీ ఖాన్ ఆటోలో ఆసుపత్రికి తరలించాడట. ఈ విషయాన్ని పోలీసులు తెలిపారు. 3.30 గంటలకు ఇబ్రహీం తండ్రిని ఆటోలో ఆసుపత్రికి తీసుకుని వెళ్ళాడట. ఆ సమయంలో డ్రైవర్ అందుబాటులో లేకపోవడంతో ఆటోలో తీసుకుని వెళ్లినట్లు పోలీసులు చెబుతున్నారు.