Chiranjeevi Review: రామ్‌ చరణ్‌ పెద్ది సినిమాపై చిరంజీవి రివ్యూ.. తండ్రిగా గర్వపడే విషయం బయటపెట్టిన మెగాస్టార్‌

రామ్‌ చరణ్‌ నటించిన `పెద్ది` సినిమా ఈ గురువారం విడుదలై థియేటర్లలో సందడి చేస్తోంది. ఈ క్రమంలో ఈ మూవీపై చిరంజీవి తనదైన రివ్యూ ఇచ్చారు. తండ్రిగా గర్వపడుతున్నాడట. 

రామ్‌ చరణ్‌ పెద్దిపై చిరంజీవి రియాక్షన్‌

రామ్‌ చరణ్‌ హీరోగా నటించిన `పెద్ది` సినిమా భారీ అంచనాల మధ్య ఈ రోజు గురువారం విడుదలైంది. అయితే బుధవారం రాత్రి నుంచే ప్రీమియర్స్ ప్రదర్శించారు. దీనికి మిశ్రమ స్పందన లభించింది. ముఖ్యంగా రామ్‌ చరణ్‌ నటనపై ప్రశంసలు దక్కుతున్నాయి. అవార్డుల ఫిల్మ్ అంటూ అంతా ప్రశంసిస్తున్నారు. కథ, ఆర్టిస్ట్ ల పర్‌ఫెర్మెన్స్ గురించి అంతా మాట్లాడుకుంటున్నారు. ఈ క్రమంలో ఈ మూవీపై తాజాగా మెగాస్టార్‌ చిరంజీవి స్పందించారు. తన తనయుడిని చూసి గర్వంగా ఉందని చెప్పారు.

పెద్దిపై చిరంజీవి రివ్యూ

`పెద్ది` మూవీపై చిరంజీవి తనదైన స్టయిల్‌లో రివ్యూ ఇచ్చాడు. కొడుకుని చూసి గర్వంగా ఉందని చెప్పి, మిగిలిన అందరు కాస్ట్, క్రూ గురించి ప్రత్యేకంగా కామెంట్‌ చేశారు. అందరిపై ప్రశంసలు కురిపించారు. తాను షూటింగ్‌ నిమిత్తం పొల్లాచిలో ఉన్నారట. కానీ తన మనసంతా పెద్ది మూవీ దగ్గరే ఉందని తెలిపారు చిరంజీవి.

రామ్‌ చరణ్‌ నటన చూసి గర్వంగా ఉందన్నారు చిరంజీవి

ఈ సినిమా కోసం రామ్‌ చరణ్‌ గత రెండేళ్లు పడ్డ కష్టం, చూపించిన శ్రద్ధాశక్తులు అన్నీ తాను దగ్గరుండి చూశానని చెప్పారు. ఈ రోజు ప్రేక్షకుల ప్రేమ, ప్రశంసలు చూస్తుంటే ఒక తండ్రిగా మాత్రమే కాదు, ఒక నటుడిగా కూడా తనకు ఎంతో గర్వంగా ఉందన్నారు చిరంజీవి. `పెద్ది` పాత్రలో పూర్తిగా లీనం కావడానికి తను అహర్నిశలు చేసిన కృషి పట్టుదల, నిజాయితీ ప్రతి సన్నివేశంలో స్పష్టంగా కనిపిస్తున్నాయని, ఆ కష్టానికి దక్కిన ప్రతిఫలమే ఈ విజయమని చెప్పారు చిరు. రామ్‌ చరణ్‌ నటనని ఆకాశానికి ఎత్తేశారు.

దర్శకుడిపై చిరు ప్రశంసలు

ఇక మిగిలిన వారి గురించి చెబుతూ, దర్శకుడు బుచ్చిబాబుపై ప్రశంసలు కురిపించారు. ఇలాంటి అద్భుతమైన కథని రాసి, అంతే అద్భుతంగా తెరపై ఆవిష్కరించిన దర్శకుడు బుచ్చిబాబుకి ప్రత్యేకంగా అభినందనలు తెలిపారు. అలాగే తన తొలి చిత్రాన్నే ఇంత భారీ స్థాయిలో, రాజీ లేకుండా నిర్మించిన నిర్మాత వెంకట్‌ సతీష్‌ కిలారుకి శుభాకాంక్షలు తెలిపారు. ఇలాంటి భారీ చిత్రంలో నటించిన తన మిత్రుడు శివరాజ్‌ కుమార్‌కి, అప్పలసూరిగా పాత్రలో జీవించిన జగపతిబాబుకి అభినందనలు తెలిపారు.  

తెలుగు సినిమాకి గర్వకారణం పెద్ది

రెహ్మాన్‌ గురించి చెబుతూ, అద్భుతమైన పాటలు అందించారని, హృదయాన్ని కదిలించిన నేపథ్య సంగీతాన్ని అందించారని రెహ్మాన్‌ని అభినందించారు. తన కెమెరాతో ప్రతి ఫ్రేమ్‌ని అద్భుతంగా మలిచాడని రత్నవేలుకి, అలాగే అమోఘమైన ఆర్ట్ వర్క్ అందించారని అవినాష్‌ కొల్లాని, ఎడిటర్‌ నవీన్‌ నూలి తన నైపుణ్యంతో సినిమాని మరో స్థాయికి తీసుకెళ్లాడని అభినందించారు. ఈ సినిమా విజయంలో భాగమైన జాన్వీ కపూర్‌, దివ్యేందు, ఇతర నటీనటులు, సాంకేతిక నిపుణులు, అలాగే వృద్ధి సినిమాస్‌, మైత్రీ మూవీ మేకర్స్, సుకుమార్‌ రైటింగ్స్ సంస్థలకు ఆయన అభినందనలు తెలిపారు. పెద్ది సాధించిన ఈ ఘన విజయం తెలుగు సినిమాకి గర్వంగా నిలవాలని, మరెన్నో మైలురాళ్లు అధిరోహించాలని మనస్ఫూర్తిగా కోరుకుంటున్నాను అని తెలిపారు చిరంజీవి. పెద్ది సినిమాపై ఆయన ఇచ్చిన రివ్యూ వైరల్‌గా మారింది.

Congratulations to our #PEDDI, my dear @AlwaysRamCharan and the entire cast & crew on this incredible blockbuster! 💐💐💐

నేను షూటింగ్ నిమిత్తం పొల్లాచిలో ఉన్నా కూడా నా మనసంతా “పెద్ది” దగ్గరే ఉంది.

గత రెండేళ్లగా ఈ సినిమా కోసం చరణ్ పడ్డ కష్టం, చూపించిన శ్రద్ధాశక్తులు అన్నీ… pic.twitter.com/gZwN99aERV

— Chiranjeevi Konidela (@KChiruTweets) June 4, 2026