హీరో నాగ చైతన్య బాలయ్య అల్లుడు కావాల్సిందట. ఇరు కుటుంబాల సభ్యులు ఒకే అనుకున్నాక సంబంధం చెడిపోయిందట. దానికి కారణం ఏమిటో ఓ సందర్భంలో నాగార్జున స్వయంగా తెలియజేశారు.
వెండితెరను ఏలిన లెజెండ్స్ ఎన్టీఆర్, ఏఎన్నార్ నటవారసులుగా ఎంట్రీ ఇచ్చిన నాగార్జున, బాలకృష్ణ తండ్రులకు తగ్గ తనయులు అనిపించుకున్నారు. మూడో తరం స్టార్స్ గా వాళ్ళు ఎదిగారు. ఎన్టీఆర్, ఏఎన్నార్ కాలం నుండి ఈ రెండు కుటుంబాల మధ్య సాన్నిహిత్యం ఉండేది. ఒకరింటికి మరొకరు రావడం పోవడం, వేడుకలకు హాజరు కావడం చేసేవారు.
ఎన్టీఆర్ రాజకీయాల్లోకి వచ్చాక ఎన్టీఆర్ తో ఏఎన్నార్ కి విబేధాలు వచ్చాయి. ఓ మీటింగ్ లో ఏఎన్నార్ చేసిన నెగిటివ్ కామెంట్ తన రాజకీయ ప్రవేశం గురించే అని భావించిన ఎన్టీఆర్ దూరం మైంటైన్ చేశారు. ఈ విషయాన్ని నాగేశ్వరరావు స్వయంగా చెప్పడం విశేషం. తర్వాత ఆ మనస్పర్థలు వీడి, ఎప్పటిలా కలిసిపోయారు.
ఇక బాలయ్య, నాగార్జున కూడా మంచి మిత్రులు. అత్యంత సన్నిహితంగా ఉంటారు. ఈ క్రమంలో వియ్యంకులు అవ్వాలనుకున్నారట. నాగ్ పెద్ద కొడుకు నాగ చైతన్యతో బాలయ్య చిన్న కుమార్తె తేజస్విని వివాహం చేయాలని భావించారట. ఈ సంబంధం పట్ల నాగార్జున, బాలయ్య చాలా సంతోషం వ్యక్తం చేశారట. ఇరు కుటుంబ సభ్యులు ఒక నిర్ణయానికి వచ్చాక నాగ చైతన్య షాక్ ఇచ్చాడట.
అప్పటికే నాగ చైతన్య హీరోయిన్ సమంతను ప్రేమిస్తున్నాడు. ఆమెతో పీకల్లోతు ప్రేమలో కూరుకుపోయిన నాగ చైతన్య బాలయ్య కూతురిని చేసుకోవడం కుదరదు అన్నాడట. తండ్రి నాగార్జునతో ఆయన ఇదే చెప్పారట. సమంతను మాత్రమే వివాహం చేసుకుంటాను అన్నారట. ఇక చేసేది లేక చైతన్య, తేజస్విని పెళ్లి నిర్ణయం పెద్దలు వెనక్కి తీసుకున్నారట.
ఒక వేళ నాగ చైతన్య సమంతను ప్రేమించకుండా ఉంటే బాలయ్య ఇంటి అల్లుడు అయ్యేవాడు. అంటారు కదా.. పెళ్లిళ్లు స్వర్గంలో నిర్ణయించబడతాయని. అనంతరం బాలయ్య తేజస్విని వైజాగ్ కి చెందిన విద్యాసంస్థల అధినేత భరత్ కి ఇచ్చి వివాహం చేశారు. 2013లో వారి వివాహం జరిగింది.
సమంత మొదటి చిత్రం నాగ చైతన్య రెండో చిత్రం ఏమాయ చేశావే. ఈ చిత్ర షూటింగ్ టైం లో వాళ్ళ మధ్య ప్రేమ చిగురించింది. దాదాపు 8 ఏళ్ళు ప్రేమించుకున్న ఈ జంట 2018లో వివాహం చేసుకున్నారు.పెళ్ళైన నాలుగేళ్ళకు విడిపోయారు. 2021 అక్టోబర్ నెలలో సమంత, నాగ చైతన్య విడాకుల ప్రకటన చేశారు. 35 ఏళ్ల నాగ చైతన్య రెండో వివాహం ఎప్పుడు చేసుకుంటారో చూడాలి.