టాలీవుడ్ లో సుదీర్ఘ కెరీర్ కలిగి ఉన్నారు అన్నపూర్ణ. ఆమెను అందరూ అన్నపూర్ణమ్మ అంటారు. అమ్మ పాత్రలకు ఆమె అంతగా ఫేమస్. కాగా కెరీర్లో ఆమెకు ఎదురైన క్యాస్టింగ్ కౌచ్ అనుభవాలు ఓ ఇంటర్వ్యూలో వెల్లడించారు. కీలక ఆరోపణలు చేశారు.
అమ్మ పాత్ర అంటే మొదట గుర్తొచ్చే పేరు అన్నపూర్ణ. సుదీర్ఘ కెరీర్లో వందల చిత్రాల్లో ఆమె క్యారెక్టర్ రోల్స్ చేశారు. ఆమె అమ్మగా చేయని హీరో ఉండరు. తనకంటే వయసులో పెద్దవాళ్ళైన కృష్ణ, శోభన్ బాబు వంటి నటులకు కూడా ఆమె అమ్మగా చేయడం విశేషం.
నాలుగు దశాబ్దాల కెరీర్లో ఆమె చిత్ర పరిశ్రమను వడపోశారు. రకరకాల మనుషులను చూశారు. కొన్నాళ్లుగా ఆమె పలు యూట్యూబ్ ఛానల్స్ కి ఇంటర్వ్యూలు ఇస్తున్నారు. ఈ క్రమంలో క్యాస్టింగ్ కౌచ్ పై ఆమె కీలక ఆరోపణలు చేశారు. టాలీవుడ్ లో క్యాస్టింగ్ కౌచ్ ఉందని, ఒకప్పుడు ఇంకా ఎక్కువ ఉండేదని ఆమె కుండబద్దలు కొట్టారు.
ఓ సందర్భంలో అన్నపూర్ణ మాట్లాడుతూ... తప్పు అనేది ఒకరివైపే ఉండదు. ఇద్దరి మధ్య ఉంటుంది. క్యాస్టింగ్ కౌచ్ అన్ని రంగాల్లో ఉంటుంది. కుటుంబ పరువు, మర్యాద కోసం మహిళలు తెలివిగా తప్పించుకుంటున్నారు. అవకాశాల కోసం ప్రయత్నం చేసే వాళ్లకు ఈ లైంగిక వేధింపులు తప్పవు.. అని అన్నారు.
అలాగే తనకు ఎదురైన అనుభవాలు అన్నపూర్ణ వెల్లడించారు. అప్పట్లో అవకాశాలు ఇవ్వాలంటే వేధించేవాళ్ళు. ఆఫర్ ఇస్తే మాకేంటి అనేవారు. అందుకే నేను 20 ఏళ్లకే పెళ్లి చేసుకుని, 25 ఏళ్లకు అమ్మ పాత్రలు చేయడం స్టార్ట్ చేశాను. మదర్ రోల్స్ చేయడం మొదలెట్టాక లైంగిక వేధింపులు తగ్గాయి.
షూటింగ్స్ కోసం ఎక్కడెక్కడికో తిరిగేవాళ్ళం. అర్థరాత్రి కూడా కక్కుర్తి గాళ్ళు మా రూమ్ తలుపులు కొట్టేవారు. ఎయిడ్స్ మహమ్మారి వచ్చాక లైంగిక వేధింపులు తగ్గాయి. ఎవరికి ఎయిడ్స్ ఉందో అని భయపడి లైంగికంగా వేధించడం మానేశారు. ఎయిడ్స్ వచ్చి మంచి పని అయ్యింది. ఒక్కోసారి చెడు వలన కూడా మంచి జరుగుతుంది... అని అన్నారు.