విజయ్ కోసం నిర్మాతగా మారుతున్న ఎమ్మెస్ ధోనీ... ‘తలా’ సొంత బ్యానర్‌లో ‘తలపతి’...

భారత మాజీ కెప్టెన్ మహేంద్ర సింగ్ ధోనీ, ఐపీఎల్‌లో తప్ప మిగిలిన సమయాల్లో బ్యాటు కూడా పట్టడం లేదు. జార్ఖండ్‌లో 20 ఎకరాల్లో సేంద్రీయ వ్యవసాయం చేస్తూ, తాను స్వయంగా పండించిన ఉత్పత్తులను దేశవిదేశాల్లో అమ్ముతున్న మాహీ, ఇప్పుడు సినీ రంగంలోకి ఎంట్రీ ఇవ్వబోతున్నాడా? అవుననే అంటున్నారు ‘తలా’ ఫ్యాన్స్...

టీమిండియా మాజీ కెప్టెన్ మహేంద్ర సింగ్ ధోనీకి ప్రపంచవ్యాప్తంగా ఉన్న ఫ్యాన్స్ ఉన్నారు. అయితే తమిళనాడులో మాత్రం మాహీకి వీరాభిమానులు, భక్తులు ఉంటారు. తమ ఇంటినే మాహీ గుడిగా మార్చిన వీరాభిమానులు, తమిళనాడులోనే కనిపిస్తారు. జార్ఖండ్‌లో పుట్టి పెరిగిన ఎమ్మెస్ ధోనీకి, తమిళనాడులో ఇంత ఫాలోయింగ్, పాపులారిటీ రావడానికి కారణం ఐపీఎల్...

చెన్నై సూపర్ కింగ్స్ కెప్టెన్‌గా 12 సీజన్లు వ్యవహరించిన మహేంద్ర సింగ్ ధోనీ, నాలుగు సార్లు సీఎస్‌కేని టైటిల్ ఛాంపియన్‌గా నిలిపాడు. రికార్డు స్థాయిలో 10 సార్లు ప్లేఆఫ్స్ చేరిన సీఎస్‌కే, 8 సార్లు ఫైనల్ ఆడింది... కెప్టెన్‌గా, బ్యాట్స్‌మెన్‌గా సీఎస్‌కేకి ఘన విజయాలు అందించిన మాహీ, తమిళనాడు జనాలకు బాగా దగ్గరయ్యాడు.

ఈ కారణంగానే 2020లో, 2021లో.. ఆఖరికి 2022లో రిటైర్మెంట్ వార్తలు వచ్చినప్పుడు కూడా చెన్నైలో... సొంత గ్రౌండ్‌లో, తమిళనాడు జనాల మధ్య మ్యాచ్ ఆడిన తర్వాతే ఐపీఎల్ నుంచి తప్పుకుంటానని కామెంట్ చేశాడు మహేంద్ర సింగ్ ధోనీ...

తమిళతంబీలకు చేరువైన ఎమ్మెస్ ధోనీ, త్వరలో సినీ రంగంలోకి ఎంట్రీ ఇవ్వబోతున్నాడని, తన బ్యానర్‌లో మొట్టమొదటి సినిమాయే ‘తలపతి’ విజయ్‌తో నిర్మించబోతున్నాడని ఓ సూపర్ వార్త సోషల్ మీడియాలో తెగ వైరల్ అవుతోంది...

కొన్నేళ్లుగా ఏడాదికి ఓ సినిమా రిలీజ్ చేస్తున్న విజయ్, 2018లో ‘సర్కార్’, 2019లో ‘బిజిల్’ (తెలుగులో విజిల్) రిలీజ్ చేశాడు. కరోనా కారణంగా 2020లో విజయ్ సినిమాలేవీ రిలీజ్ కాలేదు...

గత ఏడాది ‘మాస్టర్’ సినిమా రిలీజ్ చేసిన విజయ్, ఈ ఏడాది ‘బీస్ట్’తో పలకరించాడు. ఈ రెండు సినిమాలకు నెగిటివ్ రివ్యూలు వచ్చినా బాక్సాఫీస్ దగ్గర మంచి వసూళ్లు రాబట్టాయి. ప్రస్తుతం తెలుగు డైరెక్టర్ వంశీ పైడిపల్లి దర్శకత్వంలో ‘వారిసు’ (తెలుగులో వారసుడు) సినిమా చేస్తున్నాడు విజయ్...

ఈ సినిమా తర్వాత మహేంద్ర సింగ్ ధోనీ నిర్మాతగా, మాహీ బ్యానర్‌లో ఓ బడా టాప్ డైరెక్టర్‌తో కలిసి సినిమా చేయబోతున్నాడని వార్తలు వస్తున్నాయి. ఈ సినిమా కోసం స్వయంగా ధోనీయే విజయ్‌కి ఫోన్ చేసి ఒప్పించాడని అంటున్నారు...

ఇంతకుముందు కూడా మాహీ కూడా ఇలాంటి వార్తలు చాలానే వచ్చాయి. నయనతార లీడ్ రోల్‌లో ఓ ఫీమేల్ ఓరియెంటెడ్ మూవీని మాహీని నిర్మించబోతున్నాడని వార్తలు వినిపించాయి. అయితే అది కార్యరూపం దాల్చలేదు. మరి ‘తలపతి’తో ‘తలా’ సినిమా అయినా పుకారుగానే మిగిలిపోతుందా? నిజమవుతుందా? అనేది తేలాలంటే కొన్ని రోజులు ఆగాల్సిందే...