WTC Finals 2023: ఈనెల 7 నుంచి లండన్ లోని ఓవల్ వేదికగా ఐసీసీ నిర్వహించే డబ్ల్యూటీసీ ఫైనల్ జరుగనుంది. ఈ నేపథ్యంలో ఈ రెండేండ్ల కాలానికి అత్యధిక వికెట్లు తీసిన వీరులెవరంటే..!
ఐసీసీ ప్రతి రెండేండ్లకోసారి నిర్వహించే వరల్డ్ టెస్ట్ ఛాంపియన్‌షిప్ (డబ్ల్యూటీసీ) ఫైనల్ ఈనెల 7 నుంచి 11 వరకూ ‘ది ఓవల్’ వేదికగా సాగనుంది. ఈ నేపథ్యంలో 2021 - 2023 మధ్య కాలానికి అత్యధిక వికెట్లు తీసిన టాప్-10 బౌలర్లు ఎవరో ఇక్కడ చూద్దాం.
జస్ప్రీత్ బుమ్రా : టీమిండియా పేస్ గుర్రం జస్ప్రీత్ బుమ్రా డబ్ల్యూటీసీ 2021-2023 కాలానికి గాను 10 టెస్టులు ఆడాడు. పది మ్యాచ్ లలో 19.76 సగటుతో 45 వికెట్లు పడగొట్టాడు. అయితే గాయం కారణంగా బుమ్రా తప్పుకోవడంతో అతడి వికెట్ల సంఖ్య తగ్గింది.
జాక్ లీచ్ : ఇంగ్లాండ్ లెఫ్టార్మ్ స్పిన్నర్ జాక్ లీచ్.. 16 టెస్టులు ఆడి 48 వికెట్లు పడగొట్టాడు. స్వదేశంతో పాటు పాకిస్తాన్ లో ఆడటం లీచ్ కు కలిసొచ్చింది.
టిమ్ సౌథీ : న్యూజిలాండ్ వెటరన్ పేసర్ టిమ్ సౌథీ 13 టెస్టులలో 32.11 సగటుతో 50 వికెట్లు పడగొట్టాడు. ఇందులో మూడు సార్లు ఐదు వికెట్ల ఘనత సాధించడం గమనార్హం.
మిచెల్ స్టార్క్ : ఆస్ట్రేలియా స్టార్ పేసర్ మిచెల్ స్టార్క్.. 16 టెస్టులు ఆడి 51 వికెట్లు తీశాడు. గతేడాది స్వదేశంలో ఇంగ్లాండ్ తో జరిగిన యాషెస్ సిరీస్ లో స్టార్క్ దెబ్బకు ఇంగ్లాండ్ విలవిల్లాడింది.
పాట్ కమిన్స్ : ఆస్ట్రేలియా కెప్టెన్ పాట్ కమిన్స్ కూడా ఈ ఏడాది 15 టెస్టులు ఆడి 53 వికెట్లు పడగొట్టాడు. యాషెస్ తో పాటు దక్షిణాఫ్రికాతో జరిగిన మూడు టెస్టులలో కమిన్స్.. తన బౌలింగ్ లో పదును చూపించాడు.
ఓలి రాబిన్సన్ : ఇంగ్లాండ్ పేసర్ ఓలి రాబిన్సన్.. ఈ రెండేండ్ల కాలంలో 13 టెస్టులే ఆడి 53 వికెట్లు సొంతం చేసుకున్నాడు. రాబిన్సన్ గత రెండేండ్లలో ఇంగ్లాండ్ టెస్టు విజయాలలో కీలక భూమిక పోషిస్తున్నాడు.
జేమ్స్ అండర్సన్ : ఇంగ్లాండ్ వెటరన్ జేమ్స్ అండర్సన్ ఈ సీజన్ లో 15 టెస్టులు ఆడి 58 వికోట్లు పడగొట్టాడు. 40 ఏండ్లు దాటినా అండర్సన్ ఇంకా యువ పేసర్లతో పోటీ పడుతూ బౌలింగ్ లో రాణిస్తున్నాడు.
రవిచంద్రన్ అశ్విన్ : టీమిండియా ఆఫ్ స్పిన్నర్ రవిచంద్రన్ అశ్విన్ ఈ జాబితాలో టాప్ - 3లో ఉన్నాడు. అశ్విన్.. 2021-2023లో 13 టెస్టులు ఆడి 61 వికెట్లు సాధించాడు.
కగిసొ రబాడా : సౌతాఫ్రికా పేస్ సంచలనం కగిసొ రబాడా ఈ సీజన్ లో 19 టెస్టులు ఆడి ఏకంగా 67 వికెట్లు సాధించి రెండో స్థానంలో నిలిచాడు. ఆస్ట్రేలియాపై ఈ ఏడాది ఆరంభంలో ఆడిన మూడు మ్యాచ్ ల టెస్టు సిరీస్ లో రబాడా రఫ్ఫాడించాడు.
నాథన్ లియాన్ : ఈ ఆసీస్ వెటరన్ ఆఫ్ స్పిన్నర్ డబ్ల్యూటీసీ 221- 2023 సైకిల్ లో అత్యధిక వికెట్లు తీసిన బౌలర్ గా నిలిచాడు. ఈ సీజన్ లో లియాన్.. 19 టెస్టులలో ఏకంగా 83 వికెట్లు పడగొట్టి ఎవరికీ అందనంత ఎత్తులో నిలిచాడు.