Deepak Chahar: టీమిండియాకు భారీ షాక్.. 4 నెలల దాకా స్టార్ ఆల్ రౌండర్ దూరం.. టీ20 ప్రపంచకప్ కు డౌటే..

Deepak Chahar Injury: యువ ఆల్ రౌండర్ దీపక్ చాహర్  కు తగిలిన గాయం కారణంగా అతడు నాలుగు నెలల పాటు ఫీల్డ్ లోకి వచ్చే పరిస్థితి లేదని ఎన్సీఏ వర్గాలు తెలిపాయి. 

ఐపీఎల్  వేలంలో రూ. 14 కోట్లు పెట్టి కొనుగోలు చేసిన దీపక్ చాహర్.. గాయం కారణంగా  ఈ సీజన్  తొలి భాగంలో తప్పుకున్నా తర్వాత అందుబాటులో ఉంటాడని భావించిన ఆ జట్టు యాజమన్యానికి  భారీ షాక్ తగిలింది. 

తొడ కండరాల గాయం నుంచి ఇప్పుడిప్పుడే కోలుకుంటున్న  ఈ స్టార్ ఆల్ రౌండర్ కు తాజాగా  వెన్నెముకకు గాయం కావడంతో మొత్తం సీజన్ నుంచే తప్పుకున్నాడు. 

అయితే ఇది ఒక్క సీఎస్కే కే కాదు..  మొత్తంగా టీమిండియా కు కూడా ఊహించని షాకే. అతడు నాలుగు నెలల దాకా ఫీల్డ్ లోకి దిగే పరిస్థితి లేదని తెలుస్తున్నది. 

వెస్టిండీస్ తో ఈడెన్ గార్డెన్ వేదికగా ముగిసిన చివరి టీ20లో గాయపడ్డ దీపక్.. తర్వాత  జాతీయ క్రికెట్ అకాడమీ (ఎన్సీఏ) కు వెళ్లాడు. ప్రస్తుతం అక్కడే చికిత్స పొందుతున్న అతడు.. తాజాగా వెన్నెముకకు గాయం కావడంతో నాలుగు నెలలు  క్రికెట్ కు దూరంగా ఉండనున్నాడని సమాచారం. 

ఇదే నిజమైతే అతడు అక్టోబర్ లో ఆస్ట్రేలియా వేదికగా  జరుగబోయే టీ20 ప్రపంచకప్ లో కూడా అందుబాటులో ఉండటం అనుమానంగానే ఉంది.  పొట్టి ప్రపంచకప్ వరకు అతడు కోలుకున్నా.. చాహర్ ఎంతమేర ఫిట్నెస్ గా ఉండగలడు..? పాత గాయాలేమైనా తిరగబెడితే అతడి  పరిస్థితేంటి..? అనేది ఇప్పుడు టీమిండియా అభిమానులతో పాటు బోర్డును కూడా కలవరపరుస్తున్నది.

ఆస్ట్రేలియా వంటి పిచ్ లపై ఫాస్ట్ బౌలర్ల అవసరం ఎంతో ఉంది. ఫాస్ట్ ట్రాక్ పిచ్ లపై బౌలింగ్ ఆల్  రౌండర్లకు తిరుగుండదు.  బౌలర్ గానే గాక బ్యాటర్ గా కూడా  లోయరార్డర్ లో విలువైన పరుగులు చేసే సత్తా ఉన్న చాహర్..  టీ20  ప్రపంచకప్ కు అందుబాటులో లేకుంటే అది భారత్ కు తీరని లోటే..