మహేంద్ర సింగ్ ధోని తమిళ సినిమా ఎంట్రీకి రంగం సిద్ధమైందా..? అంటే అవుననే అంటున్నాయి కోలివుడ్ వర్గాలు. ప్రస్తుతం ఐపీఎల్ లో బిజీగా గడుపుతున్న ధోని.. అది ముగిసిన వెంటనే కోలివుడ్ లోకి అరంగేట్రం చేయడం ఖాయమే అంటున్నారు తాలా ఫ్యాన్స్.
ప్రముఖ నటి, త్వరలోనే తమిళ యువ దర్శకుడు విఘ్నేశ్ శివన్ ను పెళ్లి చేసుకోబోతున్న లేడీ సూపర్ స్టార్ నయనతార తో కలిసి ధోని తమిళ సినీ రంగంలో కాలు మోపబోతున్నాడని కోలివుడ్ సినీ వర్గాల్లో చర్చ నడుస్తున్నది.
అయితే ధోని తమిళ సినిమాలోకి ఎంట్రీ ఇచ్చేది నటుడిగా కాదు. నిర్మాతగా.. . ధోని తమిళంలో నిర్మించబోయే తొలి సినిమాలో నయనతార ప్రధాన పాత్ర పోషించనుంది. మహిళా కథ నేపథ్యంలో రూపొందబోతున్న ఈ సినిమాలో ధోని నిర్మాతగా చేయనుండటంతో నయన్ కూడా సినిమాకు ఓకే చెప్పిందని గుసగుసలు వినిపిస్తున్నాయి.
ఈ సినిమాను ధోని.. రజినీకాంత్ దగ్గర చాలాకాలం పాటు పనిచేసిన సంజయ్ ను అసోసియేట్ గా నియమించుకున్నాడు. ఈ చిత్ర బాధ్యతలను మొత్తం అతడే దగ్గరుండి చూసుకుంటున్నాడు.
మరి ఈ సినిమాలో రజినీ కూడా నటిస్తాడా..? అని కూడా కోలివుడ్ వర్గాల్లో చర్చ నడుస్తున్నది. ధోని కూడా రజినీకాంత్ అభిమానే. ధోని అడిగితే కీలక పాత్రలో నటించడానికి కూడా సూపర్ స్టార్ కాదనకుండా ఉంటాడా..? అది కూడా తనకెంతో కావాల్సిన సంజయ్ మార్గ నిర్దేశనలో తెరకెక్కుతున్న చిత్రం కాబట్టి రజినీ కూడా నటించడానికే మొగ్గు చూపే అవకాశముంది.
ధోని ప్రస్తుతం ఐపీఎల్ వల్ల ముంబై లో బిజిగా గడుపుతున్నాడు. ఇప్పటికే ప్లేఆఫ్ ఆశలు వదిలేసుకున్న చెన్నై మరో రెండు మ్యాచులు ఆడి సీజన్ ను ముగుస్తుంది. మరోవైపు నయన్ కూడా.. ప్రస్తుతం ఐదు సినిమాలతో బిజీగా ఉంది. అందులో బాలీవుడ్ బాద్షా షారుఖ్ ఖాన్ తో అట్లీ దర్శకత్వంలో షూటింగ్ కొనసాగుతున్న సినిమా కూడా ఉంది.
Nayanathara
ఇక త్వరలోనే విఘ్నేశ్ శివన్-నయనతారలు తమ సుదీర్ఘ ప్రేమాయణానికి ఫుల్ స్టాప్ పెట్టేసి.. పెళ్లి బంధంతో ఒక్కటయ్యేందుకు సిద్ధమవుతున్న విషయం తెలిసిందే.
నయన్ పెళ్లి, ఐపీఎల్ ముగిసిన తర్వాత ధోని కిలిసి ఈ సినిమాను పట్టాలెక్కించనున్నట్టు సమాచారం. ఇందుకు సంబంధించి త్వరలోనే కీలక అప్డేట్ వచ్చే అవకాశమున్నట్టు కోలివుడ్ వర్గాలు చెబుతున్నాయి. మరి క్రికెటర్ గా సక్సెస్ అయిన ధోని.. నిర్మాత గా ఏ మేరకు విజయం సాధిస్తాడో వేచి చూడాలి.