IPL Playoffs: ఎస్ఆర్హెచ్ పై విజయం.. చెన్నై ప్లేఆఫ్ అవకాశాలు సజీవమేనా..? ఏం చేస్తే వెళ్లొచ్చు..?

TATA IPL 2022: వరుస పరాజయాలు, కెప్టెన్సీ మార్పుతో మానసికంగా దెబ్బతింటుందనుకున్న చెన్నై సూపర్ కింగ్స్  గోడకు కొట్టిన బంతిలా పుంజుకుంది.   హైదరాబాద్ తో ఆదివారం ముగిసిన  మ్యాచ్ లో అద్భుత విజయం సాధించి ప్లేఆఫ్ ఆశలను సజీవంగా ఉంచుకుంది. 

సన్ రైజర్స్ హైదరాబాద్ ను ఓడించిన చెన్నై సూపర్ కింగ్స్ కు ఐపీఎల్-15లో ఇది మూడో విజయం. ఇప్పటివరకు 9 మ్యాచులాడిన  ఆ జట్టు.. ఆరు మ్యాచుల్లో పరాజయం పాలైంది.  ప్రస్తుతం పాయింట్ల పట్టికలో 9వ స్థానంలో ఉన్న చెన్నై.. ప్లేఆఫ్ రేసులో తాను కూడా ఉన్నానని చెప్పింది. 

ప్లేఆఫ్స్ చేరాలంటే చెన్నై తర్వాత జరుగబోయే ప్రతి మ్యాచ్ నెగ్గాల్సి ఉంటుంది. ఆ జట్టు తన తర్వాతి మ్యాచులను గుజరాత్ టైటాన్స్, ఢిల్లీ క్యాపిటల్స్, ముంబై ఇండియన్స్, రాయల్ ఛాలెంజర్స్ బెంగళూరు, రాజస్తాన్ రాయల్స్ తో ఆడాల్సి ఉంది. 

ప్లేఆఫ్ రేసులో నిలవాలంటే చెన్నై..  ఈ ఐదు మ్యాచుల్లో నెగ్గాల్సిందే.  అప్పుడు సీఎస్కేకు 8 విజయాలు.. 16 పాయింట్లు చేకూరుతాయి.  ఈ ఐదు మ్యాచుల్లో  భారీ తేడాతో  ప్రత్యర్థులను ఓడిస్తే ఆ జట్టు నెట్ రన్ రేట్ కూడా మెరుగుపడుతుంది. 

ప్రస్తుతం సీఎస్కే నెట్ రన్ రేట్ మైనస్ (-0.407) గా ఉంది. ఒకవేళ  పైన పేర్కొన్న జట్లతో మ్యాచులన్నీ గెలిచినా నెట్ రన్ రేట్ తక్కువగా ఉంటే చెన్నైకి  చెక్ పడ్డట్టే. 

ఇప్పటికే ఐపీఎల్ పాయింట్ల పట్టికలో అగ్రస్థానంలో ఉన్న గుజరాత్ (9 మ్యాచుల్లో 8 విజయాలు 1 పరాజయం.. 16 పాయింట్లు) ప్లేఆఫ్ బెర్త్ ను కన్ఫర్మ్ చేసుకున్నట్టే. తర్వాత స్థానంలో ఉన్న లక్నో (10 మ్యాచుల్లో 7 విజయాలు, 3 ఓటములు, 14 పాయింట్లు) మంచి నెట్ రన్ రేట్ తో ఉన్నాయి. 

ఇవే గాక మూడో స్థానంలో ఉన్న రాజస్తాన్ రాయల్స్ (9 మ్యాచులు, 6 విజయాలు, 3 ఓటములు.. 12 పాయింట్లు) కూడా ప్లేఆఫ్ రేసులో  ముందంజలో ఉంది.  నాలుగో స్థానంలో ఉన్న సన్ రైజర్స్ హైదరాబాద్ వరుసగా ఐదు మ్యాచులు గెలిచి తర్వాత  మళ్లీ వరుసగా రెండు ఓటములు మూటగట్టుకుంది. ఆ జట్టుకు 10 పాయింట్లున్నాయి. ప్లేఆఫ్ రేసులో ఎస్ఆర్హెచ్ నిలవాలంటే మరో 3 మ్యాచుల్లో గెలవాలి.  

ఈ నాలుగు జట్లే గాక  ఆర్సీబీ  (పది మ్యాచుల్లో ఐదు విజయాలు, ఐదు ఓటములు) నుంచి కూడా సీఎస్కేకు ముప్పు ఉంది. ఐదు మ్యాచులు గెలవడమే గాక ఈ ఐదు జట్ల విజయాలు, అపజయాలు కూడా చెన్నైని ప్రభావితం చేస్తాయి.

వీటన్నింటింని దాటుకుని చెన్నై ముందుకెళ్లడం కష్టమే అయినా ధోని మీద భారం వేసిన సీఎస్కే.. అతడే తమను  ప్లేఆఫ్ రేసులో నిలుపుతాడని భావిస్తున్నది. 

మరి  ఈ సీజన్ కు ముందు రవీంద్ర జడేజా కు  సారథ్య బాధ్యతలు అప్పజెప్పి తిరిగి  ఆ ఒత్తిడి తన వల్ల కాదంటే మళ్లీ  ఆ స్థానంలోకి వచ్చి చెన్నైకి విజయం అందించిన  మహేంద్రుడు.. చెన్నైని తీరానికి చేరుస్తాడా..? లేక చేతులెత్తేస్తాడా అన్నది మరో రెండు మ్యాచుల తర్వాత తేలుతుంది.