నిరుద్యోగులకు గుడ్ న్యూస్: యూనియన్ బ్యాంక్‌లో భారీ నోటిఫికేషన్

బ్యాంకులో ఉద్యోగం సంపాదించడం మీ లక్ష్యమా? మీ కోసం యూనియన్ బ్యాంక్ ఆఫ్ ఇండియా భారీ నోటిఫికేషన్ విడుదల చేసింది. దేశవ్యాప్తంగా యూనియన్ బ్యాంకు బ్రాంచిల్లో ఖాళీగా ఉన్న ఉద్యోగాలను భర్తీ చేయనున్నారు. ఈ నోటిఫికేషన్ కు సంబంధించి పూర్తి వివరాలు తెలుసుకోవడానికి ఈ స్టోరీ పూర్తిగా చదవండి. 

కేంద్ర ప్రభుత్వ ఆధ్వర్యంలోని ప్రభుత్వ రంగ బ్యాంక్ అయిన యూనియన్ బ్యాంక్ ఆఫ్ ఇండియా 1919 నవంబర్ 11న ముంబైలో సేథ్ సీతారాం పొద్దార్ అనే వ్యక్తి స్థాపించారు. ఈ బ్యాంక్ కార్పొరేట్ కార్యాలయాన్ని అప్పట్లో మహాత్మా గాంధీ ప్రారంభించారు. స్వాతంత్ర్యం వచ్చే నాటికి ఈ బ్యాంకుకు కేవలం నాలుగు బ్రాంచిలు మాత్రమే ఉన్నాయి. 1969లో భారత ప్రభుత్వం UBIని జాతీయం చేసింది. ఆ సమయానికి ఈ బ్యాంకు 240 శాఖలను కలిగి ఉంది. బెల్గాం బ్యాంక్‌, శ్రీ జడేయా శంకర్లింగ్ బ్యాంక్, మిరాజ్ స్టేట్ బ్యాంక్‌, సిక్కిం బ్యాంక్‌లను కొనుగోలు చేసి తనలో కలిపేసుకుంది. అంతేకాకుండా 2019 ఆగస్టు 30న ఆంధ్రా బ్యాంక్, కార్పొరేషన్ బ్యాంక్‌లను యూనియన్ బ్యాంక్ ఆఫ్ ఇండియాలో విలీనం చేశారు. UBI ప్రధాన కార్యాలయం ముంబైలో ఉంది. ప్రస్తుతానికి ఈ బ్యాంకుకు దేశవ్యాప్తంగా 8500 కి పైగా శాఖలున్నాయి. దాదాపు 75,000 మంది ఉద్యోగులతో యూనియన్ బ్యాంక్ ఆఫ్ ఇండియా నడుస్తోంది. 

యూనియన్ బ్యాంక్ ఆఫ్ ఇండియా భారీ జాబ్‌ రిక్రూట్‌మెంట్‌ నోటిఫికేషన్‌ విడుదల చేసింది. దీని ద్వారా 1500 లోకల్‌ బ్యాంక్‌ ఆఫీసర్‌ పోస్టులను భర్తీ చేయనున్నారు. ఈ రిక్రూట్‌మెంట్ డ్రైవ్ ద్వారా దేశవ్యాప్తంగా ఉన్న వివిధ శాఖల్లో 2024-25 ఆర్థిక సంవత్సరానికి మొత్తం 1500 ఖాళీలను భర్తీ చేయాలని UBI లక్ష్యంగా పెట్టుకుంది. ఈ మొత్తం పోస్టుల్లో ఆంధ్రప్రదేశ్‌లో 200 పోస్టులు కేటాయించారు. తెలంగాణలో 200 పోస్టులు ఉన్నాయి. రెండు తెలుగు రాష్ట్రాల్లో అత్యధికంగా 400 పోస్టులు ఉండటం విశేషం. ఈ భారీ నోటిఫీకేషన్ తెలుగు రాష్ట్రాల్లో నిరుద్యోగులకు ఒకరకంగా ప్రోత్సాహం అందించినట్లే.

యూనియన్ బ్యాంక్ లో LBO రిక్రూట్‌మెంట్ ఆన్‌లైన్ దరఖాస్తు ప్రక్రియ అక్టోబర్ 24వ తేదీ నుంచి ప్రారంభమైంది. నవంబర్‌ 13 దరఖాస్తులకు చివరితేదీగా నిర్ణయించారు. ఏదైనా గుర్తింపు పొందిన విశ్వవిద్యాలయం నుండి బ్యాచిలర్ డిగ్రీ కలిగిన వారు ఈ జాబ్స్ కి అప్లై చేసుకోవచ్చు. 20 నుంచి 30 సంవత్సరాలు వయస్సు కలిగిన వారు మాత్రమే ఈ జాబ్స్ కి అప్లై చేసుకోవాలి. SC/ST లకు 5 సంవత్సరాలు ఏజ్ రిలాక్సేషన్ ఇచ్చారు. అదేవిధంగా OBC వారికి 3 సంవత్సరాలు, జనరల్ PWD అభ్యర్థులకు 10 సంవత్సరాలు వయో సడలింపు వర్తిస్తుంది.

జనరల్ అభ్యర్థులు రూ.850 ఫీజు చెల్లించి పరీక్ష రాయాల్సి ఉంటుంది. SC/ST/PWD అభ్యర్థులకు రప.175 చెల్లిస్తే సరిపోతుంది. పరీక్ష ఫీజును ఆన్‌లైన్‌లో చెల్లించాలి. జీతం నెలకు రూ.48,480 నుండి రూ.85,920 వరకు ఉంటుంది. ఈ రిక్రూట్ మెంట్ కు అర్హులైన అభ్యర్థులకు రాత పరీక్ష నిర్వహిస్తారు. అందులో అర్హత సాధించిన వారికి ఇంటర్వ్యూ  ఉంటుంది. ఇది అభ్యర్థుల సంఖ్య ఆధారంగా నిర్వహిస్తారు. దేశ వ్యాప్తంగా అనేక నగరాల్లో పరీక్ష కేంద్రాలు ఏర్పాటు చేస్తారు. ఈ పోస్టులకు ఎంపికైన అభ్యర్థులకు జాయినింగ్‌ తేదీ నుంచి రెండేళ్ల పాటు ప్రొబేషన్‌ పీరియడ్‌ ఉంటుంది.

చివరి తేదీ: నవంబర్ 13, 2024.

ఎలా దరఖాస్తు చేయాలి: అభ్యర్థులు పూర్తి వివరాలను  https://www.unionbankofindia.co.in/english/recruitment.aspx  వెబ్ సైట్ లో చూడొచ్చు.