Swiggy: స్విగ్గీలో కొత్త సేవలు.. పింగ్‌ పేరుతో AI ఆధారిత యాప్‌ లాంచ్‌. దీని ఉపయోగం ఏంటంటే

ప్రముఖ ఫుడ్‌ డెలివరీ యాప్‌ స్విగ్గీ కొత్తగా 'పింగ్' అనే AI ఆధారిత యాప్‌ను ప్రారంభించింది. ఈ యాప్ ద్వారా ప్లంబర్లు, ఎలక్ట్రీషియన్లు, క్లీనింగ్ సర్వీసులు వంటి ప్రొఫెషనల్ సేవలను సులభంగా పొందవచ్చు. బెంగళూరులో మంగళవారం ఈ యాప్ లాంచ్ అయ్యింది. త్వరలోనే ఇతర నగరాల్లోనూ ఈ సేవలను తీసుకొచ్చేందుకు సన్నాహాలు చేస్తున్నారు..  

ప్రముఖ ఆన్‌లైన్ ఫుడ్, గ్రోసరీ డెలివరీలో యాప్‌ స్విగ్గీ ఇప్పుడు కొత్త ప్రొడక్ట్‌తో సర్వీస్ మార్కెట్లోకి అడుగుపెడుతోంది. 'పింగ్' అనే ఈ కొత్త యాప్ AI ఆధారితం. దీని ద్వారా ప్లంబర్, ఎలక్ట్రీషియన్, క్లీనింగ్ వంటి ప్రొఫెషనల్ సర్వీసులను సులభంగా పొందవచ్చు.

ఎక్స్‌పర్ట్ సర్వీసులు ఇట్టే మీ సొంతం: 

మంగళవారం బెంగళూరులో లాంచ్ అయిన ఈ యాప్ ద్వారా యోగా ట్రైనర్లు, ఫైనాన్షియల్ అడ్వైజర్లు, లాయర్లు వంటి నిపుణుల సేవలను కూడా పొందవచ్చు. 'పింగ్' కోసం స్విగ్గీ ముందుగా 'ఎల్లో' అనే పైలట్ ప్రాజెక్ట్‌ను ప్రారంభించింది. దీని ఉద్దేశం న్యాయవాదులు, జ్యోతిష్యులు, థెరపిస్టుల వంటి నిపుణులను కస్టమర్లకు అందుబాటులోకి తేవడం. జనవరి నుంచి ప్రొఫెషనల్స్ ఈ యాప్‌లో రిజిస్టర్ చేసుకుంటున్నారు. ఇప్పుడు కస్టమర్లకు అందుబాటులోకి వచ్చింది. 'పింగ్' ద్వారా మీకు దగ్గర్లో ఉన్న నమ్మకమైన ప్రొఫెషనల్స్ గురించి తెలుసుకోవచ్చు.

AI ఆధారంగా పనిచేసే యాప్‌:

అర్బన్ కంపెనీ కూడా ఇలాంటి సేవలనే అందిస్తోంది. కానీ 'పింగ్' ప్రత్యేకత ఏంటంటే ఇది AI ఆధారంగా పనిచేస్తుంది. అంటే మీకు కావాల్సిన సేవలను AI సూచిస్తుంది. డైటీషియన్, వెడ్డింగ్ ప్లానర్, లాయర్, జ్యోతిష్యుడు, ఫైనాన్షియల్ అడ్వైజర్ వంటి వారిని సులభంగా సంప్రదించవచ్చు

చాట్ ద్వారా సేవలు:

ఈ యాప్‌లో చాట్ ద్వారా సేవలను పొందవచ్చు. ఉదాహరణకు, మీరు 'నా భవిష్యత్తు తెలుసుకోవాలి' అని టైప్ చేస్తే, యాప్ మిమ్మల్ని జ్యోతిష్యుడికి కనెక్ట్ చేస్తుంది. 'డైట్ ప్లాన్ కావాలి' అంటే డైటీషియన్‌కు కనెక్ట్ చేస్తుంది. స్విగ్గీ, జొమాటో, జెప్టో వంటి కంపెనీల మధ్య ఇప్పటికే గట్టి పోటీ నెలకొని ఉంది. మరి ఈ కొత్త యాప్ 'పింగ్'ఎంతవరకు విజయం సాధిస్తుందో చూడాలి.