కరోనా కొత్త వేరియంట్ భయాలు.. డిసెంబర్ 15 నుండి అంతర్జాతీయ విమానాలకు బ్రేక్ :డి‌జి‌సి‌ఏ

డిసెంబర్ 15 నుంచి అంతర్జాతీయ విమాన సర్వీసులను తీరిగి ప్రారంభించాలన్న నిర్ణయం వాయిదా పడింది. వాస్తవానికి డైరెక్టరేట్ జనరల్ ఆఫ్ సివిల్ ఏవియేషన్ (DGCA) ఇంకా దీని గురించి ఆలోచనలో ఉందని, అంతర్జాతీయ ప్యాసింజర్ విమాన సేవలను పునరుద్ధరించడంపై త్వరలో నిర్ణయం తీసుకుంటుందని చెప్పారు.

 కరోనావైరస్  కొత్త వేరియంట్ ఒమిక్రాన్ (omicron) దృష్ట్యా పరిస్థితిని నిశితంగా పరిశీలిస్తున్నట్లు డి‌జి‌సి‌ఏ తెలిపింది. ప్రస్తుతం డిసెంబర్ 15 నుంచి అంతర్జాతీయ విమాన సర్వీసులు పుణ:ప్రారంభం కావు అని స్పష్టమవుతుంది. అలాగే పరిస్థితిని బట్టి తదుపరి తేదీపై నిర్ణయం తీసుకోనున్నారు.

అంతకుముందు డిసెంబర్ 15 నుండి వాణిజ్య అంతర్జాతీయ ప్యాసింజర్ సేవలను పునరుద్ధరించడానికి సంబంధించి హోం వ్యవహారాల మంత్రిత్వ శాఖ, విదేశీ వ్యవహారాల మంత్రిత్వ శాఖ, ఆరోగ్య-కుటుంబ సంక్షేమ మంత్రిత్వ శాఖలను సంప్రదించినట్లు పౌర విమానయాన మంత్రిత్వ శాఖ తెలిపింది. దీని తర్వాత 15 డిసెంబర్ 2021 నుండి భారతదేశం నుండి వాణిజ్య అంతర్జాతీయ ప్రయాణీకుల సేవలను పునఃప్రారంభించవచ్చని నిర్ణయించారు. హోం వ్యవహారాల మంత్రిత్వ శాఖ మూడు దేశాల జాబితాలను సిద్ధం చేస్తుంది. దీని ఆధారంగా అంతర్జాతీయ విమానాలు నడపబడతాయి. అయితే  కరోనా కొత్త వేరియంట్ ఒమిక్రాన్ పరిస్థితిని మార్చింది.

డి‌జి‌సి‌ఏ నిర్ణయం ప్రభావవంతంగా అంటే ఎయిర్ ట్రాన్స్పోర్ట్ బబుల్ కింద అంతర్జాతీయ విమానాలు ప్రస్తుతానికి కొనసాగుతాయి. భారతదేశం 31 దేశాలతో ఎయిర్ ట్రాన్స్‌పోర్ట్ బబుల్స్‌పై సంతకం చేసింది. నవంబర్ 30న దాదాపు 536 అంతర్జాతీయ విమానాలు నడపబడ్డాయి, అయితే 2019 శీతాకాలపు షెడ్యూల్ సామర్థ్యంలో 44 శాతంతో నడిపించింది.

కోవిడ్-19 వ్యాప్తి  దృష్ట్యా గ్రేడెడ్ పద్ధతిలో షెడ్యూల్ చేసిన అంతర్జాతీయ విమానాలను తిరిగి ప్రారంభిస్తున్నట్లు గత శుక్రవారం డి‌జి‌సి‌ఏ ప్రకటించింది. అయితే షెడ్యూల్డ్ చేసిన విమానాలు గత ఏడాది మార్చిలో నిలిపివేసింది. అప్పటి నుండి ఎయిర్ ట్రాన్స్పోర్ట్ బబుల్ కింద ఉన్న విమానాలు మాత్రమే నడుస్తున్నాయి.

కరోనా కొత్త వేరియంట్ ఓమిక్రాన్ ముప్పు దృష్ట్యా శనివారం ప్రధాని నరేంద్ర మోదీ ఉన్నతాధికారులతో సమావేశమైన నేపథ్యంలో షెడ్యూల్ చేసిన అంతర్జాతీయ విమానాలను నిలిపివేస్తూ నిర్ణయం తీసుకున్నారు.

కరోనా కొత్త వేరియంట్  ముప్పులో ఉన్న దేశాలు
ఆరోగ్య, కుటుంబ సంక్షేమ మంత్రిత్వ శాఖ హాంకాంగ్, ఇజ్రాయెల్‌ ప్రయాణీకులను కరోనా పరీక్షతో సహా అదనపు పారామితులను పాటించాల్సిన దేశాల జాబితాకు జోడించింది. వీటిలో బ్రిటన్, దక్షిణాఫ్రికా, బ్రెజిల్, బంగ్లాదేశ్, బోట్స్వానా, చైనా, మారిషస్, న్యూజిలాండ్, జింబాబ్వే, సింగపూర్, హాంకాంగ్, ఇజ్రాయెల్‌తో సహా యూరోపియన్ దేశాలు ఉన్నాయి.