FD vs SIP: నెలకు రూ.5 వేలు.. ఐదేళ్ల కాలానికి ఏది బెటర్?

FD vs SIP: ఫిక్స్‌డ్ డిపాజిట్ (FD/RD), రెండోది మార్కెట్ ఆధారిత ఆదాయాన్నిచ్చే సిస్టమాటిక్ ఇన్వెస్ట్‌మెంట్ ప్లాన్ (SIP). ఈ రెండింటిలో ఏది ఎక్కువ లాభాలను ఇస్తుంది?. భద్రత విషయంలో ఏది బాగుంటుంది.?

భద్రత విషయంలో ఏది బాగుంటుంది.?

సంపాదించడం మొదలుపెట్టిన ప్రతి ఒక్కరికీ ఎదురయ్యే అతి పెద్ద ప్రశ్న.. తమ పొదుపును ఎక్కడ పెట్టుబడి పెట్టాలని. ముఖ్యంగా నెలకు రూ.5 వేల చొప్పున 5 ఏళ్లపాటు పొదుపు చేయాలనుకునే వారికి ప్రధానంగా రెండు మార్గాలు కనిపిస్తాయి. ఒకటి అత్యంత సురక్షితమైన ఫిక్స్‌డ్ డిపాజిట్ (FD/RD), రెండోది మార్కెట్ ఆధారిత ఆదాయాన్నిచ్చే సిస్టమాటిక్ ఇన్వెస్ట్‌మెంట్ ప్లాన్ (SIP). ఈ రెండింటిలో ఏది ఎక్కువ లాభాలను ఇస్తుంది? భద్రత విషయంలో ఏది బాగుంటుందనే సందేహం వస్తుంది. సాధారణంగా ఎఫ్‌డీలు స్థిరత్వాన్ని కోరుకునే వారికి, సిప్‌లు సంపద సృష్టిని ఆశించే వారికి సరైన ప్లాట్ ఫాం అని నిపుణులు అభిప్రాయపడుతున్నారు. 

అంచనాలివే..

ఆర్థిక నిపుణుల అంచనాల ప్రకారం.. నెలకు రూ.5 వేలచొప్పున ఐదేళ్ల పాటు ఈక్విటీ మ్యూచువల్ ఫండ్లలో ఎస్ఐపీ చేస్తే, 10 - 12 శాతం వార్షిక రాబడితో అది సుమారు 3.8 లక్షల నుండి 4.2 లక్షల రూపాయల వరకు పెరిగే అవకాశం ఉంది. అదే మొత్తాన్ని 6 నుండి 7 శాతం వడ్డీ ఇచ్చే ఎఫ్‌డీ లేదా ఆర్డీలో జమ చేస్తే, ఐదేళ్ల తర్వాత అది సుమారు 3.4 లక్షల నుండి 3.6 లక్షల రూపాయల వరకు మాత్రమే చేరుతుంది. ఈ వ్యత్యాసం చాలా తక్కువగా అనిపించినప్పటికీ, పెట్టుబడి కాలపరిమితి పెరిగే కొద్దీ ఈ రాబడుల మధ్య తేడా చాలా స్పష్టంగా కనిపిస్తుంది. సిప్‌లు మార్కెట్ ఒడుదొడుకులకు లోబడి ఉన్నప్పటికీ, దీర్ఘకాలంలో ద్రవ్యోల్బణాన్ని అధిగమించే రాబడులను అందించడంలో ఇవి ముందుంటాయి. 

రిటర్నులే రిస్క్..

ఈ రెండింటి మధ్య ఒక ప్రధాన తేడా ఉంది. అదే రిస్క్ రిటర్న్. ఎఫ్‌డీలను అంచనా వేయొచ్చు. మీరు పెట్టుబడి పెట్టే సమయంలోనే మెచ్యూరిటీ తర్వాత మీకు ఎంత మొత్తం వస్తుందో కచ్చితంగా లెక్క తెలుస్తుంది. ఇది భయం లేని పెట్టుబడి మార్గం. కానీ సిప్‌లు మార్కెట్ గమనంతో ముడిపడి ఉంటాయి. మార్కెట్ పడిపోయినప్పుడు మీ పెట్టుబడి విలువ కూడా తగ్గే ప్రమాదం ఉంటుంది. అయితే, మార్కెట్ పతనం అనేది ఎస్ఐపీ ఇన్వెస్టర్లకు ఒక రకంగా వరమేనని చెప్పాలి. ఎందుకంటే తక్కువ ధరలో ఎక్కువ యూనిట్లు కొనుగోలు చేసే అవకాశం లభిస్తుంది. మార్కెట్ మళ్లీ కోలుకున్నప్పుడు ఇది అదనపు లాభాలను తెచ్చిపెడుతుంది. కానీ ఈ ప్రక్రియలో ఓర్పు, క్రమశిక్షణ చాలా ముఖ్యం. 

పన్నుల ప్రభావం..

అయితే పెట్టుబడిపై వచ్చే రాబడిని పన్నులు కూడా ప్రభావితం చేస్తాయి. ఎఫ్‌డీపై వచ్చే వడ్డీ ఏటా మీ ఆదాయపు పన్ను స్లాబ్ ప్రకారం పన్నుకు గురవుతుంది. ఇది అధిక ఆదాయం ఉన్నవారికి నికర రాబడిని తగ్గిస్తుంది. మరోవైపు, ఈక్విటీ ఎస్ఐపీలపై వచ్చే లాభాలను మీరు నగదుగా మార్చుకున్నప్పుడు మాత్రమే పన్ను విధిస్తారు. పన్ను పరంగా చూస్తే ఎస్ఐపీలు కొంత మేలు చేస్తాయి. మీ ప్రాధాన్యత కేవలం పెట్టుబడి భద్రత అయితే ఎఫ్‌డీని, కొంచెం రిస్క్ తీసుకుని పెద్ద మొత్తంలో సంపదను కూడబెట్టాలనుకుంటే సిప్‌ను ఎంచుకోవడం మంచిది.