PPF: సింపుల్ పెట్టుబడితో నెలకు రూ.80 వేల వరకు ఆదాయం: టాక్స్ కూడా కట్టక్కరలేదు

PPF: రిస్క్ లేని, సురక్షితమైన ఆదాయం సంపాదించాలనుకుంటున్నారా? అయితే పబ్లిక్ ప్రావిడెంట్ ఫండ్(PPF)లో పెట్టుబడి పెట్టండి. దీని ద్వారా నెలకు నికరంగా రూ.80 వేల వరకు ఆదాయం సంపాదించొచ్చు. దీని కోసం ఇక్కడ బెస్ట్ ప్లాన్ ఉంది. పూర్తి వివరాలు తెలుసుకుందాం రండి. 

పబ్లిక్ ప్రావిడెంట్ ఫండ్ (PPF) భారత ప్రభుత్వ ఆధ్వర్యంలో నడిచే దీర్ఘకాలిక పెట్టుబడి పథకం. ఇది పెట్టుబడిదారులకు భద్రత, స్థిరత్వం, పన్ను మినహాయింపు లాభాలను అందిస్తుంది.
PPF ఖాతాలో పెట్టుబడిపై 15 సంవత్సరాల లాక్-ఇన్ వ్యవధి ఉంటుంది. ఇది పూర్తవకుండా నిధులను పూర్తిగా విత్ డ్రా చేసుకోలేరు. అవసరమైతే PPF లాక్-ఇన్ వ్యవధి ముగిసిన తర్వాత మీరు టైమ్ పీరియడ్ ని 5 సంవత్సరాలు పొడిగించుకోవచ్చు.

ప్రావిడెంట్ ఫండ్ పథకంలో ఏటా కనీసం రూ. 500 నుంచి మాక్సిమం రూ. 1.5 లక్షల వరకు పెట్టుబడి పెట్టవచ్చు. సంవత్సరానికి రూ.1.5 లక్షల వరకు పెట్టుబడి చేయడం ద్వారా సెక్షన్ 80C ప్రకారం పన్ను మినహాయింపు కూడా పొందవచ్చు. కాబట్టి పబ్లిక్ ప్రావిడెంట్ ఫండ్ నుండి నెలకు రూ. 80,000 కంటే ఎక్కువ పన్ను రహిత ఆదాయాన్ని ఎలా పొందవచ్చో ఇప్పుడు తెలుసుకుందాం.

నెలకు ఆదాయం

PPF నుండి నెలకు రూ. 80,000 కంటే ఎక్కువ సంపాదించడానికి ప్రతి సంవత్సరం రూ. 1.50 లక్షల పెట్టుబడి పెట్టాలి. ఇలా 15 సంవత్సరాలు పెట్టాల్సి ఉంటుంది. మెచ్యూరిటీ కాలం పూర్తయ్యే వరకు PPF లాక్-ఇన్ వ్యవధి అంటారు. ఆ తర్వాత మీరు నెలకు రూ.80 వేల వరకు ఆదాయం పొందొచ్చు. 

ఈ పెట్టుబడిపై 7.1% వడ్డీ రేటుతో సంవత్సరానికి రూ.10.13 లక్షలు వడ్డీ పొందవచ్చు. అంటే నెలకు సుమారు రూ.84,500 పన్ను మినహాయింపు ఆదాయం పొందవచ్చు. 

సంవత్సరానికి రూ.1.50 లక్షల చొప్పున 15 సంవత్సరాలు పెట్టుబడి పెడితే మొత్తం రూ. 22,50,000 అవుతుంది. దీనికి అంచనా వడ్డీ రూ.18,18,209. అంటే మొత్తం రూ. 40,68,209 మీరు సంపాదిస్తారు.  మీరు గాని మరో 5 సంవత్సరాలు సంవత్సరానికి రూ.1.50 లక్షలు పెట్టుబడి పెడితే 20 సంవత్సరాలలో మొత్తం పెట్టుబడి రూ. 30,00,000 అవుతుంది. అంచనా వడ్డీ రూ. 36,58,288 లభిస్తుంది. అప్పుడు మొత్తం కార్పస్ రూ. 66,58,288 అవుతుంది. ఇప్పుడు కూడా కావాలంటే మీరు మరో 5 సంవత్సరాలు పెట్టుబడి పొడిగించుకోవచ్చు. 

ఇలా పీపీఎఫ్ పెట్టుబడి టైమ్ పీరియడ్ పెంచుతూ 29 ఏళ్ల పెట్టుబడి పెడితే మొత్తం పెట్టుబడి రూ.43.5 లక్షలు అవుతుంది. అంచనా వడ్డీ ఆదాయం రూ.99.26 లక్షలు లభిస్తుంది. అప్పుడు మొత్తం కార్పస్ రూ.1.42 కోట్లు అవుతుంది. 

దీన్ని బట్టి సంవత్సరానికి కేవలం రూ.1.50 లక్షల పెట్టుబడితో లాంగ్ టర్మ్ లో రూ.కోట్లు సంపాదించొచ్చు. పీపీఎఫ్ ద్వారా సంపాదించే ఆదాయానికి పన్ను మినహాయింపు కూడా ఉంటుందని గుర్తుపెట్టుకోండి.