దేశీయ ఆటోమోబైల్ దిగ్గజం టాటా మోటార్స్ సరికొత్త మైక్రో ఎస్‌యూ‌వి హెచ్2ఎక్స్ కాన్సెప్ట్ ని 2020 ఆటో ఎక్స్‌పోలో ప్రదర్శించారు, తరువాత దీనిని హెచ్‌బి‌ఎక్స్ ఇంకా హార్న్‌బిల్ పేరుతో పిలిచారు. ఇటీవల టాటా మోటార్స్ దీనికి ఖచ్చితమైన పేరును వెల్లడించింది, చివరకి టాటా పంచ్ అని పేరు పెట్టారు.
దీనిని పండుగ సీజన్‌లో త్వరలో లాంచ్ చేయవచ్చు. లాంచ్ కి ముందే ఈ మైక్రో ఎస్‌యూవీ కోసం డీలర్‌షిప్‌లలో డీలర్లు అనధికారికంగా బుకింగ్‌లను తీసుకోవడం కూడా ప్రారంభించారు.
ఇటీవల ఆరెంజ్ కలర్ టాటా పంచ్ పుణెలోని బాలెవాడిలోని డీలర్‌షిప్ లో కనిపించింది. టాటా పంచ్ ఆల్ఫా-ఆర్క్ (అడ్వాన్స్‌డ్ లైట్ ఫ్లెక్సిబుల్ అడ్వాన్స్‌డ్ ఆర్కిటెక్చర్) అండ్ ఇంపాక్ట్ 2.0 డిజైన్ లాంగ్వేజ్‌పై నిర్మించారు. టాటా ఆల్ట్రోజ్ ప్రీమియం హ్యాచ్‌బ్యాక్ తర్వాత ఈ ప్లాట్‌ఫారమ్‌పై నిర్మించిన రెండవ కారు టాటా పంచ్ అవుతుంది. ఉత్పత్తి శ్రేణిలో టాటా పంచ్ కాంపాక్ట్ ఎస్‌యూ‌వి టాటా నెక్సాన్ క్రింద ఉంటుంది. దీనిలో ఆల్ట్రోజ్ ఇంజిన్ ఉంటుంది.
టాటా పంచ్ బుకింగులని అధికారికంగా ప్రకటించనప్పటికీ కొంతమంది డీలర్లు దీనిని రూ .21వేలకు బుక్ చేస్తున్నారు. ఈ 5-సీటర్ మైక్రో ఎస్‌యూ‌వి సబ్ -4 మీటర్ కేటగిరీలో వస్తుంది. దీనిని డ్యూయల్ టోన్ కలర్ స్కీమ్‌తో లాంచ్ చేయవచ్చు. ఇంకా సి-పిల్లర్‌పై ఇంటిగ్రేటెడ్ డోర్ హ్యాండిల్స్‌ను పొందుతుంది. అలాగే ప్లాస్టిక్ బాడీ క్లాడింగ్, పెద్ద ఫ్రంట్ బంపర్, స్ప్లిట్ హెడ్‌ల్యాంప్‌లు ఎల్‌ఈ‌డి డి‌ఆర్‌ఎల్ లు, ఎల్‌ఈ‌డి టెయిల్ ల్యాంప్‌లు లభిస్తాయి. కొత్త ఎస్‌యూ‌విలో పెద్ద 16-అంగుళాల అల్లాయ్ వీల్స్ ఉంటాయి.
ఇంటీరియర్ గురించి మాట్లాడితే దీనిలో ఒక పెద్ద సౌకర్యవంతమైన క్యాబిన్‌ను పొందుతుంది, ఇందులో ఐదుగురు వ్యక్తులు కూర్చోవచ్చు. టాప్ వేరియంట్‌లో సెమీ డిజిటల్ ఇన్‌స్ట్రుమెంట్ క్లస్టర్, 7-అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, ఫ్లోటింగ్ డిస్‌ప్లే యూనిట్, అడ్జస్టబుల్ డ్రైవర్ సీటు, ఫ్లాట్-బాటమ్ స్టీరింగ్ వీల్ లభిస్తాయి. అంతే కాకుండా పుష్ బటన్ స్టార్ట్, క్రూయిజ్ కంట్రోల్, కప్ హోల్డర్‌లతో బ్యాక్ ఆర్మ్‌రెస్ట్, డ్యూయల్ ఫ్రంట్ ఎయిర్‌బ్యాగ్‌లు, ఈ‌బి‌డితో ఏ‌బి‌ఎస్, బ్యాక్ పార్కింగ్ కెమెరా ఉంటాయి. ఈ విభాగంలో మొదటిసారిగా టాటా పంచ్ హిల్ డిసంట్ కంట్రోల్ తో ఇసుక, మట్టి, రాక్ ట్రాక్షన్ మోడ్‌లను పొందుతుంది.
ఇంజిన్ గురించి మాట్లాడితే టియాగో, టిగోర్, ఆల్ట్రోజ్‌లో ఉండే పెట్రోల్ ఇంజిన్ మాత్రమే ఇందులో ఉంటుంది. 1.2 లీటర్ న్యాచురల్ ఆస్పిరేటెడ్, 3-సిలిండర్ పెట్రోల్ ఇంజిన్ పొందుతుంది, ఈ ఇంజన్ 86హెచ్‌పి పవర్, 115ఎన్‌ఎం టార్క్ ఉత్పత్తి ఇస్తుంది. ఇంకా 5-స్పీడ్ మాన్యువల్ ట్రాన్స్‌మిషన్ ఏ‌ఎం‌టి ఆప్షన్ పొందుతుంది. దీనిని తరువాత టర్బో వేరియంట్‌లో లాంచ్ చేయవచ్చు. కంపెనీ సి‌ఎన్‌జి ఆప్షన్ కూడా దీనికి అందించాలని యోచిస్తోంది.
టాటా మినీ ఎస్‌యూవీ టాటా పంచ్ మారుతి ఇగ్నిస్, మహీంద్రా కెయువి 100తో పోటీపడుతుంది. దీనిని ధర రూ .5 లక్షల నుంచి 8.5 లక్షల ఎక్స్-షోరూమ్ ధర మధ్య లాంచ్ చేయవచ్చని భావిస్తున్నారు. కంపెనీ దీని ధరను తక్కువగా ఉంచి మారుతి స్విఫ్ట్, హ్యుందాయ్ ఐ10 నియోస్, నిస్సాన్ మాగ్నైట్, రెనాల్ట్ కిగర్, సిట్రోయెన్ సి3 ఎస్‌యూ‌వి పోటీగా తీసుకురవాలని యోచిస్తోంది.