విజయవాడ వాసులూ : సహాయం కోసం ఈ అధికారులను సంప్రదించండి, ఫోన్ నెంబర్లు ఇవే
విజయవాడను వరదనీరు ముంచెత్తింది. ఈ వరదల్లో చిక్కుకున్న ప్రజలు సహాయం కోసం ప్రత్యేక అధికారులకు ఫోన్ చేయవచ్చు. ఏ ప్రాంతానికి ఏ అధికారిని నియమించారు... ఆయన ఫోన్ నెంబర్ తదితర వివరాలు మీకోసం...
విజయవాడ : ఆంధ్ర ప్రదేశ్ లో వర్షాలు దంచి కొడుతున్నాయి. రెండ్రోలుగా ఎడతెరిపి లేకుండా కురుస్తున్న వర్షాలతో నదులు ప్రమాదకరంగా ప్రవహిస్తున్నాయి. వరదనీటిలో వాగులు వంకలు కూడా ఉప్పొంగి ప్రవహిస్తూ జనావాసాలను ముంచెత్తుతున్నాయి. చెరువులు, కుంటలు, జలాశయాలు నిండుకుండలను తలపిస్తున్నాయి. ఇలా భారీ వర్షాలు వరదలకు దారితీసాయి...చాలాప్రాంతాలు ఇప్పటికే నీటమునిగాయి. ఇలా విజయవాడ నగరాన్ని కూడా వరదనీరు ముంచెత్తింది.
విజయవాడ సమీపంలోని బుడమనేరు ఉప్పొంగడంతో నగరం నీటమునిగింది. భారీగా చేరుతున్న వరదనీటితో ప్రమాదకరంగా మారిన బుడమేరు శనివారం రాత్రికి విజయవాడలోకి ప్రవేశించింది. అంతకంతకు వరద పెరగడంతో విజయవాడలోని పలు కాలనీలు నీటమునిగాయి. వరదనీరు ఇళ్లను చుట్టుముట్టడంతో విజయవాడవాసులు ప్రాణాలను అరచేతిలో పెట్టుకుని బిక్కుబిక్కుమంటూ జీవిస్తున్నారు.
ఇప్పటికే విజయవాడ పరిస్థితిని ముఖ్యమంత్రి నారా చంద్రబాబు నాయుడు స్వయంగా పరిశీలించారు. నీటమునిగిన ప్రాంతాలను పరిశీలించిన సీఎం అక్కడి ప్రజల దీనస్థితిని చూసారు. వెంటనే వరద ప్రభావిత ప్రాంతాల ప్రజలకు సహాయం చేయాలని... ప్రమాదకర స్థాయికి నీరు చేరిన కాలనీల్లోని ప్రజలను సురక్షిత ప్రాంతాలకు తరలించాలని ఆదేశించారు. అలాగే ఇళ్ళలోకి వరదనీరు చేరిన కాలనీల్లో తినడానికి ఆహారం, తాగునీరు అందించాలని చంద్రబాబు ఆదేశించారు.
ఇప్పటికే విజయవాడ నగరం నీటమునగగా...వర్షం ముప్పు ఇంకా పొంచివుందని వాతావరణ శాఖ హెచ్చరికల నేపథ్యంలో ప్రభుత్వం అప్రమత్తమైంది. నగరంలో పరిస్థితిని ఎప్పటికప్పుడు సమీక్షించి ప్రాంతాల వారిగా సహాయక చర్యలు చేపట్టేందుకు ఏర్పాట్లు చేసింది.విజయవాడలోని ప్రాంతాల వారీగా ప్రత్యేక అధికారులను ప్రభుత్వం నియమించింది.
క్షేత్రస్థాయిలో బాధితులకు అందుబాటులో వుంటూ ఎప్పటికప్పుడు సమాచారాన్ని ప్రభుత్వానికి అందించడం ప్రత్యేకంగా నియమించిన అధికారుల బాధ్యత. బాధితులకు అందించే పునరావాస కార్యక్రమాలను వీరే పర్యవేక్షించనున్నారు. ఏ ప్రాంతానికి ఏ అదికారిని నియమించారో ప్రకటించింన ప్రభుత్వం... ఆ ప్రాంతాల ప్రజలు సమాచారం అందించేలా అధికారి ఫోన్ నెంబర్ ను కూడా వెల్లడించింది.