సంక్రాంతి బరిలో రజనీకాంత్‌.. `లాల్‌ సలామ్‌` రిలీజ్‌ డేట్‌

ఆగస్ట్‌ లోనే `జైలర్`తో బాక్సాఫీసుని షేక్‌ చేశాడు రజనీకాంత్‌. ఇంకా ఆ ఊపు నుంచి ఆడియెన్స్ బయటకు రాలేదు. ఇప్పుడు సంక్రాంతికి టార్గెట్‌ ఫిక్స్ చేసుకున్నాడు. 

సూపర్‌ స్టార్‌ రజనీకాంత్‌.. గత నెలలో `జైలర్‌`తో బ్లాక్ బస్టర్‌ హిట్‌ కొట్టారు. ఇది కోలీవుడ్‌ ఇండస్ట్రీ హిట్‌గా నిలిచింది. ఏకంగా ఆరువందల కోట్లకుపైగా కలెక్షన్లని సాధించింది. చాలా కాలం తర్వాత రజనీకి సరైన హిట్‌ పడింది. ఆయన రేంజ్‌ ఏంటో బాక్సాఫీసుకి చూపించింది. ఈ చిత్రం తర్వాత ఇప్పుడు రెండు మూడు సినిమాలను లైనప్‌లో పెట్టారు రజనీ. లోకేష్‌ కనగరాజ్‌ దర్శకత్వంలో ఓ సినిమా, `జై భీమ్‌` దర్శకుడు జ్ఞానవేల్‌తో మరో సినిమా చేయబోతున్నారు. ఇందులో ఏది మొదట ప్రారంభమవుతుందనేది ఆసక్తికరంగా మారింది. 

ఈ నేపథ్యంలో సడెన్‌గా మరో సినిమాతో రాబోతున్నారు. రజనీకాంత్‌.. తన కూతురు ఐశ్వర్య రజనీకాంత్‌ రూపొందిస్తున్న `లాల్‌ సలార్‌` చిత్రంలో కీలక పాత్ర పోషిస్తున్నారు. ఈ చిత్రం రిలీజ్‌ డేట్ ని ప్రకటించారు. సంక్రాంతికి ఈ సినిమాని విడుదల చేయబోతున్నట్టు టీమ్‌ వెల్లడించారు. ఇందులో  ముంబయి డాన్‌ మొయిద్దీన్ భాయ్‌గా సూప‌ర్‌స్టార్ ర‌జినీకాంత్ న‌టిస్తుండ‌టం విశేషం. ర‌జినీకాంత్ కీల‌క పాత్ర‌లో న‌టిస్తోన్న ఈ చిత్రంలో విష్ణు విశాల్‌, విక్రాంత్‌, జీవితా రాజశేఖర్, క్రికెట్ లెంజెండ్ క‌పిల్ దేవ్ త‌దిత‌రులు న‌టించారు.

లైకా సంస్థ నిర్మిస్తున్న ఈ చిత్రం ప్ర‌స్తుతం పోస్ట్ ప్రొడ‌క్ష‌న్ జ‌రుగుతున్నాయి. ఈ సినిమాను 2024 సంక్రాంతికి విడుద‌ల చేయ‌బోతున్నట్లు లైకా ప్రొడ‌క్ష‌న్స్ ప్ర‌క‌టించింది. రీసెంట్‌గా జైల‌ర్‌తో బ్లాక్ బ‌స్ట‌ర్ హిట్ కొట్టిన తలైవ‌ర్ ఇప్పుడు `లాల్ సలాం`తో సంక్రాంతికి అల‌రించ‌నుండ‌టంతో ఆయ‌న అభిమానుల‌తో పాటు సినీ ప్రేక్ష‌కుల్లోనూ అంచ‌నాలు పీక్స్‌కు చేరుకున్నాయి. 

ఈ సంద‌ర్భంగా లైకా ప్రొడ‌క్ష‌న్స్ ప్ర‌తినిధులు మాట్లాడుతూ `సూప‌ర్‌స్టార్ రజినీకాంత్‌గారితో మా అనుబంధం కొన‌సాగుతుండ‌టం మాకెంతో ఆనందంగానూ, గ‌ర్వంగానూ ఉంది. మా రిక్వెస్ట్ మేర‌కు ఆయ‌న ఈ చిత్రంలో ఓ ప‌వ‌ర్‌ఫుల్ పాత్ర‌లో న‌టించారు. సినిమాకు సంబంధించిన ప్రీ ప్రొడ‌క్ష‌న్ ప‌నులు శ‌ర‌వేగంగా జ‌రుగుతున్నాయి. వ‌చ్చే ఏడాది సంక్రాంతికి ఈ  చిత్రాన్ని ప్ర‌పంచ వ్యాప్తంగా గ్రాండ్ లెవ‌ల్లో విడుద‌ల చేయ‌టానికి స‌న్నాహాలు చేస్తున్నాం` అని అన్నారు.

ఇదిలా ఉంటే సంక్రాంతికి భారీగా సినిమాలు పోటీ పడుతున్నాయి. తెలుగులో నాలుగైదు సినిమాలున్నాయి. అటు కోలీవుడ్‌లోనూ భారీ చిత్రాలున్నాయి. ఈ నేపథ్యంలో వాటన్నింటికీ ఇప్పుడు `లాల్‌ సలామ్‌` పోటీనివ్వబోతుంది. దీంతో సంక్రాంతి మరింత రణరంగంగా మారబోతుందని చెప్పొచ్చు.