రాజకీయాల్లోకి ప్రీతి జింటా, బీజేపీలో చేరబోతోందా? క్లారిటీ ఇచ్చిన హీరోయిన్

ఒకప్పటి స్టార్ హీరోయిన్ ప్రీతీ జింటా రాజకీయాల్లోకి రాబోతున్నారా? ఆమె బీజేపీలో చేరబోతున్నారా? పొలిటికల్ ఎంట్రీ గురించి ఆమె ఏమన్నారు? సోషల్ మీడియాలో వస్తున్న వార్తలపై ఆమె ఏం క్లారిటీ ఇచ్చారు.   

బాలీవుడ్ నటి, ఐపీఎల్ జట్టు పంజాబ్ కింగ్స్ యజమాని ప్రీతి జింటా రాజకీయాల్లోకి రావచ్చనే ఊహాగానాలు వస్తున్నాయి. త్వరలోనే ఆమె భారతీయ జనతా పార్టీలో చేరవచ్చని కూడా ప్రచారం జరుగుతోంది. గత కొంతకాలంగా ప్రీతి జింటా సోషల్ మీడియా పోస్టుల కారణంగా ఇలాంటి ఊహాగానాలు వస్తున్నాయి. నటి స్వయంగా ఈ ఊహాగానాలకు చెక్ పెట్టారు. సోమవారం ఓ ట్విట్టర్ యూజర్‌కి ఆమె సమాధానమిచ్చారు. ఆ యూజర్ ఆమెను రాజకీయాల గురించి ప్రశ్నించారు.

బీజేపీలో చేరతారా? ప్రీతి జింటా ఏమన్నారంటే..

సోమవారం సోషల్ మీడియాలో #pzchat సెషన్‌ను నిర్వహించి అభిమానుల ప్రశ్నలకు సమాధానమిచ్చారు. ఈ సందర్భంగా ఓ అభిమాని, “మీరు త్వరలో బీజేపీలో చేరబోతున్నారా? గత కొన్ని నెలలుగా మీ ట్వీట్‌లు అలాగే అనిపిస్తున్నాయి” అని ప్రశ్నించారు. దీనికి ప్రీతి జింటా సమాధానమిస్తూ, "సోషల్ మీడియాలో ప్రజలతో ఇదే సమస్య. ఈ మధ్య అందరూ చాలా తీర్పులు చెప్పేస్తున్నారు. నేను గతంలో చెప్పినట్లుగా, ఆలయం/మహాకుంభ్‌కి వెళ్లడం, నేను ఎవరో, నా గుర్తింపు ఏమిటో గర్వించడం అంటే నేను రాజకీయాల్లోకి వెళ్తున్నానని లేదా బీజేపీలో చేరుతున్నానని కాదు. భారతదేశం వెలుపల నివసించడం వల్ల నా దేశం యొక్క నిజమైన విలువ నాకు తెలిసింది. ప్రతి ఒక్కరిలాగే నేను కూడా భారతదేశాన్ని, భారతీయ సంస్కృతిని ఎక్కువగా అభినందిస్తున్నాను" అని రాసుకొచ్చారు.

ప్రీతి జింటాకు పలు పార్టీల నుంచి ఆఫర్లు!

ఈ ఏడాది ఫిబ్రవరిలో ప్రీతి జింటా ఈ విషయంలో క్లారిటీ ఇచ్చారు. తాను రాజకీయాల్లోకి రానని స్పష్టం చేశారు. పలు రాజకీయ పార్టీలు తనకు టికెట్లు ఆఫర్ చేశాయని కూడా ఆమె వెల్లడించారు. తన X పోస్ట్‌లో ఓ యూజర్ కామెంట్‌కు సమాధానమిస్తూ, నేను రాజకీయాల్లోకి రావడం లేదు. గత కొన్నేళ్లుగా చాలా రాజకీయ పార్టీలు నాకు టికెట్లు, రాజ్యసభ సీటు ఆఫర్ చేశాయి. కానీ నేను మర్యాదపూర్వకంగా తిరస్కరించాను. ఎందుకంటే అది నేను కోరుకునేది కాదు. నన్ను సైనికురాలు అని పిలవడం పూర్తిగా తప్పు కాదు. ఎందుకంటే నేను సైనికుడి కుమార్తెని, సైనికుడి సోదరిని. మేము సైనిక పిల్లలు, సైన్యం పిల్లలు కొంచెం భిన్నంగా ఉంటాము. మేము ఉత్తర భారతీయులు లేదా దక్షిణ భారతీయులు లేదా హిమాచలీ లేదా బెంగాలీ మొదలైనవారు కాదు. మేము కేవలం భారతీయులం. దేశభక్తి, మన దేశం పట్ల గర్వం మన రక్తంలోనే ఉంది" అని రాసుకొచ్చారు.

ఇక ప్రీతి సినిమాల  విషయానికొస్తే.. ప్రీతి జింటా తదుపరి చిత్రం 'లాహోర్ 1947'. ఇందులో సన్నీ డియోల్ సరసన ఆమె నటిస్తున్నారు. ఆమిర్ ఖాన్ ఫిల్మ్స్ పతాకంపై నిర్మితమవుతున్న ఈ చిత్రానికి రాజ్‌కుమార్ సంతోషి దర్శకత్వం వహిస్తున్నారు. ప్రస్తుతానికి ఈ సినిమా విడుదల తేదీ ప్రకటించలేదు.