తాను పవన్ భార్యను కాదని..ఎన్నటికీ కాలేనని చెప్తున్న రేణుదేశాయ్

రేణు దేశాయిపై పవన్ కళ్యాణ్ అభిమానులకు ప్రత్యేక గౌరవం సోషల్ మీడియాలో తనను వదిన అంటూ గౌరవించే అభిమానులు మళ్లీ పవన్ కళ్యాణ్ తో కలిసి ఉండడాలని కోరుకునే అభిమానులు తాను ఎప్పటికీ పవన్ కళ్యాణ్ భార్యను కాలేనని చెప్తున్న రేణుదేశాయ్ 

తెలుగు సినీ పరిశ్రమలోనే కాక రాజకీయాల్లోనూ పవన్ కళ్యాణ్ అంటే ఓ ప్రత్యేక స్థానం. లక్షల మంది అభిమానులను సంపాదించుకున్న పవన్ కళ్యాణ్ తన వైవాహిక జీవితంలో మాత్రం కాస్త తడబడుతూ వచ్చారు. అయితే.. తాజాగా ఇవనోవాతో పవన్ కళ్యాణ్ వైవాహిక బంధం మూడు పువ్వులు ఆరుకాయల్లా సాగుతోంది. ఈ సందర్భంలో పవన్ కళ్యాణ్ అభిమానులు మాత్రం ఆయన రెండో భార్య రేణు దేశాయి పై ప్రేమ, వాత్సల్యాలు కురిపిస్తూనే ఉంటారు. ఎందుకంటే పవన్ కళ్యాణ్ ను ప్రేమించి పెళ్లి చేసుకున్న రేణు దేశాయి విడిపోయినా కూడా పవన్ కళ్యాణ్ ను ప్రేమిస్తూనే ఉంటుంది. అందుకే ఆమెపై అభిమానులకు అంత గౌరవం. విడిపోవడానికి కారణాలేవైనా మళ్లీ కలవాలని అభిమానులు కోరుకోవడంతో తప్పులేదు. అయితే ఆమె ఈ విషయంపై మరోసారి క్లారిటీ ఇచ్చే ప్రయత్నం చేశారు.

విడాకులు తీసుకున్న తర్వాత కూడా మళ్లీ కలువాలని ఫ్యాన్స్ చేసిన రిక్వెస్ట్‌ను ఆమె సున్నితంగా తోసిపుచ్చింది. తనకు పవన్ ప్రస్తుతం మంచి మిత్రుడని, అయితే తనతో వైవాహిక బంధం మళ్లీ చిగురించదని ఆమె స్పష్టం చేసింది. సోషల్ మీడియాలో తమపై కురిపిస్తున్న అభిమానానికి ధన్యురాలిని అని సంతోషాన్ని వ్యక్తం చేసింది. గత కొద్దికాలంగా పవన్ నుంచి విడిపోయి దూరంగా ఉంటున్న రేణుదేశాయ్ ఇటీవల మీడియాతో మాట్లాడుతూ తన రెండో పెళ్లిపై స్పందించినట్టు ప్రచారం జరుగుతోంది.

అయితే ఆమె అభిమానులనుద్దేశించి.. నాలుగేళ్లుగా ఫేస్‌బుక్, ట్విటర్‌ లాంటి సోషల్‌ మీడియాలో నా వ్యక్తిగత జీవితానికి సంబంధించి వరుసగా ఎన్నో అభ్యర్థనలు, విన్నపాలు ఎడతెరిపి లేకుండా వస్తూనే ఉన్నాయి. నేను నా ఇంటర్వ్యూల్లో, సోషల్‌ మీడియాలో ఎన్నిసార్లు వివరణ ఇచ్చినా ఇవి ఆగడం లేదు. అందుకే మరోసారి చాలా స్పష్టంగా నా అభిప్రాయాన్ని చెప్పడానికి ఈ పోస్ట్‌ పెడుతున్నాను అని రేణుదేశాయ్ పేర్కొన్నారు.

దీనిలో ‘మిత్రులకు, నా శ్రేయోభిలాషులందరికీ నమస్కారం... మీరు నిరంతరం నా పట్ల చూపిస్తున్న ప్రేమాభిమానాలకు, నాకు అందిస్తున్న సహాయ సహకారాలకు నా హృదయపూర్వక కృతజ్ఞతలు తెలియజేసుకుంటున్నాను. నా వ్యక్తిగత జీవితం గురించి మీ అందరికీ ఒక విజ్ఞప్తి చేయాలనుకుంటున్నాను. కల్యాణ్‌గారు నాలుగు సంవత్సరాల క్రితం ‘ఆనా'ను పెళ్లి చేసుకున్నారు. వారికి ఒక చక్కటి కూతురు కూడా ఉంది. అని వివరించారు.

పవన్ కల్యాణ్ వివాహ బంధాన్ని, ఆయన కుమార్తెకు జన్మనిచ్చిన తల్లిని గౌరవిస్తూ నేను మీకు చేసుకునే విన్నపం ఒక్కటే. నేను, కల్యాణ్‌గారు తిరిగి ఏకం కావాలని మీరు పదేపదే కోరుకోవద్దు. దయచేసి మీరు ఒక విషయం అర్థం చేసుకుని ఆమోదించాలి. అదేంటంటే.. కల్యాణ్‌గారి భార్య అన్నా లెజోనోవా.. నేను కాదు.ఒకటి మాత్రం నిజం. ఆయన నా పిల్లలకు తండ్రి. నేనూ ఆయన మంచి స్నేహితులం మాత్రమే. కానీ మేమెప్పటికీ తిరిగి భార్యాభర్తలం కాలేము. ఈ సత్యాన్ని నేను మనసా, వాచా, కర్మణా అంగీకరిస్తున్నాను అని వెల్లడించింది.

మీరు కూడా ఈ వాస్తవాన్ని అర్థం చేసుకుంటారని ఆశిస్తున్నాను. నన్ను తిరిగి కల్యాణ్‌గారి దగ్గరకు వెళ్లమని మాటిమాటికీ మీరు కోరడం సబబు కాదని గుర్తించాల్సిందిగా మనవి చేస్తున్నాను. మరో వైవాహిక బంధంలో ఉన్న ఆయన దగ్గరకు తిరిగి వెళ్ళడం అసమంజసం, అసాధ్యం, అర్థరహితం అని మీ అందరికీ తెలియజేస్తున్నాను. భవిష్యత్‌లో ఈ విషయమై ఎలాంటి ఇబ్బందులు కలిగించే ఒత్తిడితో కూడిన కోరికలేవీ మీ వద్ద నుంచి ఎదురు కావని ఆశిస్తున్నాను. ఎంతో నిజాయితీగా, మనస్ఫూర్తిగా మీకు నేను చేసిన ఈ విన్నపాన్ని సహృదయంతో అర్థం చేసుకుంటారని, ఎప్పటిలా మీ నిర్మలమైన స్నేహ వాత్సల్యాలను అందిస్తారని కోరుకుంటూ... రేణు దేశాయి అని ఫేస్‌బుక్‌'లో రేణూ దేశాయ్‌ పోస్ట్‌ చేసింది.

అయితే ఆ తర్వాత కూడా ‘మీరెంతైనా మా అన్న వైఫ్‌ కాబట్టి, మీ ఇద్దరూ కలవాలని కోరుకుంటాం. మిమ్మల్ని ఎప్పటికీ మా ‘వదిన'లానే భావిస్తాం' అంటూ కొందరు కామెంట్స్‌ పోస్ట్‌ చేయడం విశేషం. అలాగే, ‘మీ పోస్ట్‌ లో మీ బాధ తెలుస్తోంది' అని మరికొందరు, ‘మీ నిర్ణయాన్ని గౌరవిస్తాం' అని ఇంకొందరు తమ తమ అభిప్రాయాలను వ్యక్తం చేశారు.