రాజమౌళి నచ్చిన కథ తెస్తే.. నేను రెడీ అంటున్న ఎన్టీఆర్ ఇంటర్వ్యూ

రేపే ఎన్టీఆర్ త్రిపాత్రాభినయం చేసిన జైలవకుశ విడుదల గురువారం రిలీజ్ కానున్న జై లవకుశ పై ఫుల్ హైప్ సినిమాతోపాటు మరికొన్ని విషయాలు ఇంటర్వ్యూలో పంచుకున్న ఎన్టీఆర్

యంగ్ టైగర్ ఎన్టీఆర్ కెరీర్‌లో మొదటిసారిగా త్రిపాత్రాభినయం చేస్తున్న 'జై లవకుశ'  మూవీ ఇప్పటికే టీజర్స్, ట్రైలర్‌తో విశేష ప్రేక్షకాదరణ పొందింది. మాస్ లో మాంచి ఫాలోయింగ్ వున్న ఎన్టీఆర్ మూడు విభిన్న పాత్రల్లో ఎలా నటించాడో చూడాలనే ఆసక్తి అటు అభిమానుల్లోనే కాక ప్రేక్షకుల్లోనూ నెలకొంది. జైలవకుశ రేపు(సెప్టెంబర్ 21న) విడుదలకు సిద్ధంగా ఉంది.  ఈ సందర్భంగా ఎన్టీఆర్‌‌తో స్పెషల్ చిట్ చాట్..

‘జై లవ కుశ’తో మూడు సినిమాలు ఒకేసారి చేసినట్లున్నారు!
‘జై లవకుశ’ మూడు సినిమాలు కాదండీ..(నవ్వుతూ) వంద సినిమాలు ఒకేసారి చేసినట్లుంది. మూడు పాత్రల్లో నటించడానికి కష్టపడిన మాట నిజమే.. కానీ నటుడిగా తనను తాను ప్రూవ్ చేసుకునే అవకాశం వచ్చినప్పుడు కష్టపడాలి. ఈ సినిమా నా కెరీర్‌లో బెస్ట్ ఫిల్మ్ అని చెప్పగలను.

వరుస హిట్‌ల తరువాత లాంగ్ గ్యాప్ తీసుకుని ‘జై లవకుశ’ కథ ఓకే చేయడానికి కారణం?
బేసికల్లీ నేను ఎమోషనల్ పెర్సన్‌ని.. దర్శకుడు బాబీ ఈ సినిమా కథ చెబుతున్నప్పుడు మూడు పాత్రలు, భారీతనం వంటి విషయాల కంటే కథలోకి ఎమోషన్‌కు బాగా కనెక్ట్ అయ్యాను. ఆ తరువాతే మూడు పాత్రలు చేయడం ఎగ్జైటింగ్‌గా అనిపిస్తుంది. అందుకే 'జనతా గ్యారేజ్' తరువాత ఎన్ని కథలు విన్నప్పటికీ 'జై లవకుశ' సినిమానే చేయాలని నిర్ణయించుకున్నాను.

ఈ మూడు పాత్రల్లో మీకు నచ్చిన క్యారెక్టర్ ఏంటి?
మనం దేనికోసమైతే కష్టపడతామో.. దాని మీద ఇష్టం ఏర్పడుతుందని అంటారు. ఈ సినిమాలో నేను జై పాత్ర కోసం ఎక్కువ కష్టపడ్డాను కాబట్టి ఆ పాత్ర మీద ఇష్టం ఏర్పడింది. అలా అని మిగిలిన రెండు పాత్రలను తక్కువ చేయడం కాదు. కథలో జై,లవ, కుశల్లో ఏ పాత్రను పక్కన పెట్టినా సంపూర్ణత ఏర్పడదు.

జై పాత్రకు రిఫరెన్స్ ఏమైనా తీసుకున్నారా?
సినిమాలో లవ, కుశ పాత్రలు ప్లే చేయడానికి నాకు రిఫరెన్సులు ఉన్నాయి. లవుడి పాత్ర కోసం 'నాన్నకు ప్రేమతో'లో అభిరామ్ పాత్రను, కుశుడి పాత్రకు 'యమదొంగ' సినిమాలో రాజా క్యారెక్టర్‌ను రిఫరెన్సుగా తీసుకున్నాను. కానీ బాబీ డిజైన్ చేసిన 'జై' పాత్ర మాత్రం చాలా పెక్యులర్‌గా ఉంటుంది. రావణాసురుడిని ఆరాధించే క్యారెక్టర్. ఈ పాత్ర కోసం ఎలాంటి రిఫరెన్స్ తీసుకోలేదు. ఒక వ్యక్తిగా నేను కోచింగ్ అనే సిస్టమ్‌ను ఇష్టపడను. చాలా మంది నన్ను అడుగుతూ ఉంటారు. ఇంత బాగా చేస్తున్నారు కదా.. కొన్ని టిప్స్ చెప్పండి అని. నేను శిక్షణ ఇచ్చేవాడిని కాదు.. ఇంకా విద్యార్ధినే.

సీనియర్ ఎన్టీఆర్ గారు రావణాసురుడి పాత్రలో నటించారు కదా.. ఆయనను స్ఫూర్తిగా ఏమైనా తీసుకున్నారా?
నేను చిన్నప్పటినుండి తాతయ్య గారి సినిమాలు చూస్తూనే ఉన్నాను. ఇప్పుడు కొత్తగా ఇన్స్పైర్ అవ్వడం అనేది లేదు. నాకు ఎప్పుడూ ఆయనే ఇన్స్పిరేషన్. అయితే జై పాత్ర పోషణలో ఆయన్ను ఎక్కడా అనుకరించడం కానీ.. రావణుడిగా ఆయన వ్యవహార శైలి నాపై ప్రభావం చూపకూడదని మాత్రం చాలా జాగ్రత్తలు తీసుకున్నాను.

పౌరాణిక చిత్రాల్లో నటించే ఆలోచన ఏమైనా ఉందా?
తాత గారి తరహాలో నాకు కూడా పౌరాణిక చిత్రాల్లో నటించాలని ఉంది. ఆయన స్థాయిలో కాకపోయినా.. రావణుడిగా, కర్ణుడిగా, రాముడిగా, కృష్ణుడిగా పౌరాణిక పాత్రలు వెండితెరపై అద్భుతంగా పోషించాలనే ఆలోచన అయితే ఉంది. కానీ అంత పెద్ద స్కోప్ ఉన్న సినిమాలను హ్యాండిల్ చేసే దర్శకులు ఉండాలి కదా.. అలాంటి దర్శకుడు దొరికినప్పుడు ఖచ్చితంగా పౌరాణిక చిత్రాల్లో నటిస్తాను.

పూర్తి స్థాయి నెగెటివ్ రోల్‌లో నటిస్తారా?
నటుడిగా అన్ని రకాల పాత్రలు పోషించాలనేది నా కల. అయితే అది పాజిటివ్ క్యారెక్టరా? నెగెటివ్ క్యారెక్టరా? అనే తారతమ్యం నాకు లేదు. ఒక వేల మంచి విలన్ పాత్ర నాకు ఆఫర్ వస్తే ఏ మాత్రం ఆలోచించకుండా నటిస్తాను.

అభిమానులకు ఈ సినిమాపై అంచనాలు బాగా ఎక్కువగా ఉన్నాయి. వాటిని రీచ్ అవ్వగలరా?
అంచనాలు ఉండడం అనేది తప్పు కాదు. ఎంత వద్దనుకున్నా, కాదనుకున్నా మనిషి మీద మనిషికి అంచనాలు ఉంటాయి. అయితే నిజాయితీగల ప్రయత్నంతోనే దాన్ని అధిగమించగలం.

ఈ మధ్య సోషల్ మీడియాలో ఒకరి హీరోపై మరో హీరో అభిమాని కామెంట్స్ చేయడం, ట్రోలింగ్ అనేది బాగా ఎక్కువగా ఉంది. మీ స్పందన?
ఈ మధ్య సోషల్ మీడియాలో ఫ్యాన్స్ వార్స్ బాగా ఎక్కువయ్యాయి. నా ఫోటో పెట్టుకొని మరొక హీరో మీదనో, లేక వారి అభిమానుల మీదనో కామెంట్ చేసేవాడు నా అభిమాని అని ఎలా చెప్పగలం. అది ఫేక్ అకౌంట్ కావొచ్చు కదా.. ఎవరు ఒరిజినల్ ఫ్యాన్ అనే విషయం తెలియాలంటే అకౌంట్ హోల్డర్ ఫలానా హీరో ఫ్యాన్ అని సర్టిఫికేషన్ మొదలుపెట్టాలేమో(నవ్వుతూ..). సోషల్ మీడియాలో మంచి, చెడు రెండూ ఉంటాయి. కేవలం నా అభిమానులకు అందుబాటులో ఉండడానికే నేను సోషల్ మీడియాలో ఉన్నాను. మిగిలిన విషయాలను పెద్దగా పట్టించుకోను.

రాజమౌళి గారితో సినిమా ఎప్పుడు ఉంటుంది?
ఈ ప్రశ్న అందరూ అడుగుతూనే ఉన్నారు. అయితే అది నా చేతిలో లేదు. ఆయన కథ సిద్ధం చేసుకొని నేను రెడీ తారక్ అని ఎప్పుడైతే అంటారో. అప్పుడు నేను కూడా రెడీ.

రాజకీయాల్లోకి వెళ్ళే ఆలోచనలు ఏమైనా ఉన్నాయా?
రాజకీయాలపై ఇంత త్వరగా మాట్లాడడం కరెక్ట్ కాదని నా అభిప్రాయం. ఇప్పుడు నా ఫోకస్ మొత్తం సినిమాల మీదనే ఉంది. నేను వెళ్తానో.. వెళ్లనో.. తెలియని రంగం గురించి ఇప్పుడే మాట్లాడాలనుకోవడం లేదు.

తదుపరి సినిమా ఎవరితో ఉంటుంది?
త్రివిక్రమ్ గారితో చేయాలనుకుంటున్నాను. కానీ ఎప్పుడు మొదలవుతుందనే విషయం మాత్రం ఇప్పుడే చెప్పలేను.