F3 టికెట్ ధరలు.. అత్యాశకు పోకుండా మంచి పని చేశారు

అనిల్ రావిపూడి దర్శకత్వంలో తెరకెక్కిన ఎఫ్2 చిత్రం ఎంతటి ఘనవిజయం సాధించిందో అందరికీ తెలిసిందే. ఆ చిత్రానికి సీక్వెల్ గా ఎఫ్3 తెరకెక్కింది. మే 27న ఎఫ్ 3 చిత్రం గ్రాండ్ రిలీజ్ కి రెడీ అవుతోంది. దీనితో ప్రమోషన్స్ షురూ అయ్యాయి. ఇటీవల విడుదలైన ట్రైలర్ యూట్యూబ్ లో దూసుకుపోతోంది. ఎఫ్2 మించేలా ఎఫ్3 నవ్వులు పండించబోతున్నట్లు అర్థం అవుతోంది. 

ప్రస్తుతం టాలీవుడ్ లో అభిమానుల మధ్య టికెట్ ధరల గురించి ఎక్కువగా చర్చ జరుగుతోంది. అతి వృష్టి అన్నట్లు రెండు తెలుగు రాష్ట్రాల్లో టికెట్ ధరలు అమాంతం పెంచేశారు. ఇది చాలదన్నట్లు స్టార్ హీరోల సినిమాలు విడుదలైనప్పుడు తొలి వారంలో ఆయా సినిమాల బడ్జెట్ కి తగ్గట్లుగా టికెట్ ధరలు పెంచుకునే వెసులుబాటు ప్రభుత్వాలు కల్పిస్తున్నాయి. 

ఆర్ఆర్ఆర్ చిత్రానికి టికెట్ ధరలు ఏ స్థాయిలో పెరిగాయో అందరికి తెలిసిందే. అలాగే రాధే శ్యామ్ చిత్రానికి కూడా. ఆ తర్వాత వచ్చిన ఆచార్య చిత్రానికి కూడా టికెట్ మల్టీఫ్లెక్స్ లలో అదనంగా రూ 50, సింగిల్ స్క్రీన్స్ లో రూ 30 పెంచుకునేలా ప్రభుత్వాలు అనుమతి ఇచ్చాయి. కంటెంట్ బావున్న చిత్రాలు నిలదొక్కుకుంటున్నాయి. కానీ యావరేజ్ గా, నెగిటివ్ టాక్ వస్తే మాత్రం సోమవారం నుంచే దారుణమైన దెబ్బ పడుతోంది. ఆచార్యకి ఆ పరిస్థితి చూశాం. ఈ స్థాయిలో టికెట్ టికెట్ కొని సినిమా చూసే బదులు ఓటిటిలో చూసుకుంటే పోలా అనే అభిప్రయానికి ఫ్యామిలీ ఆడియన్స్ వస్తున్నారు. దీనితో వసూళ్ల జోరు 2,3 రోజులకే ఆగిపోతోంది. 

ఈ పరిస్థితిని ఎఫ్3 టీం గుర్తించినట్లు ఉంది. ఎఫ్3 చిత్రానికి టికెట్ ధరలు పెంచకుండా సాధారణ ధరలతోనే రిలీజ్ చేయాలనే నిర్ణయానికి ఎఫ్3 నిర్మాతలు వచ్చినట్లు తెలుస్తోంది. ఎందుకంటే ఎఫ్3 లాంటి చిత్రానికి ఫ్యామిలీ ఆడియన్స్ చాలా కీలకం. లాంగ్ రన్ ముఖ్యం. వెంకటేష్ సినిమా అంటే ఫ్యామిలీ ఆడియన్స్ థియేటర్స్ కి కదులుతారు. టికెట్ ధరలు పెంచితే కొంతమంది ఆగిపోయే ప్రమాదం ఉంది. దీనితో నిర్మాతలు అత్యాశకు పోకుండా ఈ చిత్రాన్ని నార్మల్ రేట్స్ తోనే రిలీజ్ చేయాలనీ డిసైడ్ అయ్యారట. 

ఎఫ్2 చిత్రం ప్రస్తుతం ఉన్న టికెట్ ధరల కంటే తక్కువ ప్రైస్ తోనే 2019లో దాదాపు 80 కోట్ల షేర్ పిండుకుంది. ఎఫ్3 చిత్రానికి హిట్ టాక్ వచ్చి.. టికెట్ ధరలు రీజనబుల్ గా ఉంటే చాలు.. కలెక్షన్స్ వాటంతట అవే వస్తాయని భావిస్తున్నారు.