`హిట్‌2` ట్రైలర్‌పై రాజమౌళి ప్రశంసలు కురిపించారు. నాని `హిట్‌3`కి సంబంధించిన హింట్‌ ఇచ్చాడు. దీంతో ఇప్పుడు నెక్ట్స్ సినిమాలో ఎవరో తేలిపోయింది.
జనరల్‌గా సినిమా సిరీస్‌, ఫ్రాంఛైజీ అనేది హాలీవుడ్‌లో, ఇతర దేశాల సినిమాల్లో చూస్తుంటాం. మన వద్ద సీక్వెల్స్ తప్ప సిరీస్‌లు, ఫ్రాంఛైజీలు వచ్చింది లేదు. ఈ నేపథ్యంలో `హిట్‌` సినిమా ఫ్రాంఛైజీగా తీసుకురాబోతున్నట్టు నిర్మాత నాని, దర్శకుడు శైలేష్‌ కొలను ప్రకటించడంతో దీనిపై అందరిలోనూ ఆసక్తి నెలకొంది. `హిట్‌ 2` డిసెంబర్ 2న విడుదల కాబోతుంది. దీంతో మరింత ఉత్సుకత పెరుగుతుంది. ట్రైలర్‌ ఇప్పటికే ఆకట్టుకుంది.
ఇది రాజమౌళి వంటి దర్శకుడికి కూడా నచ్చింది. ఆయన సోమవారం జరిగిన ప్రీ రిలీజ్‌ ఈవెంట్‌లో సినిమాపై ప్రశంసలు కురిపించారు. విలన్‌ ఎవరనేది సస్పెన్స్ ఆసక్తిని క్రియేట్‌ చేస్తుందన్నారు. ఇలాంటి ఫ్రాంఛైజీ ఆలోచన చాలా గొప్ప నిర్ణయమని అందుకు నాని, దర్శకుడు శైలైష్‌, ప్రశాంతిలకు ఆయన అభినందనలు తెలిపారు. హిట్‌కి ఇప్పుడు అభిమానులు ఏర్పడ్డారని, హీరో ఎవరనేది కాకుండా సినిమా సిరీస్‌కి అభిమానులు ఏర్పడటం, అది ఇంత సక్సెస్‌ కావడం గొప్ప విషయమన్నారు. సినిమా ఆల్‌రెడీ హిట్‌ అయినట్టే అని చెప్పారు రాజమౌళి. అదే సమయంలో ప్రతి సినిమాని ప్రతి ఏడాది ఒక సీజన్‌లో విడుదల చేయాలని, అది `హిట్‌` సీజన్‌ అనే పేరు తీసుకురావాలన్నారు జక్కన్న.
ఇదిలా ఉంటే `హిట్‌ 2` ప్రీ రిలీజ్‌ ఈవెంట్‌లో నిర్మాత నాని పలు ఆసక్తికర విషయాలను షేర్‌ చేసుకున్నారు. నెక్ట్స్ సినిమాకి సంబంధించిన హింట్‌ ఇచ్చాడు. `హిట్‌ 2` క్లైమాక్స్ లో `హిట్‌3` హీరో ఎవరో రివీల్‌ అవుతుందని, క్లైమాక్స్ లో పెద్ద ట్విస్ట్ ఉంటుందని సినిమాపై అంచనాలను పెంచారు. ఊరించారు. ఇదిలా ఉంటే `హిట్‌3`లో విజయ్‌ సేతుపతి హీరోగా చేయబోతున్నారనే టాక్‌ వినిపిస్తుంది. ఆల్మోస్ట్ ఫైనల్‌ అయ్యారని, అది కూడా వెంటనే ప్రారంభించబోతున్నట్టు తెలిపారు.
అయితే ఇందులో అడవి శేషు కూడా కనిపిస్తారట. ఇటీవల ట్రైలర్‌ రిలీజ్‌ ఈవెంట్‌లోనూ ఆ విషయాన్ని స్పష్టం చేశారు. విజయ్‌ సేతుపతి మెయిన్‌రోల్‌ చేయబోతుండగా, మరో కీలక పాత్రలో అడవి శేష్‌ కనిపిస్తారని సమాచారం. `హిట్‌2`లోని కేడీ పాత్రకి కొనసాగింపుగా ఆయన పాత్ర ఉంటుందట. ఇదిలా ఉంటే ఇందులో నాని కూడా కనిపించబోతున్నారనేది మరో ట్విస్ట్. మరి ఆయన గెస్ట్ గా మెరుస్తారా? విలన్‌గా కనిపిస్తాడా? `హిట్‌ 4`కి హీరోగా మెరుస్తాడా? అనేది ఆసక్తికరంగా మారింది. ఇది అమెరికా బ్యాక్‌ డ్రాప్‌లో సాగుతుందని సమాచారం. ఇక మర్డర్‌ మిస్టరీ నేపథ్యంలో సస్పెన్స్ థ్రిల్లర్‌గా తెరకెక్కిన `హిట్‌ 2` అడవిశేషుతో మీనాక్షి చౌదరి హీరోయిన్‌గా నటిస్తుంది. డిసెంబర్ 2న తెలుగులో ఈ చిత్రాన్ని రిలీజ్‌ చేస్తున్నారు. కొన్ని రోజుల గ్యాప్‌తో హిందీలోనూ రిలీజ్‌ చేయబోతున్నారు.