మీరా మిథున్కి కోర్ట్ లో చుక్కెదురు.. బెయిల్ నిరాకరణ
సారాంశం
దళిత సినిమా మేకర్స్ పై అనుచిత వ్యాఖ్యలు చేసిన మోడల్, నటి మీరా మిథున్ ప్రస్తుతం జైల్లో మగ్గుతుంది. తాజాగా ఆమె పెట్టుకున్న బెయిల్ పిటీషన్ని కోర్ట్ కొట్టేసింది.
నటి మీరా మిథున్కి కోర్ట్ లో చుక్కెదురైంది. ఆమెకి బెయిల్ ఇచ్చేందుకు చెన్నై ప్రిన్సిపల్ సెషన్స్ కోర్ట్ నిరాకరించింది. ఆమెతోపాటు, స్నేహితుడు అభిషేక్ కూడా దాఖలు చేసుకున్న బెయిల్ పిటిషన్ని కోర్ట్ సోమవారం కొట్టేసింది. ఇటీవల ఆమె యూట్యూబ్కి ఇచ్చిన ప్రత్యేక ఇంటర్వ్యూలో దళితులను చిత్ర పరిశ్రమ నుంచి తరిమికొట్టాలంటూ పిలుపినిచ్చింది. దళిత దర్శకులు తీస్తున్న సినిమాల వల్ల చిత్ర పరిశ్రమ విలువ తగ్గిపోతుందంటూ వ్యాఖ్యానించింది. ఆమె వ్యాఖ్యలు దుమారం రేపాయి. సర్వత్రా విమర్శలు వచ్చాయి.
ఆమె వ్యాఖ్యలను సీరియస్గా తీసుకున్న వీసీకే పార్టీ నేత వన్నియరసు నగర పోలీసులకు ఫిర్యాదు చేశారు. దీంతో ఆమెపై పలు సెక్షన్ల కింద సెంట్రల్ క్రైమ్ బ్రాంచ్ పోలీసులు కేసు నమోదు చేయడంతో మీరా మిథున్ కేరళకు పారిపోయింది. ఆమె కోసం అన్వేషణ చేపట్టిన పోలీస్ బృందం.. ఆచూకీని తెలుసుకుని స్పెషల్ సైబర్ క్రైమ్ పోలీసులు కేరళకు వెళ్ళి ఆమెను అరెస్టు చేసి నగరానికి తీసుకొచ్చారు.
ప్రస్తుతం జైల్లో ఉన్న మీరా మిథున్... బెయిల్ కోరుతూ పిటిషన్ దాఖలు చేయగా దానిపై గత వారమే విచారణ జరిపిన కోర్టు సోమవారానికి వాయిదా వేసింది. ఈ నేపథ్యంలో ఈ పిటిషన్ మరోమారు విచారణకు రాగా మీరా మిథున్తో పాటు ఆమె స్నేహితుడు అభిషేక్ దాఖలు చేసుకున్న బెయిల్ పిటిషన్లను కొట్టివేసింది. దీంతో మరికొన్ని రోజులు జైల్లోనే మగ్గాల్సిన పరిస్థితి ఏర్పడింది.