హాస్య బ్రహ్మకి చిరు బర్త్ డే విషెస్.. ఇంటికెళ్లి మరీ గిఫ్ట్ తో సర్ప్రైజ్
సారాంశం
ప్రముఖ తెలుగు హాస్య నటుడు బ్రహ్మానందం నేడు తన పుట్టిన రోజుని జరుపుకుంటున్నారు. ఈ సందర్భంగా మెగాస్టార్ ఆయనకు ప్రత్యేకంగా బర్త్ డే విషెస్ తెలిపారు.
తెలుగు తెర హాస్య బ్రహ్మ.. నవ్వులతో తెలుగు చిత్ర పరిశ్రమని శాషించిన బ్రహ్మానందం నేడు(బుధవారం) 67వ పుట్టిన రోజు జరుపుకుంటున్నారు. దాదాపు వెయ్యికిపైగా చిత్రాల్లో నటించారు. గిన్నిస్ బుక్ ఆఫ్ రికార్డుల్లోకి ఎక్కారు. దాదాపు నాలుగున్నర దశాబ్దాలపాటు తెలుగు చిత్ర పరిశ్రమని ఏలారు బ్రహ్మానందం. ఇప్పుడు ఆయన జోరు తగ్గింది. ఆయన కూడా సెలక్టీవ్గా చేస్తున్నారు. ఈ నేపథ్యంలో నేడు బర్త్ డే సందర్భంగా బ్రహ్మానందానికి ప్రత్యేకంగా పుట్టిన రోజు శుభాకాంక్షలు తెలియజేశారు చిరంజీవి. అంతేకాదు గిఫ్ట్ తో సర్ప్రైజ్ చేశారు.
`నాకు తెలిసిన బ్రహ్మానందం అత్తిలిలో ఒక లెక్చరర్, ఈ రోజున బ్రహ్మానందం ప్రపంచంలోనే అత్యధిక చిత్రాల్లో నటించి, గిన్నీస్ బుక్ ఆఫ్ వరల్డ్ రికార్డ్స్ లో కెక్కిన ఒక గొప్ప హాస్యనటుడు. పద్మశ్రీ అవార్డు గ్రహీత. కామెడీకి నిలువెత్తు నిదర్శనం. అతను కామెడీ చేయాల్సిన అవసరం లేదు. అతని మొహం చూస్తేనే హాస్యం వెల్లివిరుస్తుంది. పొట్ట చెక్కలవుతుంది. ఇలాంటి బ్రహ్మానందానికి హృదయ పూర్వక శుభాభినందనలు.
బ్రహ్మానందం ఇలానే జీవితాంతం, నవ్వుతూ, పది మందిని నవ్విస్తూ ఉండాలని, బ్రహ్మానందంకి మరింత బ్రహ్మాండమైన భవిష్యత్ ఉండాలని, తన పరిపూర్ణ జీవితం ఇలాగే బ్రహ్మానందకరంగా సాగాలని మనస్ఫూర్తిగా ఆశిస్తూ, నా జన్మదిన శుభాకాంక్షలు` అని ట్వీట్ చేశారు చిరంజీవి. ఈ సందర్భంగా ఆయనకు వెంకటేశ్వరస్వామి విగ్రహాన్ని బహుమతిగా ఇచ్చారు. అయితే చిరంజీవి స్వయంగా ఇంటికెళ్లి మరి విషెస్ తెలియజేయడం విశేషం.
చిరుతోపాటు జబర్దస్త్ కమెడియన్లు కూడా ఉన్నారు. ముక్కు అవినాష్, రాంప్రసాద్, రాకెట్ రాఘవ, రచ్చ రవి వంటి యంగ్ కమెడియన్స్ ఉండటం విశేషం. వీరంతా దిగిన ఫోటోలను చిరంజీవి ట్విట్టర్ ద్వారా అభిమానులతో పంచుకున్నారు. చిరంజీవి సినిమాల్లో బ్రహ్మానందం ట్రాక్ చాలా పాపులర్. ఎన్నో సినిమాల్లో ఈ ఇద్దరు కలిసి చేసిన కామెడీ తెలుగు ఆడియెన్స్ ని కడుపుబ్బ నవ్వించింది.