బ్రహ్మానందం `గుర్రం పాపిరెడ్డి` టీజర్.. మరో జాతిరత్నంలా ఉందే? యోగిబాబుతో రచ్చ వేరే లెవల్
సారాంశం
బ్రహ్మానందం ప్రధాన పాత్రలో నటిస్తున్న మూవీ `గుర్రం పాపిరెడ్డి`. యోగిబాబు ముఖ్య పాత్ర పోషిస్తున్న ఈ చిత్రం టీజర్ విడుదలైంది. రచ్చ వేరే లెవల్లో ఉంది.
హాస్య బ్రహ్మ బ్రహ్మానందం ఇటీవల సినిమాలు తగ్గించారు. చాలా సెలక్టీవ్గానే చేస్తున్నారు. వాటిలో కూడా ఆయన పాత్రలకు పెద్దగా ప్రయారిటీ ఉండటం లేదు. అలా తళుక్కున మెరుస్తున్నారు. ఈ క్రమంలో ఇప్పుడు మరో ఫుల్ కామెడీ సినిమాతో వస్తున్నారు. తాజాగా ఆయన `గుర్రం పాపిరెడ్డి` మూవీలో నటించారు. బ్రహ్మీతోపాటు నరేష్ అగస్త్య, ఫరియా అబ్దుల్లా జంటగా, యోగిబాబు కీలకపాత్రలో నటిస్తున్నారు. మురళీ మనోహర్ దర్శకత్వంలో ఈ చిత్రం రూపొందింది. డా సంధ్య గోలీ సమర్పణలో వేణు సడ్డి, అమర్ బరా, జయకాంత్(బాబీ) సంయుక్తంగా నిర్మిస్తున్నారు.
`జాతిరత్నాలు`ని తలపించేలా `గుర్రం పాపిరెడ్డి `
డార్క్ కామెడీ థ్రిల్లర్గా రూపొందిన ఈ సినిమా టీజర్ని తాజాగా సోమవారం హైదరాబాద్లోని ఏఏఏ థియేటర్లో విడుదల చేశారు. విడుదలైన టీజర్ ఆద్యంతం నవ్వులు పూయించేలా ఉంది. ప్రారంభంలోనే బ్రహ్మానందం ఎంట్రీ నవ్వులు పూయించింది. ఆయన ఇందులో జడ్జ్ గా కనిపించారు. నరేష్ అగస్త్య కథ చెబుతుంటే `జాతిరత్నాలు`లోని పంచ్ డైలాగ్లను తలపించేలా ఆయన రియాక్షన్ ఉండటం విశేషం. అది కామెడీని పండించింది. నరేష్ అగస్త్య చెబుతున్న కథ ప్రకారం సినిమాలో సన్నివేశాలు చోటుచేసుకోవడం విశేషం. ఇందులో కామెడీ ఉంది, థ్రిల్లర్ ఉంది, హర్రర్ ఎలిమెంట్లు కూడా ఉన్నాయనిపిస్తుంది. చివర్లో యోగిబాబు ఎంట్రీ వేరే లెవల్లో ఉంది. టీజర్ నవ్వులు పూయించేలా ఉంది. పూర్తి స్థాయి డార్క్ కామెడీ థ్రిలర్గా దీన్ని తెరకెక్కించారు.
డిఫరెంట్ కామెడీ మూవీ గుర్రం పాపిరెడ్డిః బ్రహ్మానందం
త్వరలో విడుదల కాబోతున్న ఈ చిత్రం గురించి టీజర్ ఈవెంట్లో హాస్య బ్రహ్మ బ్రహ్మానందం మాట్లాడుతూ, "గుర్రం పాపిరెడ్డి" సినిమా నాకొక స్పెషల్ మూవీ. ఎందుకంటే యంగ్ స్టర్స్ అంతా కలిసి ఈ సినిమాను రూపొందించారు. ఈ చిత్రంలో జడ్జి పాత్రలో నటించాను. దర్శకుడు మురళీ మనోహర్ సినిమా అంటే ప్యాషన్ ఉన్నవాడు. నన్ను ఈ మూవీలో డిఫరెంట్ గా చూపించాడు. ప్రభాస్ శ్రీను, రాజ్ కుమార్ కాసిరెడ్డి, జీవన్ కుమార్ వీళ్లతో పాటు నేను మిమ్మల్ని నవ్వించేందుకు ప్రయత్నించాను. అలాగే యోగిబాబు ఈ మూవీకి స్పెషల్ అట్రాక్షన్. ఇవాళ తమిళ చిత్ర పరిశ్రమలో యోగిబాబుకు ఉన్న క్రేజ్ ఎలాంటిదో మనకు తెలుసు. ఇటీవల యోగిబాబు హీరోగా నటించిన ఓ కన్నడ చిత్రంలో నేను నటించాను. ఆయన బయట చాలా కామ్ గా ఉంటారు. ఈయన కామెడీ చేస్తారని అనుకోం. కానీ కామెడీని పండించడంలో దిట్ట. ఇలా వీళ్లందరితో కలిసి నటించడం మంచి ఎక్సీపీరియన్స్ ఇచ్చింది. కొత్త వాళ్లు ఇండస్ట్రీకి రావాలి. అప్పుడే మన సినిమా మరింత అభివృద్ధి చెందుతుంది. మంచి కామెడీతో సాగే థ్రిల్లర్ మూవీ ఇది` అని చెప్పారు బ్రహ్మానందం.
యోగిబాబు మాట్లాడుతూ, `గుర్రం పాపిరెడ్డి" సినిమా ద్వారా నేరుగా తెలుగు ఆడియెన్స్ ముందుకు రావడం హ్యాపీగా ఉంది. మా హీరో నరేష్, హీరోయిన్ ఫరియా, ప్రొడ్యూసర్స్, డైరెక్టర్ సహా మా టీమ్ అందరికీ నా విశెస్ చెబుతున్నా. బ్రహ్మానందంతో కలిసి నటించడం మంచి ఎక్స్ పీరియన్స్ ఇచ్చింది. నేను చేసిన `సార్ మేడమ్` సినిమాను తెలుగు ఆడియెన్స్ బాగా ఆదరిస్తున్నారు. ఈ చిత్రంలో కూడా మంచి క్యారెక్టర్ చేశాను. మీ అందరినీ ఎంటర్ టైన్ చేసేలా ఆ పాత్ర ఉంటుంది. "గుర్రం పాపిరెడ్డి" సక్సెస్ మీట్ లో తప్పకుండా తెలుగులో మాట్లాడుతా` అని తెలిపారు యోగిబాబు.
డైరెక్టర్ మురళీ మనోహర్ మాట్లాడుతూ, "గుర్రం పాపిరెడ్డి" సినిమా అనుకున్నప్పుడు జయకాంత్ ముందుండి, వేణు, అమర్ , సంధ్య ప్రాజెక్ట్ లోకి తీసుకొచ్చారు. ఈ సినిమాకు ప్రతి ఒక్కరూ ఇన్వాల్వ్ అయి పనిచేశారు. నరేష్, ఫరియా నుంచి దాదాపు 9 మంది టాప్ ఆర్టిస్టులు ఈ మూవీకి కంప్లీట్ గా సపోర్ట్ చేశారు. వాళ్లందరి సపోర్ట్ వల్లే సినిమా అనుకున్నట్లుగా సరైన టైమ్ లో కంప్లీట్ చేశాం. బ్రహ్మానందం క్యారెక్టర్ ద్వారానే కథ నెరేట్ అవుతుంది. ఆయన ద్వారానే ఈ పాత్రలన్నీ పరిచయం అవుతాయి` అని చెప్పారు.
హీరోయిన్ ఫరియా అబ్దుల్లా మాట్లాడుతూ , "గుర్రం పాపిరెడ్డి" సినిమాలో సౌధామిని అనే పాత్రలో నటించాను. బ్రహ్మానందం, యోగి బాబు వంటి పెద్దలతో కలిసి నటించడం హ్యాపీగా ఉంది. ఈ సినిమా నేను ఒప్పుకునేందుకు నరేష్ అగస్త్య ఒక రీజన్. ఇలాంటి మంచి నటుడితో మూవీ చేయాలని అనిపించేది. ఈ సినిమాలో నటించేప్పుడు ప్రొడ్యూసర్స్ మమ్మల్ని ఒక ఫ్యామిలీ మెంబర్ లా చూసుకున్నారు. మా మదర్ ఈ చిత్రంలో చిన్న అతిథి పాత్రలో నటించింది. ఈ సినిమాకు వర్క్ చేయడం సూపర్ ఎగ్జైట్ మెంట్ ఇచ్చింది. ఇందులో ఒక సాంగ్ చేస్తున్నా, ఆ పాట స్పెషల్ గా ఉంటుంది` అని చెప్పింది ఫరియా. ఈ కార్యక్రమంలో టీమ్ మొత్తం పాల్గొంటుందట.