IPL2022 RR vs KKR: సంజూ శాంసన్ హాఫ్ సెంచరీ... కేకేఆర్ ముందు ఈజీ టార్గెట్...

జిడ్డు బ్యాటింగ్‌తో విసిగించిన రాజస్థాన్ రాయల్స్ టాపార్డర్... సంజూ శాంసన్ హాఫ్ సెంచరీ...  సిమ్రాన్ హెట్మయర్ మెరుపులు మెరిపించినా... 

ఐపీఎల్ 2022 సీజన్‌లో ఇప్పటికే మూడు సెంచరీలు చేసిన జోస్ బట్లర్, సిక్సర్ల మోత మోగించిన బ్యాటర్లు పుష్కలంగా ఉన్న రాజస్థాన్ రాయల్స్... కోల్‌కత్తా నైట్‌రైడర్స్‌తో జరుగుతున్న మ్యాచ్‌లో జిడ్డు బ్యాటింగ్‌తో విసిగించారు. టాస్ ఓడి తొలుత బ్యాటింగ్ చేసిన రాజస్థాన్ రాయల్స్, నిర్ణీత 20 ఓవర్లలో 5 వికెట్లు కోల్పోయి 152 పరుగుల స్కోరు మాత్రమే చేయగలిగింది. 

ఈ సీజన్‌లో ఇప్పటికే 500+ పరుగులు చేసిన జోస్ బట్లర్ కూడా కోల్‌కత్తా నైట్‌రైడర్స్ బౌలర్లను ఎదుర్కోవడానికి తెగ ఇబ్బంది పడ్డట్టు కనిపించాడు... 5 బంతుల్లో 2 పరుగులు చేసిన ఓపెనర్ దేవ్‌దత్ పడిక్కల్, ఉమేశ్ యాదవ్ బౌలింగ్‌లో అతనికే క్యాచ్ ఇచ్చి అవుట్ అయ్యాడు. ఆ ఓవర్‌లో మిగిలిన 5 బంతులు ఎదుర్కొన్న సంజూ శాంసన్ పరుగులు చేయలేకపోవడంతో ఉమేశ్ యాదవ్‌కి మెయిడిన్ లభించింది...

ఉమేశ్ యాదవ్ వేసిన 5వ ఓవర్‌లో 15 పరుగులు రాబట్టిన సంజూ శాంసన్, బట్లర్ జోడి.. అనుకుల్ రాయ్ వేసిన 6వ ఓవర్‌లో 11 పరుగులు రాబట్టారు. దీంతో పవర్ ప్లే ముగిసే సమయానికి రాజస్థాన్ రాయల్స్ స్కోరు 38 పరుగులకు చేరుకుంది.

25 బంతులాడి 3 ఫోర్లతో 22 పరుగులు మాత్రమే చేసిన జోస్ బట్లర్, టిమ్ సౌథీ బౌలింగ్‌లో శివమ్ మావికి క్యాచ్ ఇచ్చి అవుట్ అయ్యాడు. టూ డౌన్‌లో వచ్చిన కరణ్ నాయర్ 13 బంతుల్లో ఓ ఫోర్‌తో 13 పరుగులు చేసి అనుకుల్ రాయ్ బౌలింగ్‌లో రింకూ సింగ్‌కి క్యాచ్ ఇచ్చి అవుట్ అయ్యాడు...

14వ ఓవర్ ఆఖరి బంతికి రియాన్ పరాగ్ సిక్స్ కొట్టడంతో 100 మార్కు అందుకుంది రాజస్థాన్ రాయల్స్. 12 బంతుల్లో ఓ ఫోర్, 2 సిక్సర్లతో 19 పరుగులు చేసిన రియాన్ పరాగ్, టిమ్ సౌథీ బౌలింగ్‌లో అవుట్ అయ్యాడు. 

ఆ తర్వాతి బంతికి సంజూ శాంసన్ కూడా అవుటై పెవిలియన్ చేరాడు. 49 బంతుల్లో 7 ఫోర్లు, ఓ సిక్సర్‌తో 54 పరుగులు చేసిన సంజూ శాంసన్, శివమ్ మావి బౌలింగ్‌లో రింకూ సింగ్‌కి క్యాచ్ ఇచ్చి అవుట్ అయ్యాడు. 

టిమ్ సౌథీ బౌలింగ్‌లో రెండు సిక్సర్లు బాదిన సిమ్రాన్ హెట్మయర్ 20 పరుగులు రాబట్టాడు. అయితే ఆఖరి ఓవర్ వేసిన శివమ్ మావి 10 పరుగులు మాత్రమే ఇచ్చాడు. సిమ్రాన్ హెట్మయర్ 13 బంతుల్లో ఓ ఫోర్, 2 సిక్సర్లతో 27 పరుగులు చేయగా రవిచంద్రన్ అశ్విన్ 5 బంతుల్లో 6 పరుగులు చేశాడు... 

కేకేఆర్ బౌలర్లలో టిమ్ సౌథీ రెండు వికెట్లు తీయగా అనుకుల్ రాయ్, శివమ్ మావి, ఉమేశ్ యాదవ్ తలా ఓ వికెట్ పడగొట్టారు. సునీల్ నరైన్ 4 ఓవర్లలో 19 పరుగులిచ్చి వికెట్లేమీ తీయలేకపోగా ఉమేశ్ యాదవ్ 4 ఓవర్లలో ఓ మెయిడిన్‌తో 24 పరుగులిచ్చి ఓ వికెట్ తీశాడు.