ప్రతాపం చూపని సూర్య, గ్రీన్ మళ్లీ ఫెయిల్... వెంటవెంటనే 4 వికెట్లు కోల్పోయిన ముంబై ఇండియన్స్...

IPL 2023: 76 పరుగులకే 5 వికెట్లు కోల్పోయి పీకల్లోతు కష్టాల్లో ముంబై ఇండియన్స్... ఆరంభం దక్కినా భారీ స్కోర్లు చేయలేకపోయిన ఇషాన్ కిషన్, రోహిత్ శర్మ.. 

ఐపీఎల్ 2023 సీజన్‌లో ముంబై ఇండియన్స్ బ్యాటర్ల పేలవ ఫామ్ కొనసాగుతోంది. ఆర్‌సీబీతో జరిగిన మ్యాచ్‌లో టాపార్డర్ వైఫల్యంతో 48 పరుగులకే 4 వికెట్లు కోల్పోయి పీకల్లోతు కష్టాల్లో పడింది ముంబై ఇండియన్స్. ప్రస్తుతం చెన్నై సూపర్ కింగ్స్‌తో జరుగుతున్న మ్యాచ్‌లోనూ కొద్దిగా మార్పు కనిపించినా, ఫ్యాన్స్ కోరుకున్న రిజల్ట్ అయితే రాలేదు.

టాస్ ఓడి తొలుత బ్యాటింగ్ మొదలెట్టిన ముంబై ఇండియన్స్, మొదటి 4 ఓవర్లలో 38 పరుగులు రాబట్టింది. 13 బంతుల్లో 3 ఫోర్లు, ఓ సిక్సర్‌తో 21 పరుగులు చేసిన రోహిత్ శర్మను తుషార్ దేశ్‌పాండే క్లీన్ బౌల్డ్ చేశాడు. కొన్నాళ్లుగా పేలవ ఫామ్‌ కొనసాగిస్తూ వస్తున్న ఇషాన్ కిషన్, నేటి మ్యాచ్‌లో పర్వాలేదనిపించాడు..

21 బంతుల్లో 5 ఫోర్లతో 32 పరుగులు చేసిన ఇషాన్ కిషన్, రవీంద్ర జడేజా బౌలింగ్‌లో డ్వేన్ ప్రిటోరియస్‌కి క్యాచ్ ఇచ్చి అవుట్ అయ్యాడు. 2 బంతుల్లో 1 పరుగు చేసిన సూర్యకుమార్ యాదవ్, మిచెల్ సాంట్నర్ బౌలింగ్‌లో అవుట్ అయ్యాడు..

అంపైర్ వైడ్ బాల్‌గా ప్రకటించినా వెంటనే డీఆర్‌ఎస్ తీసుకున్నాడు మహేంద్ర సింగ్ ధోనీ. మిచెల్ సాంట్నర్ వేసిన వైడ్ బంతిని ఆడేందుకు వెంటాడిన సూర్యకుమార్ యాదవ్ బ్యాటు ఎడ్జ్‌ని, గ్లవ్స్‌ని తాకుతూ వెళ్లిన బంతి, ధోనీ చేతుల్లో పడినట్టు బాల్ ట్రాకింగ్‌లో స్పష్టంగా కనిపించింది.. 

ఆస్ట్రేలియాతో జరిగిన వన్డే సిరీస్‌లో వరుసగా మూడు డకౌట్లు నమోదు చేసిన సూర్యకుమార్ యాదవ్, ఇంకా ఆ మూడ్ ఆఫ్ నుంచి బయటికి వచ్చినట్టు కనిపించడం లేదు. 11 బంతుల్లో ఓ ఫోర్‌తో 12 పరుగులు చేసిన కామెరూన్ గ్రీన్, రవీంద్ర జడేజా బౌలింగ్‌లో అతనికే క్యాచ్ ఇచ్చి అవుట్ అయ్యాడు...

సూర్యకుమార్ యాదవ్ అవుటైన తర్వాతి ఓవర్‌లో స్ట్రైయిక్ డ్రైవ్ కొట్టేందుకు ప్రయత్నించిన కామెరూన్ గ్రీన్, బౌలర్ రవీంద్ర జడేజా పట్టిన బ్లైండ్ క్యాచ్‌కి పెవిలియన్ చేరాడు. ఆ తర్వాత 4 బంతుల్లో 2 పరుగులు చేసిన అర్షద్ ఖాన్, మిచెల్ సాంట్నర్ బౌలింగ్‌లో ఎల్బీడబ్ల్యూగా అవుట్ అయ్యాడు.. 

 64 పరుగుల వద్ద రెండో వికెట్ కోల్పోయిన ముంబై ఇండియన్స్, 76 పరుగులకే 5 వికెట్లు కోల్పోయి పీకల్లోతు కష్టాల్లో పడింది..  పవర్ ప్లే ముగిసే సమయానికి వికెట్ నష్టానికి 61 పరుగులు చేసిన ముంబై ఇండియన్స్, 11 ఓవర్లు ముగిసే సమయానికి 5 వికెట్ల నష్టానికి 88 పరుగులే చేసింది.. ఒకానొక దశలో 170-200 స్కోరు దిశగా సాగుతున్నట్టు కనిపించిన ముంబై ఇండియన్స్, ఇప్పుడు 150+ స్కోరు చేయడమే కష్టంగా కనిపిస్తోంది..