IPL 2023: లక్నోను ఆదుకున్న స్టోయినిస్.. ఈజీ లక్ష్యమే అయినా ముంబైకి కష్టమే..!

IPL 2023, LSG vs MI: ఐపీఎల్-16 ప్లేఆఫ్స్ రేసులో ముంబైతో  కీలక మ్యాచ్ ఆడుతున్న లక్నో..  ఆరంభంలో తడబడ్డా చివర్లో మార్కస్ స్టోయినిస్ మెరుపులతో పుంజుకుని స్లో వికెట్ పై  పోరాడగలిగే లక్ష్యాన్ని ముంబై ఎదుట ఉంచింది. 

స్లో వికెట్ అయిన  లక్నో పిచ్ పై ముంబై ఇండియన్స్ తో కీలక మ్యాచ్ ఆడుతున్న  లక్నో  సూపర్ జెయింట్స్  తడబడింది.  ముంబై బౌలర్లు కట్టడి చేయడంతో లక్నో జట్టు  నిర్ణీత 20 ఓవర్లలో 3 వికెట్ల నష్టానికి 177 పరుగులు చేసింది.  ఆ జట్టులో మార్కస్ స్టోయినిస్ (47 బంతుల్లో 89 నాటౌట్,  4 ఫోర్లు, 8 సిక్సర్లు),  కృనాల్ పాండ్యా  (42 బంతుల్లో 49 రిటైర్డ్ హర్ట్, 1 ఫోర్, 1 సిక్స్ ) రాణించారు.  ఆఖర్లో స్టోయినిస్ రెచ్చిపోకుంటే  లక్నో స్కోరు 150 లోపే పరిమితమై ఉండేది.  

రెండో ఇన్నింగ్స్ లో మరింత నెమ్మదించే లక్నో పిచ్ పై ముంబైకి ఈ టార్గెట్ ను  ఛేదించడం ఈజీ అయితే కాదు.  లక్నో ఈ సీజన్ లో ఇక్కడ  గుజరాత్, ఆర్సీబీ చేతిలో  స్వల్ప లక్ష్యాలను కూడా ఛేదించలేదు. మరి స్ట్రాంగ్ బ్యాటింగ్ లైనప్ ఉన్న  ముంబై ఏం చేస్తుందో...?

టాస్ గెలిచి ఫస్ట్ బౌలింగ్ తీసుకున్న నిర్ణయం కరెక్టనని ముంబై బౌలర్లు నిరూపించారు.   ఈ సీజన్ లో వరుసగా విఫలమవుతున్న   దీపక్ హుడా  (5) మూడో ఓవర్ వేసిన జేసన్ బెహ్రాన్‌డార్ప్  బౌలింగ్ లో టిమ్ డేవిడ్ కు క్యాచ్ ఇచ్చాడు. ఫస్ట్ ఓవర్ లో  హుడా ఇచ్చిన క్యాచ్ నే మిస్ చేసిన డేవిడ్ రెండో సారి ఆ తప్పు చేయలేదు. 

హుడా స్థానంలో వచ్చిన  ప్రేరక్ మన్కడ్  (0) కూడా ఎదుర్కున్న తొలి బంతికే ఇషాన్ కిషన్ కు క్యాచ్ ఇచ్చాడు. 15 బంతులు ఆడి రెండు సిక్సర్ల సాయంతో  15 పరుగులు చేసిన ఓపెనర్  క్వింటన్ డికాక్   ను చావ్లా  ఏడో ఓవర్లో ఔట్ చేశాడు. 

పాండ్యా - స్టోయినిస్‌ల భాగస్వామ్యం.. 

35కే 3 కీలక వికెట్లు కోల్పోయిన  లక్నోను కెప్టెన్ కృనాల్ పాండ్యా,   మార్కస్ స్టోయినిస్ లు ఆదుకున్నారు.  ముంబై బౌలర్లు కవ్వించే బంతులు విసిరినా ఈ ఇద్దరూ తొందరపడలేదు. వికెట్  కాపాడుకుంటూ ఆడారు.  10 ఓవర్లు ముగిసేసరికి   78 పరుగులు చేసిన  లక్నో స్కోరు ఆ తర్వాత నెమ్మదించింది.   11 నుంచి 15 ఓవర్ల మధ్యలో  30 పరుగులే వచ్చాయి. ఈ ఇద్దరూ  నాలుగో వికెట్ కు   82 పరుగులు జోడించారు.  ఈ సీజన్ లో ఏ వికెట్ కు అయినా ఇదే అత్యుత్తమ భాగస్వామ్యం. 

కాలికి  గాయంతో నడవడానికి ఇబ్బందిపడ్డ  కృనాల్..    రిటైర్డ్ హార్ట్  గా పెవిలియన్ చేరాడు.  అతడి స్థానంలో క్రీజులోకి వచ్చిన  నికోలస్ పూరన్  (8 నాటౌట్) తో కలిసి  స్టోయినిస్ లక్నో ఇన్నింగ్స్ ను నడిపించాడు.   ఆకాశ్ మధ్వల్ వేసిన 17వ ఓవర్లో ఎల్బీడబ్ల్యూ ఔట్ నుంచి తప్పించుకున్న స్టోయినిస్..   జోర్డాన్ వేసిన  18వ ఓవర్లో  ఫస్ట్ బాల్  ను లాంగాన్ మీదుగా భారీ సిక్సర్ బాది అర్థ సెంచరీ పూర్తి చేసుకున్నాడు. హాఫ్ సెంచరీ తర్వాత స్టోయినిస్ మరింత చెలరేగాడు.   జోర్డాన్ వేసిన ఇదే ఓవర్లో  4, 4, 6, 4తో  లక్నో స్కోరును  150 మార్క్ కు చేర్చాడు. 

ఇక బెహ్రాన్‌డార్ఫ్ వేసిన  19వ ఓవర్లో  రెండు సిక్సర్లు కొట్టాడు స్టోయినిస్. ఆకాశ్ మధ్వల్ వేసిన ఆఖరి ఓవర్లో..  15 పరుగులివ్వడంతో   లక్నో 177 పరుగులు చేసింది.