IPL 2022 PBKS vs KKR: చితక్కొట్టిన ఆండ్రే రస్సెల్... కేకేఆర్‌కి రెండో విజయం...

14.3 ఓవర్లలో మ్యాచ్‌ని ముగించిన కోల్‌కత్తా నైట్‌రైడర్స్... సీజన్‌లో రెండో విజయం అందుకున్న కేకేఆర్... 8 సిక్సర్లతో రస్సెల్ విధ్వంసం... 

శ్రేయాస్ అయ్యర్ కెప్టెన్సీలో కోల్‌కత్తా నైట్‌రైడర్స్, సీజన్‌లో రెండో విజయాన్ని అందుకుంది. పంజాబ్ కింగ్స్‌తో జరిగిన మ్యాచ్‌లో 14.3 ఓవర్లలోనే 6 వికెట్ల తేడాతో ఘన విజయం అందుకుంది కేకేఆర్. అజింకా రహానే 11 బంతుల్లో 3 ఫోర్లతో 12 పరుగులు చేసి రబాడా బౌలింగ్‌లో అవుట్ అయ్యాడు...

ఐపీఎల్‌లో 4 వేల పరుగులు పూర్తి చేసుకున్న అజింకా రహానే, ఈ ఫీట్ సాధించిన 9వ భారత ప్లేయర్‌గా, ఓవరాల్‌గా 12వ ప్లేయర్‌గా నిలిచాడు. 

వెంకటేశ్ అయ్యర్ 7 బంతుల్లో 3 పరుగులు చేసిన ఓడియన్ స్మిత్ బౌలింగ్‌లో హర్‌ప్రీత్ బ్రార్‌కి క్యాచ్ ఇచ్చి అవుట్ అయ్యాడు. 15 బంతుల్లో 5 ఫోర్లతో 26 పరుగులు చేసిన కెప్టెన్ శ్రేయాస్ అయ్యర్, రాహుల్ చాహార్ బౌలింగ్‌లో రబాడాకి క్యాచ్ ఇచ్చి అవుట్ అయ్యాడు...

నితీశ్ రాణా డకౌట్ కావడంతో 51 పరుగులకే 4 వికెట్లు కోల్పోయింది కేకేఆర్. ఆండ్రే రస్సెల్, సామ్ బిల్లింగ్స్ కలిసి కేకేఆర్‌కి విజయాన్ని అందించారు. ఓడియన్ స్మిత్ వేసిన ఇన్నింగ్స్ 12వ ఓవర్‌లో నాలుగు సిక్సర్లు, ఓ ఫోర్‌తో 30 పరుగులు రాబట్టారు రస్సెల్, బిల్లింగ్స్...

26 బంతుల్లో హాఫ్ సెంచరీ పూర్తి చేసుకున్న ఆండ్రే రస్సెల్, 31 బంతుల్లో 2 ఫోర్లు, 8 సిక్సర్లతో 70 పరుగులు చేయగా సామ్ బిల్లింగ్స్ 24  బంతుల్లో ఫోర్, సిక్సర్‌తో 23 పరుగులు చేశాడు... 

రాహుల్ చాహార్ 4 ఓవర్లలో ఓ మెయిడిన్‌తో 13 పరుగులిచ్చి 2 వికెట్లు తీశాడు. 

అంతకుముందు టాస్ ఓడి తొలుత బ్యాటింగ్ చేసిన పంజాబ్ కింగ్స్, 18.2 ఓవర్లలో 137 పరుగులకి ఆలౌట్ అయ్యింది... సీఎస్‌కేతో జరిగిన మొదటి మ్యాచ్‌లో, ఆర్‌సీబీతో జరిగిన రెండో మ్యాచ్‌లో మొదటి ఓవర్‌లోనే వికెట్ తీసిన ఉమేశ్ యాదవ్... పంజాబ్ కింగ్స్‌తో మ్యాచ్‌లోనూ తొలి ఓవర్‌లోనే వికెట్ సాధించాడు...

5 బంతులాడి ఒక్క పరుగు చేసిన కెప్టెన్ మయాంక్ అగర్వాల్, ఉమేశ్ యాదవ్ బౌలింగ్‌లో ఎల్బీడబ్ల్యూగా అవుట్ అయ్యాడు. అయితే వన్‌డౌన్‌లో వచ్చిన భనుక రాజపక్ష వస్తూనే హిట్టింగ్‌కి దిగాడు. 9 బంతుల్లో 3 ఫోర్లు, 3 సిక్సర్లతో 31 పరుగులు చేశాడు రాజపక్ష...

శివమ్ మావి బౌలింగ్‌లో ఓ ఫోర్, వరుసగా మూడు సిక్సర్లు బాదిన రాజపక్ష, మరో భారీ షాట్‌కి ప్రయత్నించి టిమ్ సౌథీకి క్యాచ్ ఇచ్చి అవుట్ అయ్యాడు... అప్పటికి 4 ఓవర్లలోనే 33 పరుగులు చేసింది పంజాబ్ కింగ్స్. 

15 బంతుల్లో ఓ ఫోర్, ఓ సిక్సర్‌తో 16 పరుగులు చేసిన శిఖర్ ధావన్, టిమ్ సౌథీ బౌలింగ్‌లో సామ్ బిల్లింగ్స్‌కి క్యాచ్ ఇచ్చి పెవిలియన్ చేరాడు. 6 ఓవర్లు ముగిసే సమయానికి 3 వికెట్ల నష్టానికి 62 పరుగులు చేసింది పంజాబ్ కింగ్స్... అయితే పవర్ ప్లే ముగిసిన తర్వాత పంజాబ్ కింగ్స్ బ్యాటర్లు పరుగులు చేయడానికి ఇబ్బంది పడ్డారు...

9వ ఓవర్‌లో తిరిగి ఉమేశ్ యాదవ్‌కి బాల్‌ని అందించిన కేకేఆర్ కెప్టెన్ శ్రేయాస్ అయ్యర్, ఫలితం రాబట్టాడు. 16 బంతుల్లో ఓ ఫోర్, ఓ సిక్సర్‌తో 19 పరుగులు చేసిన లివింగ్‌స్టోన్, ఉమేశ్ యాదవ్ బౌలింగ్‌లో సౌథీకి క్యాచ్ ఇచ్చి పెవిలియన్ చేరాడు. ఆ తర్వాతి ఓవర్‌లో అండర్19 వరల్డ్ కప్ హీరో రాజ్ భవ 13 బంతుల్లో ఓ ఫోర్‌తో 11 పరుగులు చేసి నరైన్ బౌలింగ్‌లో అవుట్ అయ్యాడు...

రాజ్ భవ వికెట్‌తో పంజాబ్ కింగ్స్‌పై 32 వికెట్లు పూర్తి చేసుకున్న సునీల్ నరైన్, ఐపీఎల్‌లో ఒకే టీమ్‌పై అత్యధిక వికెట్లు తీసిన బౌలర్‌గా నిలిచాడు. ఇంతకుముందు ఈ రికార్డు లసిత్ మలింగ పేరిట ఉండేది. మలింగ, సీఎస్‌కేపై 31 వికెట్లు పడగొట్టాడు...

5 బంతులాడిన షారుక్ ఖాన్, సౌథీ బౌలింగ్‌లో డకౌట్ కాగా 15వ ఓవర్‌లో 2 వికెట్లు తీసి మెయిడిన్ ఓవర్‌ వేశాడు ఉమేశ్ యాదవ్. 18 బంతుల్లో ఓ ఫోర్, ఓ సిక్సర్‌తో 14 పరుగులు చేసిన హర్‌ప్రీత్ బ్రార్‌ని బౌల్డ్ చేసిన ఉమేశ్ యాదవ్, రాహుల్ చాహార్‌ని డకౌట్ చేశాడు...

4 ఓవర్లలో 23 పరుగులిచ్చి ఓ మెయిడిన్‌తో 4 వికెట్లు తీశాడు ఉమేశ్ యాదవ్. ఐపీఎల్ కెరీర్‌లో ఉమేశ్ యాదవ్‌కి ఇదే అత్యుత్తమ ప్రదర్శన. టిమ్ సౌథీ వేసిన 17వ ఓవర్‌లో రెండు ఫోర్లు, ఓ సిక్సర్‌తో 16 పరుగులు రాబట్టాడు కగిసో రబాడా. ఆ తర్వాతి ఓవర్‌లో ఓడియన్ స్మిత్ ఓ సిక్సర్, రబాడా రెండు ఫోర్లు బాదడంతో 17 పరుగులు వచ్చాయి...

16 బంతుల్లో 4 ఫోర్లు, ఓ సిక్సర్‌తో 25 పరుగులు చేసిన కగిసో రబాడా, ఆండ్రే రస్సెల్ బౌలింగ్‌లో సౌథీకి క్యాచ్ ఇచ్చి పెవిలియన్ చేరాడు. అర్ష్‌దీప్ సింగ్ రనౌట్ కావడంతో 137 పరుగుల వద్ద పంజాబ్ కింగ్స్ ఇన్నింగ్స్‌కి తెరపడింది.