గ్రూప్-ఏ బెర్త్‌లు ఖాయం.. రసవత్తరంగా గ్రూప్-బీ.. సూపర్ -12 వెళ్లే ఆ రెండు జట్లేవి..?

T20 World Cup 2022: టీ20 ప్రపంచకప్ లో అసలు సమరానికి వేళైంది.  ఈ ఆదివారం ప్రారంభమైన మెగా టోర్నీలో భాగంగా ప్రస్తుతం క్వాలిఫై రౌండ్ మ్యాచ్ లు జరుగుతున్నాయి. వీటిలో గ్రూప్ - ఏ నుంచి బెర్త్‌లు ఖాయమయ్యాయి. 

ఆస్ట్రేలియా వేదికగా జరుగుతున్న టీ20 ప్రపంచకప్ లో  రేపటితో  క్వాలిఫై రౌండ్ లు ముగియనున్నాయి.  ఈనెల 22 నుంచి సూపర్-12 పోటీలు ప్రారంభమవుతాయి. క్వాలిఫై రౌండ్ లో రెండు జట్ల నుంచి టాప్-2లో ఉన్న జట్లు ఈ దశకు అర్హత సాధిస్తాయి.  అర్హత రౌండ్ లో భాగంగా గ్రూప్ - ఏ (నమీబియా, శ్రీలంక, నెదర్లాండ్స్, యూనైటెడ్ అరబ్ ఎమిరేట్స్)   నుంచి శ్రీలంక (ఏ1), నెదర్లాండ్స్ (ఏ2) సూపర్-12కు క్వాలిఫై అయ్యాయి.  కానీ గ్రూప్-బీ లో  నాలుగు జట్ల మధ్య  ఆసక్తికర పోటీ నెలకొన్నది. 

గ్రూప్-బీలో స్కాట్లాండ్, జింబాబ్వే, వెస్టిండీస్, ఐర్లాండ్ జట్లున్నాయి. ఈ నాలుగు జట్లు ఒక్కో మ్యాచ్ ఆడి  ఒక మ్యాచ్ లో గెలిచి మరో మ్యాచ్ లో ఓడాయి. ఈ నాలుగు జట్ల నుంచి  టాప్-2 లో నిలిచే జట్లేవి..? అనేది  ఆసక్తికరంగా మారింది. 

ఈ నేపథ్యంలో  రేపు  గ్రూప్-బీలో  జరుగబోయే రెండు  మ్యాచ్ లు నాలుగు జట్లకు కీలకం కానున్నాయి. శుక్రవారం ఉదయం  ఐర్లాండ్-వెస్టిండీస్ మధ్య మ్యాచ్ జరగాల్సి ఉండగా.. మద్యాహ్నం స్కాట్లాండ్ - జింబాబ్వే మధ్య  మ్యాచ్ ఉంది.  ఈ రెండు మ్యాచ్ లలో గెలిచిన  విజేతలు సూపర్-12కు అర్హత సాధిస్తాయి.  

గ్రూప్- బీలో వెస్టిండీస్  తొలి మ్యాచ్ లో స్కాట్లాండ్ చేతిలో దారుణంగా ఓడి  తర్వాత మ్యాచ్ లో  జింబాబ్వేను ఓడించింది. రెండు సార్లు మాజీ ఛాంపియన్ అయిన విండీస్.. ఈ ప్రపంచకప్ లో క్వాలిఫై కావాలంటే రేపటి మ్యాచ్ తప్పకుండా నెగ్గాలి.  అయితే గత మ్యాచ్ లో  స్కాట్లాండ్ వంటి పటిష్ట జట్టుకు చుక్కలు చూపిన ఐర్లాండ్ ను తక్కువ అంచనా వేయడానికి లేదు.