పెసరట్టు వేసిన కేన్ విలియంసన్, డేవిడ్ వార్నర్, కేదార్ జాదవ్, విజయ్ శంకర్... డేవిడ్ భాయ్ క్రేజీ కామెంట్...

కిచెన్‌లో డేవిడ్ వార్నర్‌తో కలిసి పెసరట్లు వేసిన విజయ్ శంకర్, కేదార్ జాదవ్, కేన్ విలియంసన్... సన్‌రైజర్స్ హైదరాబాద్ పోస్టు చేసిన వీడియోకి... ‘నేను నిన్ను ప్రేమిస్తున్నాను’ అంటూ తెలుగులో కామెంట్ పెట్టిన డేవిడ్ వార్నర్...

ఐపీఎల్ 2021 సీజన్‌ ఫస్టాఫ్‌లో ఆశించిన స్థాయిలో రాణించలేకపోయింది సన్‌రైజర్స్ హైదరాబాద్. మొదటి ఏడు మ్యాచుల్లో ఒకే ఒక్క విజయం సాధించి, పాయింట్ల పట్టికలో ఆఖరి స్థానంలో నిలిచింది. ఐపీఎల్ సమయంలో సన్‌రైజర్స్ హైదరాబాద్ క్యాంపులో జరిగిన ఓ ఫన్నీ సంఘటనను పోస్టు చేసింది ఆరెంజ్ ఆర్మీ.

కిచెన్‌లో డేవిడ్ వార్నర్, విజయ్ శంకర్, కేదార్ జాదవ్, కేన్ విలియంసన్ కలిసి పెసరట్లు వేశారు. డేవిడ్ వార్నర్ పెసరట్టు వేస్తున్న సమయంలో కేన్ మామ వెనకాల నుంచి చెఫ్ క్యాప్ పెట్టాడు. ఆ తర్వాత పెసరట్టు టెస్టు చేసిన కేన్ విలియంసన్, తన చేత్తో పెసరట్టు వేశాడు.

ఈ ఫన్నీ పోటీలో కేన్ విలియంసన్ గెలిచినట్టు ప్రకటించాడు చెఫ్. ఈ వీడియోకి ‘నేను నిన్ను ప్రేమిస్తున్నాను...’ అని కామెంట్ చేసిన డేవిడ్ వార్నర్, కేన్ విలియంసన్‌ని ట్యాగ్ చేశాడు. ఫస్టాఫ్‌లో పర్ఫామెన్స్ ఆధారంగా డేవిడ్ వార్నర్‌ను కెప్టెన్సీ నుంచి తొలగించిన సన్‌రైజర్స్ యాజమాన్యం, కేన్ విలియంసన్‌కి కెప్టెన్‌గా బాధ్యతలు అప్పగించిన విషయం తెలిసిందే.