ఏషియన్ గేమ్స్ 2023: పాకిస్తాన్‌కి దక్కని కాంస్యం! ఇండియా- ఆఫ్ఘాన్ మ్యాచ్‌కి వరుణుడి అంతరాయం...
By Chinthakindhi Ramu | First Published Oct 7, 2023, 2:01 PM ISTAsian Games 2023: కాంస్య పతకం కోసం జరిగిన మ్యాచ్‌లో పాకిస్తాన్‌పై 6 వికెట్ల తేడాతో నెగ్గిన బంగ్లాదేశ్.. వర్షం కారణంగా నిలిచిన ఇండియా - ఆఫ్ఘనిస్తాన్ గోల్డ్ మెడల్ మ్యాచ్..
ఏషియన్ గేమ్స్ 2023 పోటీల్లో పాకిస్తాన్‌కి ఘోర పరాభవం ఎదురైంది. సెమీ ఫైనల్‌లో ఆఫ్ఘాన్ చేతుల్లో ఓడిన పాకిస్తాన్, కాంస్య పతక పోరులో బంగ్లాదేశ్ చేతుల్లో పరాజయం పాలైంది.
వర్షం కారణంగా 5 ఓవర్లకు కుదించిన మ్యాచ్‌లో తొలుత బ్యాటింగ్ చేసిన పాకిస్తాన్, 5 ఓవర్లలో వికెట్ నష్టపోయి 48 పరుగులు చేసింది. కుష్‌దిల్ షా 10 బంతుల్లో ఓ ఫోర్, ఓ సిక్సర్‌తో 14 పరుగులు చేసి అవుట్ అయ్యాడు. మిర్జా బైగ్ 18 బంతుల్లో 4 ఫోర్లు, 2 సిక్సర్లతో 32 పరుగులు చేయగా ఓమెర్ యూసఫ్ 2 బంతులాడి ఓ పరుగు చేశాడు..
Latest Videos
undefined
డక్ వర్త్ లూయిస్ పద్ధతి ప్రకారం బంగ్లాదేశ్ లక్ష్యాన్ని 5 ఓవర్లలో 65 పరుగులుగా నిర్ణయించారు. జాకీర్ హసన్, సైఫ్ హసన్ డకౌట్ కావడంతో 1 పరుగుకే 2 వికెట్లు కోల్పోయింది బంగ్లాదేశ్. అయితే అఫిఫ్ హుస్సేన్ 11 బంతుల్లో 3 ఫోర్లు, ఓ సిక్సర్‌తో 20 పరుగులు చేయగా యాసిర్ ఆలీ 16 బంతుల్లో 3 ఫోర్లు, 2 సిక్స్లతో 34 పరుగులు చేశాడు. ఆఖరి బంతికి ఫోర్ బాదిన రకీబుల్ హసన్.. బంగ్లాదేశ్‌కి కాంస్య పతకాన్ని అందించాడు..
ఇండియా- ఆఫ్ఘాన్ మధ్య జరుగుతున్న గోల్డ్ మెడల్ మ్యాచ్‌కి వరుణుడు అంతరాయం కలిగించాడు. వర్షం కారణంగా 20 నిమిషాలు ఆలస్యంగా టాస్ జరిగింది. మ్యాచ్ ప్రారంభమైన తర్వాత భారత బౌలర్లు అదరగొట్టడంతో 52 పరుగులకే 5 వికెట్లు కోల్పోయింది ఆఫ్ఘాన్..
జుబేద్ ఆక్బరీ 5, మహ్మద్ షాజాద్ 4, నూర్ ఆలీ జాద్రాన్ 1, ఆఫ్సర్ జజయ్ 15, కరీం జనత్ 1 పరుగు చేసి అవుట్ అయ్యారు. అయితే షాహీదుల్లా కమల్, కెప్టెన్ గుల్బాదీన్ నయిబ్ కలిసి ఆరో వికెట్‌కి 60 పరుగుల భాగస్వామ్యం జోడించారు.
వర్షం కారణంగా ఆట నిలిచే సమయానికి 18.2 ఓవర్లలో 5 వికెట్లు కోల్పోయి 112 పరుగులు చేసి ఆఫ్ఘనిస్తాన్. షాహీదుల్లా కమల్ 43 బంతుల్లో 3 ఫోర్లు, 2 సిక్సర్లతో 49 పరుగులు చేయగా గుల్బాద్దీన్ నయిబ్ 24 బంతుల్లో ఓ ఫోర్, 2 సిక్సర్లతో 27 పరుగులు చేసి క్రీజులో ఉన్నారు. వర్షం తగ్గితే ఓవర్లను కుదించి, డక్ వర్త్ లూయిస్ పద్ధతి ప్రకారం మ్యాచ్‌ని నిర్వహిస్తారు. వర్షం ఎంతకీ తగ్గకపోతే మెరుగైన ర్యాంకులో ఉన్న భారత్, స్వర్ణం పతకం గెలుస్తుంది..
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి