IND vs PAK: మరోసారి దాయాదుల పోరు.. వచ్చే రెండు ఆదివారాలూ ఫ్యాన్స్‌కు పండుగే..

Asia Cup 2022: ప్రపంచ క్రికెట్ లో అత్యంత క్రేజ్ ఉన్న మ్యాచ్ లలో భారత్-పాకిస్తాన్  మ్యాచ్ ఒకటి. ఏ ఫార్మాట్ లో మ్యాచ్ జరిగిన ఇరు జట్ల మధ్య హోరాహోరి పోరు తప్పదు. 

చిరకాల ప్రత్యర్థి పాకిస్తాన్ తో రెండ్రరోజుల క్రితం దుబాయ్ వేదికగా ముగిసిన పోరు  భారత్ తో పాటు క్రికెట్ అభిమానులను ఎంతగానో అలరించింది. చివరి ఓవర్ వరకూ ఫలితం తేలకపోవడంతో అందరూ ఈ మ్యాచ్ ను ఆసక్తిగా వీక్షించారు. టీ20 ప్రపంచకప్ కు కొద్దిరోజులు ముందు జరిగిన ఈ సమరం క్రికెట్ ఫ్యాన్స్ కు కావాల్సిన మజాను పంచింది. అయితే చాలాకాలంగా ఐసీసీ టోర్నీలలో మినహా ద్వైపాక్షిక సిరీస్ లు లేకపోవడంతో ఈ రెండు దేశాల మధ్య క్రికెట్ దాహం ఇప్పట్లో తీరేది కాదు. భారత్-పాక్ జట్ల మధ్య రానున్న రెండు ఆదివారాల్లో మరో రెండు భారీ మ్యాచ్ లు జరిగే అవకాశాలు మెండుగా ఉన్నాయి.  

ఆరు జట్లు తలపడుతున్న  ఆసియా కప్-2022లో జట్లను రెండు గ్రూపులుగా విభజించారు. గ్రూప్-ఏలో భారత్, పాకిస్తాన్, హాంకాంగ్ ఉన్నాయి. గ్రూప్-బీలో బంగ్లాదేశ్, శ్రీలంక, అఫ్గానిస్తాన్ ఉన్నాయి.

టోర్నీ నిబంధనల ప్రకారం.. గ్రూప్ దశలో ఒక్కో జట్టు గ్రూప్ లోని మిగిలిన రెండు జట్లతో ఒక్కో మ్యాచ్ ఆడతాయి. టాప్-2లో ఉన్న జట్లు సూపర్-4కు అర్హత సాధిస్తాయి.  ఇక సూపర్-4లో తమ గ్రూప్ లోని జట్టుతో పాటు  మరో గ్రూప్ లోని రెండు జట్లతో రెండు మ్యాచులు ఆడతాయి. ఈ లెక్కన గ్రూప్ స్టేజ్ లో ఇప్పటికే భారత్.. పాకిస్తాన్ ను  ఓడించింది. తర్వాత మ్యాచ్ లో భారత్.. ఆగస్టు 31న హాంకాంగ్ తో ఆడనుంది. ఈ మ్యాచ్ లో  ఏదైనా అనూహ్యం జరిగితే తప్ప భారత్ ఓడటం కష్టం. ఇక సెప్టెంబర్ 2న హాంకాంగ్.. పాకిస్తాన్ తో తలపడనుంది. ఈ మ్యాచ్ లోనూ పాక్ ఓడటం అతిశయోక్తే. 

దీని ప్రకారం సూపర్-4లో భారత్ గ్రూప్ ఏ నుంచి తొలి జట్టుగా వెళ్లడం లాంఛనమే. పాకిస్తాన్ రెండో జట్టుగా వెళ్లే అవకాశముంది. దీంతో సెప్టెంబర్ 4న ఈ రెండు జట్లు మళ్లీ పోటీ పడనున్నాయి. ఈ మ్యాచ్ ముగిశాక మిగిలిన గ్రూప్ లోని టాప్-2 (బీ1, బీ2)లతో కూడా భారత్, పాక్ లు మ్యాచ్ లు ఆడతాయి. ప్రస్తుత ఫామ్, సమీకరణాలను బట్టి చూస్తే ఒక్క అఫ్గాన్ తప్ప మిగిలిన జట్లేవీ భారత్, పాక్ కు పోటీనిచ్చే స్థితిలో లేవు. ఈ లెక్కన సెప్టెంబర్ 11న (ఆదివారం) భారత్-పాక్ మధ్య ఆసియా కప్ ఫైనల్ జరిగే అవకాశాలు మెండుగా ఉన్నాయి. 

ఈ ఏడాది అక్టోబర్ లో మెల్బోర్న్ వేదికగా టీ20 ప్రపంచకప్ లో  భాగంగా ఈ రెండు జట్లు ఢీకొనబోతున్నాయి. అంతకుముందే కేవలం 15 రోజుల వ్యవధిలో భారత్-పాక్ లు మధ్య ఈ మ్యాచ్ లు అభిమానులకు కావాల్సిన మజాను పంచుతాయనడంలో సందేహమే లేదు. 

ఇక ఆదివారం నాటి భారత్-పాకిస్తాన్ మ్యాచ్ విషయానికొస్తే..  టాస్ ఓడి తొలుత బ్యాటింగ్ చేసిన పాకిస్తాన్.. 19.5 ఓవర్లలో 147 పరుగులకు ఆలౌట్ అయింది. ఆ జట్టులో మహ్మద్ రిజ్వాన్ (43), ఇఫ్తికర్ అహ్మద్ (28) రాణించారు. భారత బౌలర్లలో భువనేశ్వర్ కుమార్ 4, హార్ధిక్ పాండ్యా 3, అర్ష్‌దీప్ సింగ్ 2 వికెట్లు తీయగా అవేశ్ ఖాన్ ఒక వికెట్ పడగొట్టాడు. స్వల్పలక్ష్య ఛేదనలో భారత్.. ఆదిలో తడబడింది. తొలి ఓవర్లోనే కెఎల్ రాహుల్ ను  నసీం షా డకౌట్ చేశాడు.  ఆ తర్వాత ఇన్నింగ్స్ ను కోహ్లీ (35) నిలబెట్టాడు. మిడిల్ లో వచ్చిన రవీంద్ర జడేజా (35)తో కలిసి హార్ధిక్ పాండ్యా (33 నాటౌట్) లాంఛనాన్ని పూర్తి చేశాడు. ఈ విజయంతో ఆసియా కప్ లో భారత్ బోణీ కొట్టింది.