AndhraPradesh: శ్రీసిటీలో ఎల్‌జీ రూ.5,840 కోట్లతో యూనిట్లు...2 వేల ఉద్యోగాలు!

తిరుపతి శ్రీసిటీలో ఎల్‌జీ రూ.5,840 కోట్లతో యూనిట్లు ఏర్పాటు చేయబోతుంది. మూడు సంవత్సరాల్లో 2,000 ఉద్యోగాలు కల్పించనుంది.

ఆంధ్రప్రదేశ్‌లో మరో ప్రముఖ ఎలక్ట్రానిక్స్ పరిశ్రమ స్థాపనకు ఏర్పాట్లు పూర్తయ్యాయి. ప్రపంచ ప్రఖ్యాతి గాంచిన ఎల్‌జీ సంస్థ తిరుపతి జిల్లా శ్రీసిటీలో భారీ స్థాయిలో పెట్టుబడి పెట్టేందుకు ముందుకొచ్చింది. మొత్తం రూ.5,840 కోట్ల వ్యయంతో కంపెనీ తయారీ కేంద్రాల నిర్మాణం ప్రారంభించనుంది.మొదటిగా, రూ.5,001 కోట్ల పెట్టుబడితో శ్రీసిటీ ప్రత్యేక ఆర్థిక మండలిలో ఒక ప్రధాన తయారీ యూనిట్‌ను నిర్మించనున్నారు. ఇందులో ఎయిర్ కండిషనర్లు, ఫ్రిజ్‌లు, వాషింగ్ మెషిన్లు వంటి ఎలక్ట్రానిక్ గృహోపకరణాలను తయారు చేయనున్నారు. దీని ద్వారా నేరుగా 2,000 మందికి ఉద్యోగావకాశాలు కల్పిస్తామని ఎల్‌జీ ఇప్పటికే ప్రకటించింది.

ఈజ్ ఆఫ్ డూయింగ్ బిజినెస్...

ఇందుకు తోడుగా మరో రూ.839 కోట్లతో ఐదు అనుబంధ యూనిట్లను కూడా ఏర్పాటుచేయనున్నారు. ఈ యూనిట్లకు గురువారం రాష్ట్ర ఐటీ, ఎలక్ట్రానిక్స్ మంత్రి నారా లోకేశ్ భూమిపూజ చేయనున్నారు.ఈ భారీ పెట్టుబడి వెనుక కీలక కారణం రాష్ట్ర ప్రభుత్వం అవలంబిస్తున్న పెట్టుబడిదారులకు అనుకూలమైన విధానాలేనని ఎల్‌జీ ప్రతినిధులు స్పష్టం చేశారు. గత ఏడాది సెప్టెంబర్‌లో జపాన్‌ నుంచి వచ్చిన కంపెనీ ప్రతినిధులు నారా లోకేశ్‌ను కలిసి రాష్ట్రంలో ఉన్న అవకాశాలపై చర్చించారు. రాష్ట్రంలో "ఈజ్ ఆఫ్ డూయింగ్ బిజినెస్"ను "స్పీడ్ ఆఫ్ డూయింగ్ బిజినెస్"గా మార్చే విధంగా తీసుకుంటున్న చర్యలు వారికి ఎంతో ఆకర్షణగా అనిపించాయి.

రాయలసీమను ఎలక్ట్రానిక్స్ కేంద్రంగా అభివృద్ధి చేయాలన్న ఉద్దేశంతో ఈ పరిశ్రమ శ్రీసిటీలో స్థాపించబడుతోంది. ఇప్పటికే అక్కడ మౌలిక సదుపాయాలు సిద్ధంగా ఉండటం వల్ల ఎల్‌జీ ఎయిర్ కండిషనర్ ప్లాంట్‌ను అక్కడ ఏర్పాటు చేయాలని నిర్ణయించింది.ఇక రాష్ట్రంలో ఏర్పడిన నూతన కూటమి ప్రభుత్వం పదిహేనో నెలలోనే రూ.8 లక్షల కోట్ల విలువైన పెట్టుబడులపై అవగాహన ఒప్పందాలు చేసుకుంది. వాటి ద్వారా మొత్తం 5 లక్షల ఉద్యోగాలు సృష్టించబోతున్నారు. ఇప్పటికే టీసీఎస్, ఎన్టీపీసీ, టాటా పవర్, రిలయన్స్ లాంటి ప్రముఖ సంస్థలు రాష్ట్రంలో తమ కార్యకలాపాలు ప్రారంభించాయి. తదుపరి దశలో రిలయన్స్ రూ.65,000 కోట్లతో గ్రీన్ ఎనర్జీ రంగంలో 500 యూనిట్లను స్థాపించనుంది.ఈ దశలో ఎల్‌జీ వంటి అంతర్జాతీయ కంపెనీ పెట్టుబడి నిర్ణయం రాష్ట్ర అభివృద్ధికి మరింత బలాన్నిచ్చే అంశంగా ప్రభుత్వం భావిస్తోంది.