అయ్యన్నపాత్రుడి ఇంటిని చుట్టుముట్టిన పోలీసులు.. నర్సీపట్నంలో హై టెన్షన్

మాజీ మంత్రి, టీడీపీ సీనియర్ నేత అయ్యన్నపాత్రుడు ఇంటి గోడను మున్సిపల్ సిబ్బంది కూల్చివేశారు. పంట కాల్వను అక్రమించి గోడ నిర్మించారని మున్సిపల్ సిబ్బంది చెబుతున్నారు. ఈ క్రమంలోనే అయ్యన్నపాత్రుడి ఇంటిని పోలీసులు చుట్టుముట్టారు. దీంతో నర్సీపట్నంలో హై టెన్షన్ నెలకొంది. 

మాజీ మంత్రి, టీడీపీ సీనియర్ నేత అయ్యన్నపాత్రుడు ఇంటిని పోలీసులను చుట్టుముట్టారు. నర్సీపట్నంలోని అయ్యన్నపాత్రుడి ఇంటి గోడను తెల్లవారుజామున మున్సిపల్ సిబ్బంది కూల్చివేశారు. పంట కాల్వను అక్రమించి గోడ నిర్మించారని మున్సిపల్ సిబ్బంది చెబుతున్నారు. ఈ క్రమంలోనే అయ్యన్న ఇంటి వెనకాల ఉన్న గోడను మన్సిపల్ సిబ్బంది కూల్చివేశారు. మరోవైపు అయ్యన్న ఇంటి దగ్గర భారీగా పోలీసులను మోహరించారు. మీడియాను కూడా లోనికి అనుమతి ఇవ్వడం లేదు. అయ్యన్నపాత్రుడి ఇంటివైపు వెళ్లే మార్గాలను పోలీసులు మూసివేశారు. చుట్టుపక్కల ప్రాంతాల నుంచి టీడీపీ నేతలు అయ్యన్న ఇంటి వద్దకు చేరుకోకుండా బారికేడ్లను ఏర్పాటు చేశారు.  దీంతో నర్సీపట్నంలో హై టెన్షన్ నెలకొంది. 

అయితే పోలీసుల చర్యపై అయ్యన్న కుటుంబ సభ్యులు అభ్యంతరం వ్యక్తం చేస్తున్నారు. ఈ నెల 2వ తేదీతో ఉన్న నోటీసును ఇప్పుడు ఇచ్చారని.. ఆ వెంటనే గోడను కూల్చివేశారని వారు చెబుతున్నారు. మరోవైపు అయ్యన్న ముఖ్య అనుచరుడు వెంకటరమణను పోలీసులు అదుపులోకి తీసుకున్నట్టుగా తెలుస్తోంది. 

అయ్యన్న అరెస్ట్‌కు రంగం సిద్దం..!
అయితే గత కొంతకాలంగా అయ్యన్నపాత్రుడు ముఖ్యమంత్రి వైఎస్ జగన్, మంత్రులపై చేస్తున్న వ్యాఖ్యలపై ప్రభుత్వం సీరియస్‌గా దృష్టి సారించిందనే వార్తలు వస్తున్నాయి. ఈ క్రమంలోనే ఆయనపై కేసులు కూడా నమోదు చేశారు. అయ్యన్నపాత్రుడిపై మొత్తంగా 12కు పైగా కేసులు ఉన్నాయి. ఆయనపై నిర్బయ కేసు కూడా ఉంది. నర్సీపట్నం మున్సిపల్ కమిషనర్ కృష్ణవేణి ఫిర్యాదు మేరకు పోలీసులు ఆయనపై ఈ కేసు నమోదు చేశారు. ఇటీవల చోడవరంలో జరిగిన టీడీపీ మినీ మహానాడులో మంత్రి రోజా, పోలీసులతో పాటుగా సీఎం జగన్‌పై  అనుచిత వ్యాఖ్యలు చేశారనే ఆరోపణల నేపథ్యంలో పోలీసులు ఆయనను అరెస్ట్ చేసే అవకాశం ఉందనే ప్రచారం సాగుతుంది.

గత కొంతకాలంగా అయ్యన్నను అరెస్ట్ చేస్తారనే వార్తల నేపథ్యంలో.. ఆదివారం తెల్లవారుజామున ఆయన ఇంటి వద్ద పోలీసులు మోహరించడం చర్చనీయాంశంగా మారింది. అక్రమ నిర్మాణం కూల్చివేత నేపథ్యంలో పోలీసులు మోహరించారా? లేక ఏదైనా కేసులో అరెస్ట్ చేస్తారా? అనేది తెలియాల్సి ఉంది. అయితే దీనిపై పోలీసుల వైపు నుంచి స్పష్టమైన ప్రకటన వెలువడాల్సి ఉంది.