సరదా కోసం విద్యార్థినులకు కరెంట్ షాక్.. ముగ్గురికి అస్వస్థత.. కళ్లుతిరిగిపడిపోయిన అమ్మాయి...

ఓ స్కూల్లో ఎలక్ట్రీషియన్ పనులు చేయడానికి వచ్చిన వ్యక్తి సరదా కోసం విద్యార్థినులు కూర్చున్న బెంచికి కరెంట్ షాక్ ఇచ్చాడు. దీంతో ముగ్గురు విద్యార్థినులు అస్వస్థతకు గురయ్యారు. 

కృష్ణాజిల్లా : కృష్ణాజిల్లాలో అమానుష ఘటన వెలుగు చూసింది. కంకిపాడు మండలం ఇడుపుగల్లు జడ్పి ఉన్నత పాఠశాలలో విద్యార్థినులకు కరెంట్ షాక్ ఇచ్చాడు ఓ ఎలక్ట్రీషియన్. స్కూల్లో విద్యుత్ పనులు చేసేందుకు వచ్చిన ఓ ఎలక్ట్రిషన్ ముగ్గురు విద్యార్థునిలకు కరెంట్ షాక్ ఇచ్చాడు. దీంతో  ముగ్గురు విద్యార్థినిలు అస్వస్థత పాలయ్యారు. ఓ విద్యార్థిని స్పృహ కోల్పోయింది.

దీనికి సంబంధించిన వివరాలలోకి వెళితే… స్కూల్లో క్లాస్ రూంలో టీవీలు పెట్టడం కోసం.. ఓ ఎలక్ట్రిషన్ ను హెడ్మాస్టర్ పద్మావతి భాయ్ పిలిపించారు. ఆ ఎలక్ట్రీషియన్ తనతో పాటు సహాయం కోసం సూరిబాబు అనే వ్యక్తిని కూడా తీసుకొచ్చుకున్నాడు. టీవీలకు కరెంట్ కనెక్షన్ ఇచ్చే క్రమంలో భాగంగా గురువారం నాడు టెన్త్ క్లాస్ బి సెక్షన్ లో సూరిబాబు విద్యుత్ పనులు చేస్తున్నాడు.

 ఆ సమయంలో క్లాసులోని విద్యార్థినులతో మాటలు కలిపాడు. అలా మాటలు కలుపుతూ కరెంటు వైర్లను.. ఆ విద్యార్థులను కూర్చున్న బెంచ్ కి తాకించాడు. దీంతో ఒక్కసారిగా షాక్ తో వారు ఉలిక్కిపడ్డారు. అది చూసిన సూరిబాబు… పలుమార్లు ఇలాగే చేశాడు. ఆ తర్వాత షాక్ వచ్చిన ముగ్గురు విద్యార్థినులు  బాగా అలసిపోయి ముఖం కడుక్కోవడానికి బయటకి వచ్చారు.

ఈ క్రమంలో ఓ విద్యార్థిని నీరసంతో పడిపోయింది. దీంతో విషయం  ప్రధానోపాధ్యాయినికి  తెలిసింది. వెంటనే స్కూల్ సిబ్బంది సమీపంలోని ఆర్ఎంపీని పిలిపించి అవి విద్యార్థినికి ప్రథమ చికిత్స చేయించారు. ఆ తర్వాత వారిని ఇళ్లకు పంపించేశారు. అప్పటికి ఇంకా కరెంట్ షాక్ విషయం ఎవరికీ తెలియదు.ఇంటికి వెళ్ళిన విద్యార్థినులు సాయంత్రానికి తల్లిదండ్రులకు విషయాన్ని తెలిపారు.  

వెంటనే వారు ఈ విషయాన్ని మండల అధికారులకు ఫిర్యాదు చేశారు. వారి ఫిర్యాదు మేరకు శుక్రవారం ఉదయం మండలాధికారులు, ప్రజాప్రతినిధులు స్కూలుకు వచ్చారు. హెడ్మాస్టర్ పై ఆగ్రహం వ్యక్తం చేశారు. దీంతో హెడ్మాస్టర్ తనకి ఈ విషయం తెలియదంటూ ఆ ఎలక్ట్రిషన్ను, అతనితో పాటు వచ్చిన సూరిబాబును పాఠశాలకు పిలిపించారు. వారిద్దరినీ   నిలదీయగా సూరిబాబు తాను సరదా కోసమే ఈ పని చేశానని చెప్పుకొచ్చాడు.  చిన్నారులు పోలీసులకు ఫిర్యాదు చేయడంతో…కేసు నమోదు చేసుకున్నారు.