నాలుగో తరగతి విద్యార్థి దారుణ హత్య.. అర్థరాత్రి హతమార్చిన గుర్తు తెలియని దుండగులు...

ఏలూరులో ప్రభుత్వ సంక్షేమహాస్టల్ ఉన్న ఓ నాలుగో తరగతి విద్యార్థి దారుణ హత్యకు గురయ్యాడు. గుర్తు తెలియని వ్యక్తులు అర్థరాత్రి హత్య చేశారు. 

ఏలూరు : ఆంధ్రప్రదేశ్ రాష్ట్రంలోని ఏలూరు జిల్లా బుట్టాయిగూడెం లో ఓ దారుణ హత్య వెలుగు చూసింది. నాలుగో తరగతి విద్యార్థి హత్యకు గురయ్యాడు. పులిరామన్న గూడెంలోని గిరిజన సంక్షేమ హాస్టల్లో ఉంటున్న ఈ విద్యార్థి హత్య స్థానికంగా కలకలం  సృష్టించింది. విద్యార్థి పేరు గోగుల అఖిల్ (9). హాస్టల్లో ఉంటూ  నాలుగో తరగతి చదువుతున్నాడు. ఆ చిన్నారిని గుర్తు తెలియని వ్యక్తులు హత్య చేశారు.

సోమవారం అర్ధరాత్రి 12 గంటల తర్వాత అఖిల్ ని గుర్తు తెలియని వ్యక్తులు హత్య చేసినట్లుగా తెలుస్తోంది. అయితే ఆ చిన్నారిని ఎవరు.. ఎందుకు హత్య చేశారో… అంత చిన్నారి మీద పగ ఏమిటో కారణాలు తెలియాల్సి ఉంది. విద్యార్థి హత్య జరిగినట్లు గమనించిన హాస్టల్ సిబ్బంది తల్లిదండ్రులకు సమాచారం అందించారు. పోలీసులకు విషయాన్ని తెలియజేశారు.  

సమాచారం అందుకున్న బుట్టాయిగూడెం పోలీసులు.. ఘటన స్థలానికి చేరుకుని పరిశీలించిన తర్వాత.. కేసు నమోదు చేసుకున్నారు.  హత్యకు సంబంధించి దర్యాప్తు చేపట్టారు. బాలుడి చేతిలో ఉత్తరం ఉన్నట్లు గుర్తించారు. అయితే, ఉత్తరంలో ఏముందో ఇంకా వెలుగు చూడలేదు. బాలుడి ఒంటి మీద ఎలాంటి గాయాలు లేవని పోలీసులు చెబుతున్నారు. దీంతో బయటి వ్యక్తులు హత్య చేశారా? విద్యార్థే ఆత్మహత్య చేసుకున్నాడా? అనే కోణంలో దర్యాప్తు చేస్తున్నారు.

అయితే, మిగతా విద్యార్థులు మాత్రం రాత్రి ముగ్గురు విద్యార్థులను ఎవరు వచ్చి తీసుకువెళ్ళారని చెబుతున్నారు. అలా వెళ్లిన విద్యార్థుల్లో ఒకరు తెల్లారేసరికి మృతదేహంగా మారాడు. అతనితో పాటు వెళ్లిన మరో విద్యార్థులు ఎవరని ఆరా తీస్తున్నారు. 

ఇదిలా ఉండగా, తెలంగాణలోని ఖమ్మం జిల్లా మధిర మండలం రాయపట్నంలో దారుణ ఘటన వెలుగు చూసింది. కుటుంబ కలహాల నేపథ్యంలో ఓ తండ్రి కన్న బిడ్డలను కర్కశంగా కడతేర్చాడు. ఆ తర్వాత పరారయ్యాడు. మధిర మండలం రాయపట్నం గ్రామానికి చెందిన పార్షపు శివరామ గోపాల్, మార్తమ్మ దంపతులు. వీరికి ఇద్దరు చిన్నారులు ఉన్నారు. తరచుగా ఈ దంపతుల మధ్య నిత్యం గొడవలు జరుగుతుండేవి. ఇటీవల శివరామగోపాల్ దొంగతనం కేసులో జైలుకు వెళ్లాడు.  మూడు రోజుల కిందటే విడుదలై వచ్చాడు.

భర్తతో గొడవలు జైలుకు వెళ్లడం కారణంగా భార్య మార్తమ్మ రాయపట్నం గ్రామంలోనే ఉన్న పుట్టింట్లో ఉంటుంది. వచ్చిన తర్వాత మళ్లీ వాళ్ళిద్దరి మధ్య గొడవ అయింది. దీంతో కోపానికి వచ్చిన శివరామ గోపాల్ తన చిన్నారులైన రామకృష్ణ (8), ఆరాధ్య (6)లను  దారుణంగా చంపాడు. ఈ చిన్నారులు రాయపట్నం ప్రభుత్వ పాఠశాలలో మూడో తరగతి, ఒకటో తరగతి చదువుతున్నారు.

ఆదివారం గొడవ నేపథ్యంలో అనంతరం శివరామకృష్ణ సోమవారం స్కూలుకు వెళ్లిన పిల్లలని తీసుకురావడానికి సాయంత్రం స్కూలు వద్దకు వెళ్లి.. రామకృష్ణ, ఆరాధ్యలను తనతో పాటు తన ఇంటికి తీసుకువెళ్లాడు. ఆ తరువాత వారిద్దరినీ గొంతు నిలిపి చంపేశాడు.  చిన్నారుల మృతదేహాలను దుప్పట్లో మూట కట్టి.. అక్కడి నుంచి పరారయ్యాడు. రోజులాగే పిల్లలను తీసుకురావడం కోసం మార్తమ్మ స్కూల్ దగ్గరికి వెళ్లేసరికి.. అక్కడ పిల్లలు లేరు. 

స్కూలు సిబ్బందిని ప్రశ్నించగా వాళ్ళ నాన్న వచ్చి తీసుకెళ్లాడని తెలిపారు. దీంతో మార్తమ్మ అక్కడికి వెళ్లి చూడగా ఇంటికి తాళం వేసి ఉంది. అనుమానం వచ్చిన మార్తమ్మ చుట్టుపక్కల వారి సహాయంతో ఇంటి తాళం పగలగొట్టింది. లోపలికి వెళ్లి చూడగా ఇద్దరు పిల్లలు విగత జీవులుగా.. దుప్పట్లో చుట్టు కనిపించారు. భార్యతో గొడవల కారణంగా శివరామ గోపాల్ కన్న పిల్లల్ని అతికిరాతకంగా చంపాడని గ్రామస్తులు చెబుతున్నారు.

విషయం పోలీసులకు సమాచారం ఇచ్చారు గ్రామస్తులు. శిక్షణ ఐపిఎస్ అధికారి ఎన్ హెచ్ఓ అవినాష్ కుమార్, సిఐ వసంతకుమార్  ఘటన స్థలానికి చేరుకుని పరిశీలించారు. చిన్నారులు ఇద్దరు మృతదేహాలని మధిర ఆసుపత్రికి తరలించారు. అక్కడికి చేరుకున్న వైరా ఏసిపి రెహమాన్ మృతదేహాలను పరిశీలించారు. శివరామగోపాల్ పై గతంలో కూడా పలు దొంగతనాల కేసులు ఉన్నాయని గ్రామస్తులు చెబుతున్నారు. దీనిమీద కేసు నమోదు చేసుకున్న పోలీసులు అతని కోసం గాలిస్తున్నారు.