Andhra Pradesh: ఏపీ ప్రజలకు శుభవార్త.. ఆ పథకాన్ని తిరిగి ప్రారంభించేందుకు చంద్రబాబు ఆమోదం

గతంలో విశేష ప్రజాదరణ పొందిన బేబీ కిట్ పథకాన్ని తిరిగి ప్రారంభించేందుకు ఆంధ్రప్రదేశ్ రాష్ట్ర ప్రభుత్వం సిద్ధమైంది. రాష్ట్ర వైద్య, ఆరోగ్యశాఖ చేసిన ప్రతిపాదనకు ముఖ్యమంత్రి నారా చంద్రబాబు నాయుడు ఆమోదం తెలిపారు. ఈ పథకాన్ని గత ప్రభుత్వ కాలంలో నిలిపివేసిన సంగతి తెలిసిందే.  

ప్రతీ న‌వ‌జాత శిశువుకి అవసరమైన 11 వస్తువులతో కూడిన బేబీ కిట్‌ను ప్రభుత్వం రూ.1,410 వ్యయంతో ఉచితంగా అందించనుంది. రాష్ట్ర బడ్జెట్‌ నుంచే ఈ పథకానికి కావాల్సిన నిధులు ఖర్చు చేయనున్నారు.

గతంలో ఈ పథకానికి జాతీయ ఆరోగ్య మిషన్ (NHM) కింద కేంద్ర ప్రభుత్వం కొంత భాగం నిధులను అందించేది. అయితే ప్రస్తుతం PH-ABHIM, పీఎం మాతృత్వ వందన యోజన, 15వ ఆర్థిక కమిషన్ నిధుల కింద కూడా సాయం లభించే అవకాశం లేకపోవడంతో, పూర్తిగా రాష్ట్ర ఖర్చుతోనే బేబీ కిట్‌ల పంపిణీ జరగనుంది.

బేబీ కిట్‌లో ఏం ఉంటాయి:

దోమ తెరతో కూడిన బేబీ బెడ్

వాటర్‌ప్రూఫ్ కాట్ షీట్

బేబీ డ్రెస్సు

వాషబుల్ నేప్కిన్స్

టవల్

బేబీ పౌడర్

బేబీ షాంపూ

బేబీ ఆయిల్

బేబీ సబ్బు

సోప్ బాక్స్

బేబీ రాటిల్ టాయ్

ఈ కిట్‌లు రాష్ట్రంలోని ప్రభుత్వ ఆసుపత్రుల్లో ప్రసవమయ్యే ప్రతి తల్లికి ఇవ్వనున్నట్లు వైద్య ఆరోగ్యశాఖ తెలిపింది. ప్రస్తుతం రాష్ట్రంలో సగానికి పైగా ప్రసవాలు ప్రభుత్వ ఆసుపత్రుల్లోనే జరుగుతున్న నేపథ్యంలో ఈ పథకం మరింత ఉపయోగకరంగా మారనుంది.