హంతకులతో కలిసి ప్రచారమా....టీఆర్ఎస్ అభ్యర్థిని నిలదీసిన మహిళ

భద్రాద్రి కొత్తగూడెం జిల్లా అశ్వారావుపేట టీఆర్ఎస్ అభ్యర్థి తాటి వెంకటేశ్వర్లుకు ప్రచారంలో భాగంగా ఊహించని పరిణామం ఎదురయ్యింది. హంతకులను వెంటబెట్టుకుని ప్రచారంలో తిరగడమే కాకుండా...వాళ్లతో కలిసొచ్చి తనకు ఓటేయమని  ఎలా అడుగున్నావ్? అంటూ ఓ మహిళ ప్రశ్నించింది. మహిళ ఇలా నడిరోడ్డుపై టీఆర్ఎస్ అభ్యర్థిని ప్రశ్నించడం నియోజకవర్గ పరిధిలో తీవ్ర చర్చనీయాంశమైంది. 

అశ్వారావుపేట నియోజకవర్గంలోని ఎర్రగుంట గ్రామానికి చెందిన కాంగ్రెస్ కార్యకర్త పరుడి శ్రీనివాస్ గత సంవత్సరం ప్రత్యర్థుల చేతిలో హత్యకు గురయ్యాడు. అయితే ఈ హత్యతో సంబంధమున్న కొందరు నిందితులు ఇటీవల గ్రామానికి ప్రచారం కోసం వచ్చిన టీఆర్ఎస్ అభ్యర్థి తాటి వెంకటేశ్వర్ రావు వెంట వున్నారు. ఈ విషయాన్ని గమనించిన శ్రీనివాస్ తల్లి చిట్టెమ్మ తాటిని అడ్డుకుని తన కొడుకును చంపిన వాళ్లను వెంటేసుకుని తిరుగుతున్నావా? అంటూ నిలదీసింది. 

ఆమెతో పాటు కుటుంబ సభ్యులంతా ఈ వ్యవహారంపై ఆగ్రహం వ్యక్తం చేశారు. హత్య కేసులో నిందితులుగా వున్న వాళ్లను వెంటనే పార్టీలోంచి సస్పెండ్ చేయాలని తాటికి సూచించారు. 

ఈ ఘటనపై స్పందించిన తాటి వెంకటేశ్వర్లు... తన వెంట వచ్చిన చాలా మందిలో ఆ నిందితులు కూడా  ఉండివుంటారని...అసలు వాళ్లెవరో కూడా తనకు తెలియదన్నారు. కొడుకును కోల్పోయిన బాధలో ఆమె అలా మాట్లాడివుంటుందని తాటి తెలిపారు.