మేడ్చల్ జిల్లాలో ఘోర రోడ్డు ప్రమాదం.. ముగ్గురు దుర్మరణం..

హైదరాబాద్ ఓఆర్ఆర్‌పై ఘోర రోడ్డు ప్రమాదం జరిగింది. మేడ్చల్ జిల్లా కండ్లకోయ వద్ద లారీని టెంపో వాహనం ఢీకొట్టింది. ఈ ప్రమాదంలో ముగ్గురు మృతిచెందారు. మరో 9 మందికి తీవ్ర గాయాలయ్యాయి.  గాయపడిన వారిని ఆస్పత్రికి తరలించారు. వీరిలో ఇద్దరి పరిస్థితి విషమంగా ఉంది.  గాయపడిన వారిని ఆస్పత్రికి తరలించారు. మృతులు సంగారెడ్డి జిల్లా గుమ్మడిదల వాసులుగా గుర్తించారు. బాధితులు శ్రీశైలంలో దైవ దర్శనం చేసుకుని ఇంటికి తిరిగి వస్తుండగా ఈ ప్రమాదం చోటుచేసుకుంది. 

ఈ ప్రమాదంపై సమాచారం అందుకున్న పోలీసులు అక్కడికి చేరుకుని సహాయక చర్యలు చేపట్టారు. ప్రమాద స్థలాన్ని పరిశీలించారు. ఈ ప్రమాదంపై కేసు నమోదు చేసి దర్యాప్తు చేపట్టారు. టెంపో డ్రైవర్ నిద్రమత్తులో లారీ ఢీకొట్టినట్లుగా అనుమానాలు వ్యక్తం అవుతున్నాయి. కాగా, ఈ ఘటనలకు సంబంధించి పూర్తి వివరాలు తెలియాల్సి ఉంది. 

ఇదిలా ఉంటే.. ఆదిలాబాద్ జిల్లాలో కంటైనర్ ను కారు ఢీకొన్న ఘటనలో నలుగురు మృతి చెందారు. జిల్లాలోని గుడిహత్నూర్ మండలం వద్ద ఆదివారం రాత్రి ఈ ప్రమాదం జరిగింది. హైదరాబాద్ నుంచి అదిలాబాద్ వెళ్తున్న కారు ఓ కంటైనర్ ను బలంగా ఢీకొట్టింది. ఈ ఘటనలో కారులో ప్రయాణిస్తున్న ముగ్గురు పురుషులు, ఒక మహిళ మృతి చెందారు మరొక మహిళ గాయపడ్డారు. సమాచారం అందుకున్న పోలీసులు ఘటనాస్థలికి చేరుకుని సహాయక చర్యలు చేపట్టారు. గాయపడిన మహిళను ఆసుపత్రికి తరలించారు. మృతులను అదిలాబాద్ వాసులుగా గుర్తించారు.