ఎల్బీ నగర్‌ : టింబర్ డిపోలో భారీ అగ్నిప్రమాదం.. కార్ల షోరూమ్‌కి వ్యాపించిన మంటలు, 50 వాహనాలు దగ్ధం

హైదరాబాద్ ఎల్‌బీ నగర్‌లోని ఓ టింబర్‌ డిపోలో మంగళవారం భారీ అగ్నిప్రమాదం సంభవించింది. మంటలు దట్టంగా వ్యాప్తి చెందుతూ వుండటంతో స్థానికులు భయాందోళనలకు గురవుతున్నారు. 

హైదరాబాద్‌లో భారీ అగ్నిప్రమాదం సంభవించింది. మంగళవారం ఎల్‌బీ నగర్‌లోని ఓ టింబర్ డిపోలో మంటలు చెలరేగాయి. అయితే దాని పక్కనే మల్టీప్లెక్స్, అపార్ట్‌మెంట్లు, పాత కార్ల షోరూమ్ వున్నాయి. చూస్తుండగానే టింబర్ డిపో పక్కనే వున్న పాత కార్ల షోరూమ్‌కి మంటలు వ్యాపించాయి. ఈ ఘటనలో 50కి పైగా కార్లు దగ్ధమయ్యాయి. అయితే కార్ల షోరూమ్‌లో సిలిండర్లు వుండటంతో భారీగా పేలుళ్లు చోటు చేసుకుంటున్నాయి.  ఆ పక్కనే వున్న కారు మెన్ కారు గ్యారేజ్ వరకు మంటలు వ్యాపించాయి. ప్రమాదం కారణంగా ఆ ప్రాంతమంతా దట్టమైన పొగ కమ్ముకోవడంతో ప్రజలు ఇబ్బందులు పడుతున్నారు. మంటలను అదుపు చేస్తున్న ఫైర్ సిబ్బంది.. ముందు జాగ్రత్త చర్యగా చుట్టుపక్కల వారిని ఖాళీ చేయిస్తున్నారు.