ఇంటి ముందు కుక్క మూత్రం పోసిందని.. యజమాని తల పగులగొట్టారు...

తన ఇంటి ముందు కుక్క మూత్రం పోసిందనే ఆవేశంలో ఓ వ్యక్తి దాని యజమాని తలను పగులగొట్టాడు. వివరాల్లోకి వెళితే.. హైదరాబాద్ ఎల్బీ నగర్ శివగంగానగర్‌‌కు చెందిన దాసరి అంజయ్యకు చెందిన పెంపుడు కుక్కకు కొద్దిరోజుల క్రిత జబ్బు చేసింది.

దీంతో డిసెంబర్ 29న దానిని ఆసుపత్రికి తీసుకెళ్లేందుకు ఆటోను పిలిచాడు. ఆటోలో ఉన్న మట్టిని డ్రైవర్ దులుపుతుండగా... ఆ కుక్క పక్కనే ఉన్న స్థలంలో మూత్ర విసర్జన చేసింది. దానికి ఎదురుగా నివసిస్తున్న రాములు అనే వ్యక్తి దీనిని గమనించి గట్టిగా అరుస్తూ బయటకి వచ్చాడు.

తన ఇంటి ముందు కుక్కతో ఇలా చేయిస్తావా అంటూ అంజయ్యను అసభ్యపదజాలంతో దూషించాడు. కోపంతో చేతిలో ఉన్న హెల్మెట్‌తో అతని తలపై గట్టిగా బాదాడు. అంజయ్య ఇచ్చిన ఫిర్యాదు మేరకు ఎల్బీ నగర్ పోలీసులు రాములుపై ఐపీసీ 324, 504, 506 సెక్షన్ల కింద కేసు నమోదు చేశారు.