Covid: భారత్‌ లో 257 కోవిడ్ కేసులు: కేరళ, తమిళనాడు, మహారాష్ట్రలోనే ఎక్కువ

దేశవ్యాప్తంగా 257 యాక్టివ్ కోవిడ్ కేసులు నమోదు అయినట్లు సమాచారం. ప్రధానంగా కేరళ, తమిళనాడు, మహారాష్ట్రలలో ఎక్కువగా నమోదవుతున్నాయి.

దేశవ్యాప్తంగా తాజాగా 257 యాక్టివ్ కోవిడ్-19 కేసులు ఉన్నట్లు కేంద్ర ఆరోగ్య శాఖ వెల్లడించింది. ప్రస్తుతం నమోదవుతున్న కేసుల్లో ఎక్కువ భాగం కేరళ, తమిళనాడు, మహారాష్ట్రల నుండి వస్తున్నాయని అధికారులు స్పష్టంగా చెబుతున్నారు.కోవిడ్ కేసుల సంఖ్య స్వల్పంగా పెరుగుతున్నప్పటికీ, పరిస్థితి పూర్తిగా నియంత్రణలో ఉందని ఆరోగ్య శాఖ అధికారులు తెలియజేశారు. కొత్తగా పెరుగుతున్న కేసులను స్థానిక స్థాయిలోనే గుర్తించి, వెంటనే వైద్యం అందించడంతో వైరస్ వ్యాప్తిని అదుపులో పెట్టగలుగుతున్నామని వారు వెల్లడించారు.

ఇటీవల రోజువారీ టెస్టింగ్ సంఖ్యలు పెరిగిన నేపథ్యంలో కొంతమేర కేసుల సంఖ్యలు కూడా పెరుగుతున్నట్టు గుర్తించారు. అయితే ఇప్పటివరకు కొత్త వేరియంట్లు ఎలాంటి తీవ్రమైన ప్రమాదాన్ని కలిగించేలా కనిపించలేదని అధికారులు వివరించారు.కేరళలో అత్యధిక కేసులు నమోదవుతున్నాయి. రాష్ట్ర ప్రభుత్వం అక్కడి పరిస్థితిని పర్యవేక్షిస్తూ, అవసరమైనచోట్ల ప్రాథమిక ఆరోగ్య కేంద్రాలను అప్రమత్తం చేస్తోంది. తమిళనాడు, మహారాష్ట్రలోనూ నియంత్రణ చర్యలు కొనసాగుతున్నాయి.

సంబంధిత ప్రాంతాల్లో ప్రజలను అప్రమత్తంగా ఉండాలని, స్వల్ప లక్షణాలు కనిపించిన వెంటనే వైద్య సాయం తీసుకోవాలని సూచించారు. ప్రభుత్వాలు మాస్కుల వినియోగం, వ్యక్తిగత పరిశుభ్రత పాటించాలన్న సూచనలతో మళ్లీ ప్రజలను జాగ్రత్త పడేలా చేస్తున్నాయి.ప్రస్తుతం ఆసుపత్రులలో చేరిన కేసులు తక్కువగానే ఉన్నప్పటికీ, ఆరోగ్య వ్యవస్థ పూర్తిగా సిద్ధంగా ఉందని అధికారులు చెప్పారు.